سر الميرون (أو سر المسحة المقدسة) هو أحد أسرار كنيستنا السبعة. بعد ما بنتعمّد عل طول بنترشم بالميرون فيحلّ فينا الروح القدس.

في المعمودية كل واحد فينا اتدفن مع ربنا و قام معه إنسان جديد مولود من فوق (زي ما ربنا قال لنيقوديموس) و بعد المعمودية بنترشم بالميرون (36 رشمة على كل منافذ الجسم) عشان نثَبّت الإنسان الجديد ده و نكرّسه لربنا .. و فيه الروح القدس يحل فينا و يطهّرنا.

كلمة ميرون كلمة يونانية معناها دهن أو طيب أو رائحة عطرة .. و زيت الميرون بيتعمل من زيت الزيتون مع الأطياب و الحنوط التي كُفِّن بها السيد المسيح.

و الزيت عموماً في الكنيسة أحد رموز الروح القدس (زي في مثل العذارى الحكيمات و الجاهلات) .. و كان يُستَخدم في العهد القديم في مسح الكهنة والأنبياء والملوك (زي لمّا صموئيل مسح داود).

و سر المعمودية و الميرون هما مدخل لباقي أسرار الكنيسة (يعني ماينفعش حد يتناول غير لو كان متعمّد و مرشوم بالميرون .. عشان كدة أول مناولة للطفل بتكون بعد معموديته على طول).

تعالوا نفتكر دابماً إن إحنا اتكرّسنا لربنا و اتولدنا ولادة جديدة مختلفة .. و كل واحد فينا قيل له "أكسيوس" لما طلع من المعمودية (زي القديسين) .. نسمع كلام ربنا و مانزعّلش الروح القدس اللي فينا