كل سنة و انتم طيبين .. شهر يناير مليان أعياد كتيرة .. عيد الميلاد و عيد الغطاس أشهر 2 لأننا بنصلّي القداس بالليل فدايماً بنفتكرهم .. و العيدين دول و غيرهم من الأعياد اسمهم أعياد سيّدية (لأنها خاصة بالسيد المسيح) .. تعالوا نشوف إيه الأعياد اللي الكنيسة سمّيتهم بالاسم ده.

الكنيسة رتبت 7 أعياد سيّدية كبيرة و 7 صغيرة. خلونا نبدأ بالكبيرة الأول لأنها أسهل و معروفة أكتر .. و هنمشي بترتيب حدوث الأعياد:

1. عيد البشارة (بشارة الملاك جبرائيل للعدرا بميلاد السيد المسيح) ... و ده بيبقى في أبريل قبل 9 شهور من عيد الميلاد (لأن الحبل بدأ من ساعة البشارة من ساعة ما العذرا قالت: "هوذا أنا أمة الرب، ليكن لي كقولك)

2. عيد الميلاد (عارفينه طبعاً، يوم 29 كيهك بعد صوم الميلاد)

3. عيد الغطاس (أو عيد الظهور الإلهي لما السيد المسيح اتعمّد من يوحنا، و ظهر الروح القدس عليه مثل حمامة و الآب قال من السماء: هذا هو ابني الحبيب الذي به سررت .. فبكده ظهر ال 3 أقانيم) .. و عيد الغطاس بيبقى فيه لقّان قبل رفع بخور باكر

4. حد السعف (أو حد الشعانين .. اليوم اللي فيه دخل السيد المسيح أورشليم كملك و استقبله الأطفال بالتسبيح و السعف في إيدهم) .. و حد الشعانين مميز بالدورة اللي فيها السعف و لحن إفلوجيمينوس و الألحان بالطريقة الفرايحي

5. عيد القيامة .. طبعاً أبهج عيد بعد الصوم الكبير و أسبوع الآلام تيجي فرحة القيامة لمّا ربنا داس الموت و غلبه إلى الأبد .. و عشان ده أهم عيد و ده أساس المسيحية، بتيجي فترة الخماسين اللي بنفضل نحتفل فيها بالقيامة .. و كل يوم حد في السنة بنحتفل بالقيامة

6. عيد الصعود .. بعد 40 يوم من القيامة ظهر فيها ربنا كذا مرة لتلاميذه أكمل عمله الفدائي و أسس الكنيسة .. صعد للسما بالجسد عشان يبعت لنا المعزّي الروح القدس

7. عيد حلول الروح القدس .. بعد 10 أيام من الصعود حلّ الروح القدس على التلاميذ و هم متجمعين في علّية مار مرقس مثل ألسنة نار .. و بدأوا يبشروا بالسيد .. و بدأت كنيسة العهد الجديد