عدد الإصحاحات: 48
ظروف السفر:
- حزقيال كاهن .. كان في أورشليم وقت السبي التاني لبابل، وقتها المدينة كانت لسة ماتدمّرتش لكن بابل أخدت تاني مجموعة من المسبيين و منهم حزقيال (كان في الفوج اللي بعد دانيال بشوية)
- السفر بيبدأ 5 سنين بعد السبي ده .. حزقيال فترة نبوّته حوالي 30 سنة (من 600 ق.م. لحد 570 ق.م.)
- بدأت النبوة بحزقيال و هو جالس على نهر في بابل جنب المعسكر اليهودي .. كان عيد ميلاده ال30 (سن الخدمة للكهنة في أورشليم)
- حزقيال شاف سحابة من النار و جواها ال4 كائنات غير المتجسّدين .. و على أجنحتها عرش الله و عليه السيد المسيح في مجده
- المجد المرئي ده شبه حضور ربنا على جبل سيناء و شبه حضوره على تابوت العهد .. لكن المرة دي في بابل مش في أورشليم!
نتعلّم إيه من السفر:
- كعادة الأنبياء: رسالة توبة و استعداد لمجيء ربنا
مفاتيح فهم السفر:
- حزقيال تالت واحد في الأنبياء الكبار (إشعياء – إرميا – حزقيال – دانيال) .. عاصر إرميا و كان بينهم فارق في السن حوالي 50 سنة
- سفر حزقيال ممكن يكون مُبهَم و محيّر شوية .. بس لو قرأناه بتركيز هانشوف فيه محبة ربنا لشعبه
- حزقيال أكتر واحد شاف رؤى في الأنبياء .. عشان كده سفره بيُقارَن بسفر الرؤيا (اللي كتبه القديس يوحنا و هو منفي برضه)
- نفس المنظر بتاع ربنا في مجده اللي شافه القديس يوحنا في رؤيا 1، هو اللي شافه حزقيال (حزقيال 1 و حزقيال 10)
- حزقيال عشان كاهن، بنلاقي في السفر طقوس كتير و تفاصيل كتير