القديس أندراوس مش من التلاميذ أو الرسل المشهورين عندنا ... زي القديس بطرس و القديس يوحنا و مرقس الرسول و بولس الرسول
لكن الحقيقة له دور مهم جداً أثناء حياته ... و حتى بعد استشهاده، هو شفيع دول كتير ... تعالوا نعرف ليه

دعوته و تلمذته

• القديس أندراوس هو أخو القديس بطرس الرسول ... كان تلميذ للقديس بوحنا المعمدان، منه سمع عن الرب يسوع ... فتبعه و عرف أنه المسيح المُنتظَر
• و طبعاً قال لأخوه بطرس ... و جه ربنا يسوع يعلّم في المركب بتاعة بطرس و أندراوس ... و حصلت معجزة صيد السمك
  فتبع بطرس و أندراوس ربنا يسوع من ساعتها بعد ما دعاهما يكونا صياديّ ناس
• و الحقيقة المرات اللي ذُكر فيها القديس أندراوس في الكتاب المقدس 3 مرات بس، أشهرهم المرة اللي فيها قدّم لربنا يسوع الولد اللي معاه ال5 خبزات و سمكتين في معجزة إشباع الجموع

كرازته

• القديس أندراوس بشّر في أماكن كتير في أوروبا و آسيا ... منهم مكانين إحنا واثقين فيهم 100%
• أول مكان هو روسيا ... هو يُعتبر الكارز الأول للمكان ده ... عشان كده اسم Andrei مشهور جداً في دول الاتحاد السوفيتي (زي روسيا و أوكرانيا و كرواتيا)
• تاني مكان هو اليونان ... لأن ده المكان اللي هو استشهد فيه

استشهاده

• استشهد القديس أندراوس في مدينة بتراس من مقاطعة أخائية في اليونان ... و تعيّد له الكنيسة يوم 4 كيهك ... و فيه حاجتين نقدر نقولهم عن الصليب ده
• أول حاجة إنه كان على حرف X ... لأن القديس أندراوس (زي القديس بطرس اللي صلب مُنكّس الراس) شاف إنه مايستاهلش يتصلب زي ربنا يسوع
• تاني حاجة: يقال إنه كان مربوط في الصليب بالحبال مش متثبت بالمسامير ... و ده يزود الآلام و مدّتها

علم اسكتلندا

• بعد وقت من استشهاده (حوالي سنة 400م)، حصل اضطهاد تاني ... فقديس يوناني اسمه ريجولوس كان عايز يحمي الذخائر (جسد القديس أندراوس) ... فهرب بيها على مركبة
  و وصلت بيه المركبة لاسكتلندا ... و من هنا بدأ شعب اسكتلندا يعرف القديس أندراوس
• بعد كده، سنة 832م كان فيه حرب بين اسكتلندا (بقيادة ملك اسمه Angus) و بين الساكسون (قبائل ألمانية)
  و الملك ده اتشفع بالقديس أندراوس
• شاف في السما سحب بيضا عاملة صليب على السما الزرقا ... اعتبر الملك ذلك علامة من ربنا، فتعهد يخلّي القديس أندراوس شفيع اسكتلندا في حال ربح المعركة
• و فعلاً كسب المعركة ... و غيّر علم اسكتلندا عشان يكون صليب القديس أندراوس على خلفية زرقاء ... و سمّوها Saltire
• و القديس أندراوس بقى شفيع اسكتلندا ... و بقى يوم 30 نوفمبر عيد قومي عندهم (St Andrew's Day)