من قصص الكتاب المقدس: الطريق إلى عمواس

ربنا يسوع … ابن الله و مخلّص العالم … و هو على الأرض، ربنا يسوع علّم كل الناس عن محبة ربنا و شفى الناس من أمراضها … وعمل معجزات كتيرة زي تهدئة البحر في العاصفة … و قوّم ناس من الموت

بس فيه ناس كانت كارهة ربنا يسوع .. و سلّموه للموت على الصليب و اتدفن في القبر

لمدة 3 أيام جسد يسوع فضل في القبر … وكان واضح إن مفيش أمل خلاص … لكن فجر يوم الأحد، راحت المريمات في زيارة للقبر و لقوا القبر فاضي و إنه مبقاش في القبر! يسوع قام! يسوع حي!

في نفس اليوم ده، كان 2 من تلاميذ ربنا يسوع رايحين قرية اسمها عمواس … و بيتكلموا عن كل حاجة حصلت ليسوع

و هم بيتكلموا، جه يسوع نفسه و بدأ يمشي معاهم … لكن ربنا خلاهم ميعرفوش إن ده يسوع نفسه

يسوع سأل التلميذين عن الكلام اللي بيقولوه، و هم كانوا زعلانين جداً … واحد فيهم اسمه كليوباس قال له: أنت أكيد ماكنتش في أورشليم الأيام اللي فاتت و إلا أكيد كنت هتبقى عارف
يسوع سأل: إيه اللي حصل؟ ردّ التلميذين: اللي حصل ليسوع … و بدأوا يحكوا ليسوع الأحداث اللي حصلت له من القبض عليه و صلبه و موته و دفنه
قالوا له على كلام المريمات اللي برضه أكّده بطرس و يوحنا إن جسد يسوع مبقاش في القبر

يسوع قال لهم: إيه الغفلة اللي انتم فيها دي! ليه صعب عليكم تفهموا و تؤمنوا بكلام الأنبياء
و يسوع شرح لهم من نبوات موسى و الأنبياء النبوات اللي بتتكلم عنه و الأحداث اللي حصلت له

و لمّا قرّبوا من عمواس، يسوع قال لهم إنه مكمّل على حتة تانية … بس التلميذين ترجّوه يقضي الليلة معاهم لأن الدنيا ليّلت

و يسوع راح معاهم .. و هم بياكلوا، يسوع بارك الخبز و كسره و قسمه عليهم

و في اللحظة دي ربنا فتح عينيهم و أدركوا إن ده يسوع! .. و في اللحظة دي اختفى يسوع
ساعتها التلميذين قالوا لبعض: فعلاً عشان كده قلبنا اتحرّك جوانا و هو بيشرح لنا النبوات

و بسرعة رجعوا تاني أورشليم، راحوا للتلاميذ و المؤمنين المجتمعين و حكوا لهم اللي حصل

و هم بيحكوا، لقوا يسوع فجأة في وسطهم! في الأول خافوا و افتكروه شبح

بس يسوع ورّاهم إنه هو بجسده فعلاً … ورّاهم آثار الجراح في يديه و رجليه … و هم كانوا بيتفرجوا في ذهول و فرحة كبيرة جداً

يسوع طلب منهم أكل و هم أعطوه سمك، فأكل

و بعد كده شرح لهم يسوع إن كل اللي حصل كان بترتيب من ربنا و ساعدهم يفهموا النبوات … و وعدهم يبعت لهم الروح القدس و قال لهم لا يتركوا أورشليم لحد ما يحلّ عليهم الروح القدس و يملأهم بقوة من السماء