سؤال

ليه الروح القدس عايش جوايا؟
يعني ربنا العظيم جدااااااااااً ... هيحب يعيش جوايا ليه؟؟

الإجابة

عشان يديني القوة ... إني أعيش زي ربنا يسوع

نشوف إيه؟

• الرسل سمعوا صوت ريح شديد و حَل عليهم ألسنة نار
• و الروح القدس جه و سكن في كل الرسل اللي كانوا متجمعين
• و إداهم نعمة ... و مواهب مكانتش عندهم (زي إنهم يعرفوا يتكلموا عن ربنا بلغات غير لغتهم لناس ميعرفوهمش)
• و ده كان لازم عشان يبشروا في كل الدنيا بالخلاص العظيم اللي ربنا يسوع عمله و بقيامته ... عشان الكل يخلص
• نفس الروح القدس ده هو اللي جوانا ... هو اللي أخدناه جوانا لما اترشمنا بالميرون بعد المعمودية
• بعد ما ربنا يسوع صعد السما، أرسل الروح القدس عشان يحلّ على التلاميذ و يبشّروا كل الناس ... ده نفس الروح اللي فينا

• الهدية بندّيها لحد إحنا بنحبه في عيد ميلاده
• و ربنا إدالنا أعظم هدية ... روحه القدس ... يعني هو بنفسه بيسكن جوانا و يدينا قوة عظيمة
• طبعاً إحنا أخدناها لما اتولدنا بجد في المعمودية و الميرون
• و إحنا بنمسك في الروح القدس أكتر و أكتر لما نختار نسمع كلام ربنا ... كده إحنا بنديله فرصة يقودنا و يشتغل فينا

• البيت هو المكان اللي بنعيش فيه و نرتاح فيه و نحبه
• و ربنا حب إن روحه القدوس يسكن فينا ... و نبقى زي الهيكل اللي في الكنيسة بالظبط ... و عمره ما هيسيبنا
• إحنا الروح القدس ساكن في قلبنا ... بيطمّنا و يعزينا و يشجعنا و يقوينا
• أنا عمري ما هاكون لوحدي ... الروح القدس دايماً فيّ و معايا و بيقويني

• المراية لمّا بنبُص فيها بنقدر نشوف نفسنا
• و الروح القدس مش بيغيّرنا من برة ... يعني لو بصينا مش هنلاقي شكلنا مختلف
• الروح القدس بيغير قلبنا و ينضّفه و يقوينا من جوة

المشكلة

ساعات باحب آخد أحسن حاجة لنفسي ... يعني في اللعب و المكان و الفسحة أحب أبسط نفسي حتى على حساب أصحابي 😟

الحل

أفتكر ربنا يسوع ... اللي قال اللي عايز يبقى عظيم يبقى آخر الكل ... يعني يقدّم سعادة الناس حتى لو على حساب سعادته شوية
ده اللي الروح القدس اللي فينا بيقول لنا نعمله ... و مش بس كده، ده كمان بيدّينا قوة عشان نعمله
صلي إن الروح القدس يغيّرك 😉

صورة للتلوين

الروح القدس و هو بيحل على الرسل في يوم الخمسين