عدد الإصحاحات: 27

ظروف السفر:

شفنا في سفر الخروج:
1. إن ربنا أخرج شعبه من أرض العبودية
2. دخل معهم في عهد على جبل سيناء من خلال لوحي الشريعة
3. الشعب زاغ و فسد و عبد العجل الذهبي
4. ربنا قبل شفاعة موسى فيهم و قال لموسى يعمل خيمة الاجتماع
5. بينتهي سفر الخروج (خروج 40 : 33 ل 36) إن حتى موسى (أعظم نبي في العهد القديم) مش قادر يدخل خيمة الاجتماع بعد ما اتعملت (من بهاء ربنا اللي ماليها)
  يعني بسبب خطية الشعب و عدم قداستهم، مش قادرين يدخلوا خيمة الاجتماع و يكونوا مع الله .. الشعب محتاج يتقدّس
بيبدأ سفر اللاويين إن ربنا بيكلّم موسى من خيمة الاجتماع : ربنا جوة و موسى برة
بيبدأ سفر العدد (بعد اللاويين) إن ربنا بيكلّم موسى في خيمة الاجتماع : ال2 جوة .. المشكلة اتحلّت من خلال السفر ده

نتعلّم إيه من السفر:

بيفهّمنا نعمة ربنا علينا: إنه أعطانا طريق القداسة اللي هاتخلّينا نلتقي به
بيعلّمنا حياة التدقيق .. صحيح في العهد الجديد ماعندناش الشريعة دي كلها، لكن هدف القداسة واضح

مفاتيح فهم السفر:

فكرة إن ربنا قدوس دي فكرة كبيرة جداً لو فكّرنا فيها .. الكلمة معناها: خاص / مميّز / بعيد .. عشان كنيستنا تفهّمنا المعنى ده رتّبت لنا في كل قداس جزء بيتكلّم عن قداسة ربنا
سفر اللاويين بيقدّم لنا الله اللي بيقدّس شعبه (ده هدف كل الوصايا) .. و كلمة التقديس دي اتكرّرت في السفر كتير جداً لأن دي نقطة اللقاء الوحيدة مع الله (زي ما نفهم في الوعظة دي)
مكان السفر كمان بيفهّمنا حاجة مهمة: بعد الخليقة و السقوط (سفر التكوين) و الفداء (سفر الخروج) بييجي سفر اللاويين عشان يقول لنا إن القداسة هي طريق التمتع بالخلاص
سفر اللاويين نفهمه بروح العهد الجديد في سفر العبرانيين (إزاي شريعة العهد القديم بتشاور على المسيح)