الايقونة الكنسية هى عبارة عن رسم دقيق لقديس يُظهر هيبته او قداسته وعفته او شجاعته او وداعته وبساطته ... و حامل الأيقونات هو الحامل الخشبي اللي نلاقيه قدام الهيكل و عليه أيقونات .. الأيقونات دي ليها ترتيب معَيَّن و معنى معَيَّن الكنيسة رتّبته عشان نفضل شايفين القديسين قدامنا و احنا بنصلي و نحاول نكون شبههم ... تعالوا نشوف إيه ترتيب الصور في حامل الأيقونات.
في الجزء الفوقاني نلاقي صورة السيد المسيح الفادي على الصليب لأن دي أهم صورة و أكتر صورة توضح محبة ربنا لنا، و على يمينه العدرا مريم و على شماله يوحنا الجبيب (لأنهم هم بس اللي كانوا معاه وقت الصليب).
تحتها صورة العشاء الرباني اللي ربنا أسس فيها يوم خميس العهد سر الإفخارستيا (التناول) اللي به نقدر نتحد به لمّا نتناول جسده و دمه.
على يمين و شمال الصورة نلاقي التلاميذ ال 12 (أعمدة الكنيسة).
في حضن الآب في الهيكل نلاقي صورة المسيح الضابط الكل (الألف و الياء).
على يمين الهيكل (الناحية البحرية): العدرا مريم (الملكة عن يمين الملك) و على اليمين صورة البشارة (لما الملاك جبرائيل بشّر العدرا) و بعد كده الملاك ميخائيل (رئيس الملائكة و من أعلن قيامة السيد المسيح) ثم أيقونات الشهداء و القديسين.
على شمال الهيكل (الناحية القِبلِية): صورة القديس يوحنا المعمدان (و أحياناً قبلها صورة تانية للسيد المسيح) ثم أيقونات الشهداء و القديسين.
فيه 3 أبواب للهيكل: الوسطاني (الرئيسي أو الملوكي لأنه بيوصل للمذبح على طول) و اليمين و الشمال
قدام صورة كل قديس فيه قنديل منوّر (لأن نور ربنا أشرق في القديس ده)
طبعاً صورة ربنا مفيش قدامها قنديل لأن هو النور الحقيقي
من الحاحات الجميلة اللي بنشوفها في كنيستنا : بيض النعام بين الصور
البيض عموماً بيرمز للقيامة و الحياة الجديدة (لأن الكتكوت بيخرج لوحده من البيضة و تبدأ حياته)
المقصود من النعام لأن عندما تبيض النعامة تدفن بيضها وتبقي بعيدة عنه ولكن عينها عليه مثال لربنا يسوع لأنه تركنا في العالم ولكن عينه علينا دائماً ويرعانا
عايزين لمّا نشوف حامل الأيقونات نبص على القديسين العظماء اللي فيه و نطلب شفاعتهم فينا و نحاول نبقى زيهم