ملخص الكتاب المقدس

ملخص الكتاب المقدس كله ... ربنا بيحبنا و عايزنا نكون أصحابه ... و إحنا بنقبل صداقة ربنا لما نسمع كلام ربنا يسوع و نمشي وراه

سؤال

هو الكتاب المقدس بيتكلم عن إيه؟

الإجابة

القصة الحقيقية لربنا و لينا ... و قد إيه ربنا بيحبنا


نشوف إيه؟
  • ربنا خلقنا على صورته و مثاله ... بيحبنا و عايزنا نستمتع بالعلاقة معاه و صداقته
  • بس إحنا غلطنا (لمّا آدم و حواء خالفوا وصية ربنا) ... و الخطية بوّظت كل حاجة
  • بس من محبة ربنا لينا، بعت لنا ابنه الوحيد ربنا يسوع المسيح ... عشان يفدينا و يحرّرنا من الخطية ... و يصالحنا مع ربنا تاني
  • و بعد ما ربنا يسوع مات على الصليب عشان يدفع تمن خطايانا ... قام بعد 3 أيام و غلب الموت ... و صعد للسما
  • لكن ماسبناش لوحدنا ... بعت لنا الروح القدس اللي بناخده جوانا في سر الميرون بعد المعمودية ... الروح القدس هو اللي بيساعدنا نعيش زي ربنا يسوع
  • و معانا كلمة ربنا (الكتاب المقدس) ... لمّا نقراه نفهم خطة ربنا العظيمة لينا و قد إيه هو بيحبنا
  • و لمّا نؤمن باللي عمله ربنا يسوع ... و نمشي وراه ... هنرجع تاني أصحاب لربنا
  • ربنا بيحب كل الناس ... كلهم من غير استثناء ... بما فيهم انت طبعاً ... و انت تقدر تبقى جزء من عيلة ربنا لما تمشي ورا ربنا يسوع و تسمع كلامه
  • المدرسة بنروحها عشان نتعلّم
  • و الكتاب المقدس هو مدرستنا ... اللي بتعلّمنا الحقيقة عن ربنا
  • لمّا أقراه باعرف قد إيه ربنا بيحبني ... و إزاي أعيش زي ربنا يسوع
  • المعلقة بنستخدمها عشان نؤكّل نفسنا
  • و كلمة ربنا هي أكل روحنا و قلبنا ... لازم نقراها باستمرار زي ما بناكل باستمرار
  • خصوصاً لما نبقى جعانين حب أو فرح ... الإنجيل أحلى و أنضف أكل
  • مفتاح النور احنا بنستخدمه عشان نفتح أو نقفل النور
  • و الإنجيل هو المفتاح ده لنور قلبنا ... لمّا نقرا الإنجيل قلبنا ينوّر و يفهم ربنا ... و لو مقاريناهوش ... قلبنا هيضلّم

المشكلة

ساعات بنزعل و نفتكر إن ماحدش بيحبنا و عايز يبقى صاحبنا 😟

الحل

ربنا دايماً عايز يبقى صاحبنا
هي دي الحقيقة اللي بيعلمها لنا الإنجيل
و إحنا نقبل كده بإننا نصدق ربنا يسوع و نمشي على كلامه 😉

الزمن

كل زمان

المكان

كل مكان

الشخصيات
  • ربنا
  • كل واحد فينا
تعالى نحفظ

كل الكتاب (الكتاب المقدس) هو موحَى به من الله، و نافع للتعليم و التوبيخ، للتقويم و التأديب الذي في البِر (تيموثاوس التانية 3 : 16)

تعالى نصلّي

يا رب ... أنا مؤمن إن ربنا يسوع مات على الصليب عشان بدفع تمن غلطاتي أنا ... أؤمن إنه قام في اليوم التالت و غلب الموت ... و بكده بقيت أنا حُر
ساعدني يا رب أعرفك أكتر و أعيش زي ربنا يسوع
ساعدني أحب الإنجيل عشان أعرفك و أعرف محبتك لي
أمين

تعالى نفتكر

ربنا بيحب كل واحد فينا ... و عايز يبقى صاحب كل واحد فينا ... و الكتاب المقدس هو اللي بينفعنا و يقول لنا الحقيقة عن ربنا

المصدر:

Bible App for Kids

  • تقدر تعمل account على الموقع من هنا و تحتفظ بالكارتون على صفحة ال account بتاعك
  • تقدر تعمل share للصفحة دي مع أصحابك و كنيستك عشان نستفيد بالكارتون ده مع بعض
  • تقدر تعمل download للصفحة دي على الجهاز بتاعك

كلّمنا

🤔 إيه رأيك في الكارتون ده و طريقة الصفحة دي؟ هل سهّل عليك إنك تتابع و تفتكر الجزء ده و تتعلّم منه؟
🥰 إيه اللي عاجبك و حابب نركّز عليه أكتر؟
💡 إيه اللي مش عاجبك و حاسس إننا لازم نعمله أحسن؟ إزاي نطور و نحسن نفسنا؟
أي تعليق أو اقتراح هيفيدنا جداً