الشهيد العظيم مارجرجس

يوم 23 برمودة (1 مايو) بنحتفل باستشهاد أمير الشهداء ... مارجرجس


تعالوا نعرف سيرة القديس العظيم ده

من برنامج النهاردة (على قناة ME Sat) لأبونا انجيلوس جرجس

أهم النقاط في سيرة مارجرجس:

  • مارجرجس تحمل 7 سنين ألم و تعب
  • 3 مرات ظهر له السيد المسيح ... و قال له إنه أمير الشهداء
  • اتولد في مدينة اللد في كبادوكية من عيلة ملوك و ولاة متمسكين بالمسيحية في نص القرن التالت الميلادي
  • لما دقلديانوس بدأ الاضطهاد، خيّر أبوه بين ترك المسيحية أو الاستشهاد فاختار الاستشهاد
  • راحت العيلة لفلسطين (بلد الأم)
  • مارجرجس كان عظيم في الجيش الروماني و أخد ترقيات كتير
  • اترشح إنه يكون حاكم فلسطين لما الأمير بتاعها مات
  • أصدر دقلديانوس منشور باضطهاد المسيحيين و وزّعه في كل الولايات
  • مارجرجس لقى المنشور ده و قطّعه قدام الناس
  • داديانوس الملك قبض عليه و حاول يغريه عشان يسيب المسيح لكن طبعاً رفض
  • عذّبه 7 سنين بأشد أنواع العذاب ... لكن طبعاً ربنا كان بيقوّيه و أنقذه من الموت كذا مرة
  • داديانوس لم يؤمن بل قال إنه كان ساحر ... فجاب له ساحر المملكة عشان يسمّمه ... مارجرجس رشم الصليب على السم و شربه و مماتش
  • داديانوس قال إن السم يزيد و ربط إيديه ... رشم الصليب براسه و شرب السم و مماتش ... لدرجة إن الساحر آمن
  • طبعاً ناس كتير آمنت بسبب الكلام ده
  • كان من ضمنهم الملكة نفسها (ألكسندرا) اللي سمعته بيقرا مزامير و حسّت بسلام رائع و سألته عن الإيمان و آمنت و استشهدت بعد تعذيب من زوجها الملك (عشان كده بنحط صورتها ورا مارجرجس في الأيقونة)
  • مارجرجس كمان عمل معجزات كتير من ضمنها شفاء ابن أرملة فقيرة كان أعمى و أخرس و أصم
  • خدع الملك في مرة و قال له إنه خلاص هايبخّر للأوثان .. الملك فرح و عمل حفلة عظيمة و عزم ناس كتير ... و لما جه الوقت صرخ مارجرجس في الأصنام باسم الرب يسوع فانشقت الأرض و بلعت الأصنام
  • الملك بعد ما عمل كل التعذيب اللي يقدر عليه، قطع راسه
  • مارجرجس سريع الندهة لكل اللي بيتشفّع بيه ... و كوكب الصبح (زي ما بنقول في ذكصولوجية باكر)
  • معجزاته مالهاش عدد ... منها إن دقلديانوس عمي و اتجنن بعد ما ظهر له مارجرجس بعد ما قتله
  • مارجرجس أشهر شهيد في كل العالم (خصوصاً في انجلترا و روسيا و مصر)
  • فيه أكتر من قديس اتسمّوا على اسمه (زي مارجرجس الاسكندراني و مارجرجس المزاحم)


ترانيم عن مارجرجس

دير مارجرجس للراهبات في مصر القديمة بصراحة عمل 6 شرائط رائعة للترانيم المتنوعة (خصوصاً الشريط التالت) نقدر نلاقيها هنا ... احنا كمان هانركّز على الترانيم اللي بتتكلم عن مارجرجس و تحكي قصص جميلة عنه

ترنيمة إلهنا صاحب القدرة اللي بتركّز على معجزات مارجرجس اللي حصلت في كنيسته في اللد و محاولة دقلديانوس هدم أول كنيسة لمارجرجس (في مدينة اللد) و المعجزات اللي حصلت

ترنيمة تاريخ كنيستنا بيحكي اللي بتركّز على إيمان الملكة ألكسندرا و استشهادها و إزاي مارجرجس حطّم الأصنام بعد ما أوهم الملك إنه هيسجد لها

ترنيمة مارجرجس أمير الشهداء اللي بتركّز على شفائه لابن الأرملة الفقيرة و المعجزات اللي عملها في البيت و إيمانها و مشاركة الولد في معجزة سقوط الأوثان

ترنيمة مصر القديمة ياهناكي اللي بتركّز على وصول جسد مارجرجس لمصر القديمة

ترنيمة قصة إنقاذ ولد اللي بتركّز على معجزة عملها مارجرجس مع ولد صغير من أسرة بتتشفع بيه خطفوه البربر و أنقذه مارجرجس

صلاته تكون معنا أمين