المَثَل

• واحد لقى كنز مستخبي في جنينة كبييييرة


• الكنز ده عبارة عن جواهر و حاجات غالية جدااااااً


• الراجل فكّر و قال: أنا عايز الكنز ده لأنه لو معايا مش هابقى محتاج أي حاجة تانية طول حياتي


• طب أعمل إيه؟ أنا لازم أشتري الجنينة كلها لأنها أكيد مليانة كنوز مستخبية


• بس مش معايا فلوس تكفي! مش مشكلة: أنا هابيع كل حاجة عندي عشان أقدر أشتري الجنينة دي ... و ساعتها هابقى أنا اللي كسبت الكنز الغالي اللي في الجنينة


• و عمل كده فعلاً و اشترى الجنينة


• و بقى كل اللي يشغله في حياته إنه كل يوم يحفر في الجنينة و يدوّر على الكنز اللي فيها


• و كل ما يحفر و يدوّر بيلاقي كنوز أكتر و أكتر ... و بقى راجل غني جداً جداً

يا رب تقصد إيه؟

• الجنينة الكبيرة دي هي الإنجيل اللي فيه كلام كتييير جداً


• الإنجيل مستخبي فيه ربنا يسوع ... و إحنا محتاجين نعمل شوية مجهود عشان نكتشف الكنز الغالي ده


• لما آخد الإنجيل و أحفظه و أقراه و أعمل بيه ... باقدر أشوف الكنز اللي مستخبي فيه (ربنا يسوع) أكتر و أكتر ... و بابقي غني جداً بيه


• و طبعاً ده كنز مالوش آخِر، كل ما أقرا أكتر بافهم أكتر و الكنز بيكون أوضح و أكبر


• و ده يخليني أبيع أي حاجة و أركّز في الإنجيل لأني شفت فيه الكنز الحقيقي:
  • يعني أحب أقرا الإنجيل و القصص الجميلة اللي فيه أكتر ما أتفرّج على التليفيزيون
  • أبطّل ألعب شوية عشان أستمتع بالإنجيل ... هو أحلى لي و بيبسطني و يفرّحني
  • أسيب أي حاجة وحشة تعطّلني عن الإنجيل