السنكسار القديم لسة مافيهوش سيرة القديس العظيم ده، لكن سيرته موجودة مش بس على المواقع المسيحية، ده في الكتير من الجرايد و المجلات في مصر ... تعالوا نشوف أهم نقط في حياته

ولادته و نشأته

يوم 2 أغسطس سنة 1902، اتولد عازر يوسف في بلدة في دمنهور
والده كان معروف بحبه للكنيسة ... و لأن قريتهم كانت قريبة من دير البراموس، كان بيزورهم رهبان كتير في البيت ... حبّهم عازر و اتعلق بيهم
و كان كمان متفوق علمياً ... كمّل تعليمه و اشتغل 5 سنين في اسكندرية، و خلالهم كان معروف بنسكه الشديد

رهبنته و سيامته كاهناً

و زي ما كان متوقّع، طلب عازر الرهبنة في دير البراموس ... و اتقبل قعلاُ (سنة 1927)
فضل سنة تحت الاختبار (كعادة الأديرة)، تتلمذ فيها على إيد أبونا عبد المسيح صليب و أبونا يعقوب الصامت، و طبعاً عاش في نسك شديد
و في سنة 1928، اترسم باسم الراهب مينا البراموسي في كنيسة العدرا في الدير ... و يومها سمع الجملة دي من مرشده الروحي:

سِر على بركة الله بهذه الروح الوديع الهادئ وهذا التواضع والانسحاق، وسيقيمك الله أمينًا على أسراره المقدسة، وروحه القدوس يرشدك ويعلمك

زاد الراهب مينا في نسكه و قرائاته الروحية و ازداد في الفضيلة ... فرسمه البابا الأنبا يؤانس قساً سنة 1931
اشتاق للافراد و التوحّد في البرية ... و قعد فترة فعلاً في مغارة القمص عبد المسيح الحبشي (قريب من الدير) في نسك شديد

في الطاحونة

بعد كده استأجر 'الطاحونة' ... مكان متواضع و مهجور في مصر القديمة استأجره أبونا مينا من الحكومة ... و قعد فيها من أول سنة 1936 ... و انطبقت عليه الآية اجميلة اللي بتتقال على حب الرهبان لربنا و تركهم للعالم:

وهم لم يكن العالم مستحقا لهم. تائهين في براري وجبال ومغاير وشقوق الأرض (عبرانيين 11 : 38)

حصلت مرة حادثة له و هو في الطاحونة ... دخل حرامية عشان يسرقوه (فاكرينه مخبي جوة قلوس)، و ضربوه ضربة قاتلة على دماغه و هربوا ... و هو زحف لحد أيقونة مارمينا و اتشفع بيه ... و فعلاً عاش و تعافى
و اشتهر أبونا مينا و اتعرفت سيرته الزكية
و سنة 1941 اضطر أبونا مينا يسيب الطاحونة بأمر الإنجليز أثناء الحرب العالمية التانية ... فراح بابلون الدرج وأقام في فرن بكنيسة السيدة العذراء

رئاسته لدير الأنبا صموئيل و قلايته في مصر القديمة

سنة 1944، أصبح أبونا مينا رئيس لدير الأنبا صموئيل في جبل القلمون (مغاغة) ... و عمل نهضة كبيرة في الدير و احتضن بأبوته شباب كتير حبوا الرهبنة
و أعطاه أنبا أثناسيوس مطران بني سويف وقتها رتبة القمصية
فضل أبونا مينا على حبه للطاحونة و لمصر القديمة ... و بنى هناك قلاية و كنيسة باسم حبيبه مارمينا سنة 1949 ... و بنى كمان دار ضيافة كان بيستقبل فيه الشباب الجامعي المغترب ... و عمل أبونا مينا تأثير رائع في حياة الشباب دول، اللي شافوا معلمهم كل يوم عند نص الليل يقوم يصلي تسبحة و يقرا كتاب مقدس ... و قبل الفجر يروح يعمل القربان بإيده و يصلي القداس ... بعد كده يبدأ يومه و خدمته

اختياره للبطريركية

يوم 2 نوفمبر 1957 كان معاد اختيار البطرك الجديد ... 5 مرشحين للبطريركية، في اللحظات الأخيرة تم اختياره كمرشّح خامس ... و حصلت القرعة يوم الحد و اختير القمص مينا عشان يبقى البابا كيرلس ... و كان انجيل اليوم ده:

وهوذا آخرون يكونون أولين، وأولون يكونون آخرين (لوقا 13 : 30)

و ساعتها اضطر يبعد عن مصر القديمة ... رسم كاهن مكانه عشان يفضل المكان فيه صلاة كل يوم زي ما هو ... و كان بييجي كل شوية "يملا البطارية" بأخذ خلوة في الطاحونة
فضل على نسكه و زهده زي ما هو ... كان بياكل مرتين في اليوم بس (و في الصوم مرة واحدة بس) ... و كان بيصلي قداس كل يوم و قبله تسبحة ... و بعده خدمة أو خلوة
و تنيح يوم 9 مارس سنة 1971

عن البابا كيرلس

كان البابا كيرلس رجل صلاة و توبة و غيرة و محبة لشعبه ... عشان كده نهضت الكنيسة نهضة روحية عظيمة في عهده
و ربنا أعطاه مواهب عديدة منها: الشفافية الروحية (معرفة الأمور) و عمل المعجزات الكتير جداً المعروفة و اللي ماحدش يعرفها
فضل راهب ناسك بجد ... عاشق لتراب الطاحونة و خلوتها أفضل من مجد الدنيا (زي ما قال يوم ما جسد مارمرقس رجع مصر من روما في موكب عظيم، و ده كان حدث عظيم على مستوى مصر كلها)
البابا كيرلس كان صديق مارمينا و كان بيحبه جداً ... و هو اللي عمّر دير مارمينا العامر في مريوط زي ما كان بيحلم

أهم أقواله

ماتخافش يا حبيب أبوك