من أبطال الإيمان في الكتاب المقدس: أبونا إبراهيم

أبونا إبراهيم كان ابن أخوه هو لوط ... عاشوا مع بعض لكن للأسف لوط قرّر يسيب أبونا إبراهيم و راح يعيش عند نهر الأردن في مدينة سدوم زي ما شفنا هنا

للأسف أهل مدينة سدوم كانوا أشرار جداً ... لوط اختار غلط لأنه بَصّ على جمال الأرض و ماعملش حساب إنه هايعيش و يربّي بناته في بيئة كلها عُنف و خطية و إباحية

ربنا عشان أبونا إبراهيم غالي جداً عنده و كأنه صديقه ... قال له إنه كقاضي عادل هايدمّر مدينة سدوم لأنه إداهم وقت كتير جداً يتوبوا، حصل العكس و زاد الشر جداً جيل بعد جيل و بقى مافيش أمل في توبة الناس دي بل كانوا مصدر شر للعالم كله

إبراهيم طبعاً قلبه اتقبض خوفاً على لوط .. و فِضِل يتكلّم مع ربنا و يتشفّع إنه ربنا مايهلكش المدينة لو لقى ناس قليلة كويسة ... و وصل إبراهيم لعدد 10 ... يعني في تخيّله إن لوط أكيد على الأقل مع زوجته و بنتيه و أزواجهم و كام واحد كمان

هنا تظهر عَظَمة الشفاعة ... شفاعة أبونا إبراهيم اللي كلمته غالية جداً عند ربنا

ربنا أرسل ملاكين لسدوم ... ماوجدوش ولا بار غير لوط بس ... لدرجة إن أهل المدينة كلهم كانوا عايزين يخطئوا مع الملاكين

الملاكين قالوا للوط إن ربنا هايدمّر المدينة .. و قالوا له يجمع عيلته و يسيب المدينة بسرعة

لوط حاول يقنع أزواج بناته لكنهم كانوا أشرار و مش عارفين ربنا، ماصدّقوهوش

لوط اتأخر و فِضِل يفكر و يحسب ... لكن من رحمة ربنا إن الملاكين استعجلوه و مسكوا إيديه هو و زوجته و بنتيه و أخرجوهم من المدينة ... بوصية واضحة: اهربوا من المكان ده كله بسرعة و إياكم تبصوا وراكم

و ربنا أمطر من السماء نار و أهلك سدوم و عمورة

زوجة لوط ماسمعتش كلام الملاكين و بصّت وراها على سدوم (يمكن كان نفسها ترجع للحياة المرتاحة) ... و في الحال أصبحت عمود ملح