<h3 class="mt-5 mb-3 fw-bold">توبة جماعية</h3>
<span class="badge bg-success-soft">إصحاح 8</span>
<ul>
  <li class="mt-4">
	بعد دور الخادم العلماني (نحميا) في البناء و تنظيم المدينة و الناس، ييجي دور الخادم الروحاني (عزرا) في بناء الشعب روحياً و تعليمهم وصايا ربنا
  </li>
  <li class="mt-4">
	و الشعب جه لعزرا و طلب منه (يوم روحي) مركَّز كده على الشريعة (أسفار التوراة) اللي أُهمِلَت و ماكانوش عارفينها مدة طويلة ... و عزرا قعد يقرا للشعب كله من على المنبر طول النهار و الشعب في منتهى التركيز والإصغاء له و للّاويين اللي كانوا بيساعدوا في التفسير
  </li>
  <li class="mt-4">
	بعد كده اشتغلت نعمة ربنا في النفوس الجائعة له اللي كلها محبة و حماس .. ربنا حرّك قلبهم بتوبة صادقة بعد ما عرفوا قد إيه هم بعاد عن الوصية و مهملين فيها .. و إن ده سبب العار اللي كانوا فيه و السبي
  </li>
  <li class="mt-4">
	و جه دور الخادم الروحي الحكيم اللي حوّل دموع التوبة لمشاعر فرح و خلاص .. بدل مشاعر يأس و إحباط .. نحميا وعزرا شجّعوا الشعب و فرّحوهم
  </li>
  <li class="mt-4">
	و اكتشفوا أنهم في أول الشهر السابع (موعد الاحتفال بعيد المظال زي ما مكتوب في سفر اللاويين) .. فعيّدوا به عيداً روحياً لمدة 7 أيام كلها فرح و تركيز في كلمة ربنا
  </li>
</ul>
<p class="note note-primary mt-4">
	التوبة و دموعها الصادقة .. أكتر حاجة تفرّح ربنا و تفرّح التائب نفسه
</p>

<p class="alert alert-primary mt-4">
	يبان هنا في نحميا القائد صفة
	<span class="fw-bold">يضع لائحة</span>
	: منظومة واضحة و خطوات مكتوبة: مبادئ و هدف و خطة يتم مراجعتها باستمرار
	<br>
	المبادئ = الشريعة، والهدف = الرجوع إلى الله، و الخطة = قراءة و تفسير و تطبيق عملي (يعملوا العيد)
</p>

<hr class="my-3">

<h3 class="mt-5 mb-3 fw-bold">الاعتراف بالخطية</h3>
<span class="badge bg-success-soft">إصحاح 9</span>
<p>
	استمرّت النهضة الروحية للشعب و لم تنطفئ .. بعد أسبوعين تقريباً من عيد المظال، عملوا يوم روحي امتزج فيه التسبيح بالتوبة:
</p>
<ul>
  <li class="mt-4">
	<span class="indigo-text fw-bold">التسبيح</span>:
	<br>
	للّة الخالق العظيم .. اللي اختار إبراهيم و ميّزه و قدّسه، و وعده إن شعبه يرث أرض الموعد .. الوعد اللي تحقّق بعد آيات و عجائب كثيرة (شق البحر - المن - عمود السحاب وعمود النار …) .. و لمّا ربنا أعطاهم الأرض كان طويل الأناة جداً عليهم في فترة القضاة و الملوك .. و حتى لمّا حصل السبي، ربنا رتّب عودتهم برحمته
  </li>
  <li class="mt-4">
	<span class="indigo-text fw-bold">التوبة</span>:
	<br>
	على كل التذمُّر و العصيان على مدار تاريخهم من ساعة خروجهم من مصر (زي حادثة العجل الذهبي) مروراً بفترة القضاة اللي كان فيها ارتداد روحي مستمر و حتى فترة الملوك اللي في الآخر رفضوا ربنا تماماً
  </li>
</ul>
<p class="note note-primary mt-4">
	الإصحاح ده من أجمل إصحاحات التسبيح (و أطول صلاة في الكتاب المقدس بعد مزمور 119) .. ما أجمل استمرار النهضة الروحية و عدم انطفائها سريعاً (الأرض الجيدة مش الأرض اللي مالهاش أصل)
</p>

<p class="alert alert-primary mt-4">
	يبان هنا في نحميا القائد صفة
	<span class="fw-bold">كتابة التقرير و المتابعة</span>
	: من 3 أجزاء: إحصاء للتاريخ و عمل ربنا معهم - الوضع الحالي و مشاكله - خطة عملية و ميثاق المستقبل
	<br>
	حلو جداً إننا نعمل كده باستمرار مع قائدنا الحقيقي (الروح القدس) ثم أب الاعتراف
</p>

<hr class="my-3">

<h3 class="mt-5 mb-3 fw-bold">تجديد العهد</h3>
<span class="badge bg-success-soft">إصحاح 10</span>
<ul>
  <li class="mt-4">
	بعد التوبة و الاعتراف، ييجي العمل الإيجابي و البداية الجديدة .. الشعب اللي قلبه مع ربنا عمل
	<span class="indigo-text fw-bold">ميثاق مكتوب</span>
	بعهد جديد مع ربنا .. و وقّع على الميثاق ده نحميا و الكهنة و اللاويين و عظماء الشعب
  </li>
  <li class="mt-4">
	الميثاق ده كان فيه:
	<ul>
		<li class="mt-2">
			إنهم هيعيشوا شعب مقدس لربنا (شريعته اللي تحرّكهم مش اللي بيعمله باقي الشعوب)
		</li>
		<li class="mt-2">
			مش هيتزوّجوا من الشعوب الوثنية (ده على طول هو سبب فسادهم و زَيَغانهم)
		</li>
		<li class="mt-2">
			يلتزموا بالشريعة ناحية ربنا (تقديس السبت و العشور و البكور و التقدمات …)
		</li>
		<li class="mt-2">
			يلتزموا بالشريعة ناحية إخوتهم (إسقاط الديون و منع الربا و الالتزام بأعمال الرحمة ...)
		</li>
	</ul>
  </li>
</ul>
<p class="note note-primary mt-4">
	التوبة لازم بعدها على طول عمل (إيجابي) .. بداية جديدة حقيقية .. و لو توبة جماعية كمان بتكون عظيمة جداً لأن كل واحد بيفكّر أخوه و يشجّعه
</p>

<p class="alert alert-primary mt-4">
	يبان هنا في نحميا القائد صفة
	<span class="fw-bold">الالتزام</span>
	: أول واحد يلتزم باللوائح و يطبقها ... و الباقي يقتدي به
</p>

<hr class="my-3">

<h3 class="mt-5 mb-3 fw-bold">أورشليم الجديدة</h3>
<span class="badge bg-success-soft">إصحاح 11 و 12</span>
<ul>
  <li class="mt-4">
	<span class="indigo-text fw-bold">خطة تسكين أورشليم</span>:
	أورشليم كانت واسعة جداً على عدد سكّانها الحالي .. و طبعاً ده هيعمل خطر عليها و يقلّل الازدهار فيها .. بالتالي خطة نحميا إنه يسكّن فيها عظماء الشعب مع الكهنة و اللاويين و النثينيم (المرتلين) مع سبطَيّ يهوذا و بنيامين مع 10% من باقي الأسباط
  </li>
  <li class="mt-4">
	<span class="indigo-text fw-bold">تدشين السور</span>:
	و عملوا احتفال كبير جداً و يوم عيد لتدشين السور وسط ذبائح و تسابيح من الكل (شعب و كهنة ولاويين) .. تسبيح و فرح اتسمع على مسافة من المدينة (زي يوم أحد السعف)
  </li>
  <li class="mt-4">
	<span class="indigo-text fw-bold">لمسات أخيرة في النظام</span>:
	وضع نحميا اللمسات الأخيرة في تنظيم العبادة و المخازن و السور و التسبيح
  </li>
</ul>
<p class="note note-primary mt-4">
	تنظيم و تدبير الخدمة و الإداريات فيها حاجة مهمة و مش ثانوية .. لازم يكون فيه ترتيب و تدبير مش هرجلة (إلهنا إاه نظام)
</p>

<p class="alert alert-primary mt-4">
	يبان هنا في نحميا القائد صفة
	<span class="fw-bold">يحسن اختيار الفريق</span>
	: فريق متنوع و متكامل من رؤساء و وكلاء و ناس محبوبين و ناس يقدروا ينجزوا الشغل
	<br>
	1) نحميا نفسه كان صاحب الرؤية (visionary - macro manager)
	<br>
	2) الوكلاء أو المحافظين كانوا المهتمين بالتفاصيل (analyzers - micro managers)
	<br>
	3) قادة الكهنة و اللاويين و النثينيم كانوا مشهّلاتية و وكلاء عن الوكلاء ... ناس محبوبين (people-oriented)
	<br>
	4) الناس الجادين اللي يقدروا ينجزوا الشغل (achievers - task-oriented)
</p>

<p class="alert alert-primary mt-4">
	يبان هنا في نحميا القائد صفة
	<span class="fw-bold">صناعة القادة</span>
	: في موكب التدشين وقف في الآخر يتابعهم فرحان بهم بينما عزرا هو اللي يتقدمهم ... كان بيودعهم فرحان بهم بعد ما أعدهم في 4 خطوات
	<br>
	1) I do, You watch ... هم بيراقبوا و يشربوا منه بيعمل إيه (في الأول خالص هو اللي بدأ)
	<br>
	2) I do, You help ... هم بيساعدوه على قد ما يقدروا، بس هو اللي بيعمل الجزء الصعب (في بداية مرحلة البناء)
	<br>
	3) You do, I help ... هم اللي بيشتغلوا و هو بيساعدهم في الحاجات الصعبة و يشرف عليهم (تأمينهم من الأعداء)
	<br>
	4) You do, I watch ... هم بيشتغلوا و هو بيشوفهم و يدي توجيهات بس
</p>