سؤال

أفرّح مين بربنا؟

الإجابة

أفرّح كل الناس بربّنا

نشوف إيه؟

• بولس الرسول كان فاهم ربنا عايز منه إيه ... إنه يكون رسول للأمم
• و بولس كان مطيع جداً ... و عمل 3 رحلات تبشيرية طويلة جداً عشان يبشّر الناس بربنا
• و بسبب تبشيره، اتغاظ منه اليهود اللي ماقبلوش الإيمان بربنا يسوع
• اتقبض عليه بسبب كده ... و كان هيروح روما بسفينة مع المسجونين التانيين
• لكن السفينة اتكسرت بيهم في السكة
• بس في الآخر عاشوا و وصلوا لروما ... و بولس فضل مسجون هناك
• لكن بولس مخلّاش حاجة توقفه عن التبشير
• و حتى و هو مسجون، ده موقّفوش عن خدمته ... فضل يبشّر برضه و كتب رسايل عظيمة للكنايس التانية ... مفيش حاجة تقدر توقّف خطة ربنا ولا تمنعنا من تنفيذها :)
• ربنا استخدم الوقت اللي كان فيه بولس الرسول في السجن أو مش قادر يروح من مدينة لمدينة في إنه يكتب رسايل للكنايس، بقت من أسفار الكتاب المقدس و بنقرأها في القداس كل يوم ... ربنا يقدر يستخدم الأوقات الصعبة لينا و يطلّع منها حاجات عظيمة

• الخريطة بتعرّفنا إزاي نوصل للمكان اللي احنا عايزينه
• و بولس سافر لبلاد كتير جداً عشان يفرّح الناس بربنا
• إحنا كمان لازم نفرّح كل الناس اللي في حياتنا بربنا

• الملعب بنلعب فيه مع أصحابنا
• و و قت اللعب وقت حلو قوي إني أفرّح صحابي بربنا ... بدل ما أتخانق أو أزعل
• و نفس الكلام في البيت برضه و المدرسة

• الإشارة الخضرا معناها إننا نقدر ننطلق في الطريق
• و ربنا إدالنا الإشارة الخضرا إننا ننطلق و نفرّح الناس بيه

المشكلة

ممكن نتحمّس زيادة عن اللزوم شوية ... و نندفع و نكلّم الناس بطريقة غلط عن ربنا أو العكس ... أحس إني خجلان و مش قادر أكلّم حد عن ربنا 😟

الحل

أنا أقدر أفرّح الكل بربنا في حياتنا دلوقتي ... أكلم أسرتي ... عيلتي ... أصحابي ... مش لازم نسافر أو نكلم ناس مانعرفهاش ... ممكن بسهولة و أنا قاعد مع أهلي، و أنا بالعب مع أصحابي ...
و الناحية التانية ماينفعش نخجل و إحنا بنكلم أهلنا عن ربنا ... دي أعظم بشارة ممكن نقولها لأي حد 😉

صورة للتلوين

بولس الرسول حتى و هو أسير، فضل يبشّر بربنا