سؤال

امتى أقدر أصلّي؟

الإجابة

أنا أقدر أصلي في كل وقت ... بالنهار و بالليل
في كل وقت و كل مكان أقدر أكلّم ربنا و أسمعه بيكلّمني

نشوف إيه؟

• صموئيل كان لسة ولد صغير ... لكن ربنا اختاره و كلّمه شخصياً
• صموئيل في الأول مكانش عارف إنه ربنا
• لكن ربنا دايماً سامعنا و نقدر نكلّمه و يكلّمنا في كل وقت و كل مكان
• و دي هي الصلاة ... يبقى أنا أقدر أصلي في كل وقت و كل مكان
• المهم بس إني دايماً أكون مستعد أسمع ربنا و أتكلم معاه ... و أقول زي ما عالي قال لصموئيل يقول: تكلّم يا رب لأن عبدك سامع
• صموئيل لمّا عمل كده سمع ربنا ... و ربنا قال له يعمل إيه و هو سمع كلام ربنا و كان مطيع طول عمره
• إحنا كمان نقدر نسمع كلام ربنا ... مش بوداننا زي صموئيل لكن في الإنجيل ... الإنجيل هو كلام ربنا لينا

• أبص للطبيعة اللي ربنا عملها و أشوف ربنا في كل حاجة فيها و أتكلم معاه
• لمّا أسمع العصافير ... كأنها بتسبح ربنا ... و أسبح معاها
• لمّا أبص على الورد ... أشوف قد إيه ربنا فنان جميل ... و أسبح و أتكلم معاه
• لمّا أبص على السما ... أشوف قد إيه ربنا كبير و مالوش نهاية ... أسبحه لأنه أبويا الطيب اللي بيحبني
• الطبيعة بتعلّمني أسبّح ربنا معاها

• الساعة بتفكرني إن ربنا سامعني في كل وقت
• سواء بالليل أو الصبح أو الضهر ... ربنا عمره ما بينام ولا بيزهق مني

• طيب أتكلم مع ربنا أقول له إيه في الصلاة؟؟
• ربنا هو أبويا و صاحبي ... أقدر أتكلم معاه على طول و أقول له كل حاجة ... اللي باعمله، اللي محتاجه، قد إيه هو حلو بالنسبة لي، أنا حاسس بإيه ...

المشكلة

ساعات مش بافكّر أكلّم ربنا ... أو مش باسمعه لمّا يكلّمني 😟

الحل

افتكر دايماً إن ربنا أبويا الطيب اللي على طول معايا و سامعني و بيكلمني
و أقول مع صموئيل: يا رب اتكلم، أنا سامع
و أفتح الإنجيل لأن ده كلام ربنا 😉

صورة للتلوين

ربنا و هو بيكلّم صموئيل