بطلان اللذة تحت الشمس

• سليمان قال: طيب أجرّب الحاجات المفرحة اللي في الدنيا … الضحك الكتير و الخمر و الرفاهية و الترف الزيادة و المقتنيات و العبيد و الفلوس و الزوجات و المعرفة و العلم
• لكن بعد كل ده، لقيت تعبي في الحاجات دي باطل و بدون منفعة … حتى العلم و المعرفة - صحيح لهم نفع طبعاً - مش هم سر السعادة لأن في الآخر الحكيم و الجاهل بيموتوا و يتنسوا
• فندمت على كل تعبي ده لأني في الآخر هسيبه و أمشي … يعني تعبت في حياتي قاعد أدوّر و أجتهد و ما نامش، لكن في الآخِر كل ده هسيبه و أمشي من غير ما ينفعني

سليمان وصل لاستنتاج: مافيش أحسن من إن الواحد ينبسط بالحاجة اللي معاه و يشكر ربنا عليها … و يبقى هدفه يكون صالح قدام ربنا، ساعتها ربنا يعطيه الحكمة و السعادة

حكمة ربنا في اختيار وقت كل أمر

• كل شيء تحت الشمس له وقت ينتهي بعده (سواء حاجات حلوة أو وحشة)
• ربنا هو ضابط الكل و اختار وقت كل حاجة بحكمة لخير أولاده … فيه حاجات ممكن نفهمها على الأرض لكن فيه حاجات مش هانفهمها غير في الأبدية لمّا ننظر لحياتنا على بعضها
• بالتالي تحت الشمس الإنسان المفروض يفرح باللي ربنا أعطاه له و يكون أمين فيه و يحوّله للخير
• الإنسان لو ظلم أو تكبر على ربنا مش هيستفيد حاجة لأنه في الآخر هيموت و بعد كده يوم دينونة ربنا يعطي فيه كل واحد كنحو أعماله

غياب المحبة يجعل الحياة بلا معنى

• الظلم:
  سليمان لمّا شاف الظلم اللي بين الناس قال يا بخت اللي مات و اترحم من الظلم اللي في الدنيا ده
• الحسد:
  ساعات الناس بدل ما تفرح لنجاح حد تحسده
• الكسل:
  الكسلان قاعد مكتف يديه و مش بيشتغل و بيحسد الناجح … بينما الصح إن الواحد يعيش حياة معتدلة بين الراحة و التعب
• الأنانية:
  واحد عايز كل حاجة لنفسه و مش عايز حد يشاركه … بينما الواحد لو خلّى كل تعبه لمصلحته مش هيلحق يستمتع به أصلاً في حياته و يحرم نفسه من سعادة المشاركة و إنه يفرّح اللي حواليه
• الخيانة:
  زي حكاية أبشالوم مع داود، أبشالوم خان داود و الناس وقفت مع أبشالوم … رأي الناس متغير و مينفعش الواحد يحط ثقته فيه، الوحيد اللي ثابت هو ربنا

خطايا اللسان ومحبة المال

• ربنا عايز اللي يسمع كلامه و يصلي بهدوء و يقول كل كلمة من قلبه بتركيز و هدوء مش استعجال … ربنا ملك الملوك، لما نقف قدامه لازم يبقى الكلام بحساب و كلام مصحوب بعمل
• يعني لازم يكون عندنا مخافة الله و نحافظ على لساننا
• ماتخافش من الظلم في الأرض … حتى لو المسئولين لم يقيموا العدل، ربنا فوقهم يلاحظ و يُجري
• مفيش أحلى من إنك توزع من الخير اللي عندك و تشوف ناس يستفيدوا به … لو بركة ربنا مش موجودة في أي ثروة هتروح
• الإنسان اللي بيشتغل و ينجز بينام مرتاح لأن فيه ناس استفادت من شغله

سليمان وصل لنفس استنتاج إصحاح 2: مافيش أحسن من إن الواحد ينبسط بالحاجة اللي معاه و يشكر ربنا عليها … و يبقى هدفه يكون صالح قدام ربنا، ساعتها ربنا يعطيه الحكمة والسعادة … مايبقاش طمّاع و عينه في الدنيا

الشبع في بركة ربنا

• إن الواحد يبقى عني و عنده ثروة بس مالوش نِفس و مش قادر يفرح بها، ده شر عظيم و منتشر بين الناس
• نفس الكلام عن واحد عاش كتير بس مش مبسوط في حياته
• السر إن بركة ربنا هي اللي بتغني الحياة و تخلي لها طعم و سعادة
• الإنسان مايقدرش يخاصم من هو أقوى منه (ربنا) … المفروض يقبل كل حاجة من ربنا و يصلي إن ربنا يبارك
• لازم الواحد يثق في ربنا ضابط الكل صانع الخيرات للإنسان في حياته

نفس الاستنتاج تاني: مافيش أحسن من إن الواحد ينبسط بالحاجة اللي معاه و يشكر ربنا عليها … مايبقاش طمّاع و عينه في الدنيا لأنه عمره ما يعرف يشبع نفسه

الحكمة

من أول هنا يبدأ سليمان يتكلم بحكَم و أمثال (زي سفر الأمثال)

• ضع أمام عينيك إنك تتوب … ماتخليش اللي يشغلك هو إنك تنبسط و تحتفل على طول لأن ده مش هيخليك إنسان أحسن أو مستعد تقابل ربنا
• خليك حكيم و اقبل كل حاجة من يد ربنا بشكر (سواء يوم خير تفرح فيه أو يوم شر تتعلم منه)
• خليك معتدل … ماتبقاش بار في عين نفسك بأعمال ظاهرة بس، ولا تكون شرير و أعمالك وحشة
• متفضلش تحاول تعرف الناس بيقولوا إيه عليك لأنك أكيد هتلاقي ناس بتقول كلام مش هيعجبك
• ابعد عن الشهوة و الخطية لأنها فخ مميت مفيش خروج منه

طاعة الله

• ماتستعجلش في الصلاة والكلام مع ربنا، و متتصدمش لمّا تلاقي مشاكل أو تجارب في حياتك … ربنا ضابط الكل و بيدبّر كل الأمور للخير
• احفظ وصايا ربنا … و ساعتها لمّا التجربة تيجي هتقدر تثبت قدامها و تفهم قصد ربنا منها
• طول أناة الله على الشرير بيخلي الناس تحس إن ربنا مش بيعاقب وتمشي هي كمان في سكة الشر … لكن في الآخر فيه عقاب للشرير، بينما ربنا بيدّي بَرَكة و خير لأولاده
• الأبرار و الأشرار ممكن يبقى نصيبهم في الدنيا واحد من الغنى … لكن الأبرار معاهم بركة ربنا و بيعرفوا يفرحوا بعطاياه
• مهما كان ذكاء الإنسان أو حكمته البشرية مستحيل يفهم حكمة ربنا … الحل الوحيد إنه يحفظ وصايا ربنا، ساعتها ربنا يرشده

الموت هو مصير الجميع

• تحت الشمس، بيحصل خير و بيحصل شر للأبرار والأشرار، و في الآخر الكل بيموت … غريب قوي قلب الإنسان اللي متعلق بالأرض رغم كل ده
• الحكماء عارفين على الأرض إن فيه رجاء في التوبة، هو ده الموضوع اللي شاغل حياتهم
• كمان بيشكروا ربنا على الخير اللي بيديه لهم و يفرحوا به … و يهتموا بحفظ أعمالهم وأفكارهم طاهرة
• كمان هم أمناء في العمل اللي ربنا أعطاه لهم على الأرض، بيشتغلوا بأمانة وقوة عشان يكسبوا وَزناتهم
• كلمة ربنا لا تُسمَع إلا في الهدوء ... بينما في دوشة العالم حتى حكمة المسكين (السيد المسيح) اللي خلّصت العالم من الشيطان هي حكمة مُحتَقَرة

نصائح للحاكم و المحكوم

• أخطاء صغيرة بجهل ممكن تفسد إنسان حكيم … الخطايا الصغيرة تكبر و تحوّل الإنسان من حكيم لجاهل
• من حفر لأخيه حفرة يسقط هو فيها
• يا ويل الأرض اللي ملكها صغير بدون خبرة و رؤسائها كسلانين هدفهم إنهم ينبسطوا مش يشتغلوا … و يا بخت الأرض اللي ملكها و رؤسائها أمناء
• ماتشتمش أو تنمّ على المسئول لأن الكلام هيوصل له … خليك إيجابي و اشتغل كويس و إلجأ لربنا

الخير و الفرح

• خليك كريم واعمل خير كتير زي السحاب اللي مليان مطر … ربنا يكافئك على الخير ده
• خليك أمين في عملك في كل وقت وربنا هيبارك في شغلك
• افرح بالحياة اللي ربنا أعطاها لك، ماتبقاش في حالة قلق و غمّ … امشي حسب وصية ربنا اللي هيدين الكل، تكون مرتاح وفرحان