كلمة "سر" في كنيستنا معناها إننا ناخد نعمة عظيمة غير منظورة (سرية) بواسطة مادة منظورة عن طريق حلول الروح القدس ... زي مثلاً سر التناول: المادة المنظورة هي الخبز و الخمر .. بيحل عليهم الروح القدس في القداس و يحوّلهم بطريقة سرية غير منظورة إلى جسد و دم حقيقيين لربنا يسوع المسيح فنقدر نتناول و ناخد النعمة دي.
و الأسرار السبعة هي:
1 – المعمودية: الولادة الجديدة من الماء و الروح ... بنتدفن مع المسيح و نقوم معه في حياة جديدة روحية من فوق
2 – الميرون: بعد المعمودية بنترشم بزيت الميرون 25 رشمة على كل منافذ الجسم لتثبيت الروح القدس فينا و تكريسنا لربنا (في العهد القديم كان بس الملوك و الكهنة و الأنبياء هم اللي يترشموا بالزيت)
أول سرين دول بيحصلوا مرة واحدة بس في العمر
3 – التوبة و الاعتراف: صحيح المعمودية مرة واحدة بس، لكن لازم باستمرار ننقّي نفسنا ... في السر ده الإنسان يتوب على الخطايا اللي عملها و بعد كده يعترف بها للكاهن (وكيل الله) فتنقل الخطايا لدم المسيح المسفوك على الصليب ... و ربنا أعطى السلطان ده للكهنة (من غفرتم خطاياهم تُغفر لهم ومن أمسكتم خطاياه أُمسكت"
4 – التناول: طبعاً ده أهم سر نواظب عليه باستمرار طول حياتنا ... نثبت في الله و الله فينا
الأسرار ال4 اللي فاتت دي ضرورية و لازمة لخلاص أي حد
5 – مسحة المرضى: في رسالة معلمنا يعقوب" أمريض احد بينكم؟ فليدع شيوخ الكنيسة فيصلوا عليه ويدهنوه بزيت باسم الرب وصلاة الإيمان تشفي المريض والرب يقيمه وان كان قد فعل خطية تغفر له" ... في السر ده الكاهن بيصلي على زيت نقي و يرشم به المريض
6 – الزيجة: بيحل الروح القدس و يجعل الزوج و الزوجة واحد
7 – سر الكهنوت: بوضع اليد (من الأسقف أو البطرك) يتحول الشخص المدعو للكهنوت (هذا السر لبعض الأشخاص المدعوبن فقط) من شخص عادى إلى شخص قادر على دعوة الروح القدس