صوم الرسل

صوم الرسل هو أول و أقدم صوم صامته الكنيسة ... لمّا كان الرسل مجتمعين في علية مارمرقس في حالة صلاة و صوم مستمر قبل بداية خدمتهم .. زي ما علّمنا ربنا لمّا بدأ خدمته بصوم 40 يوم (الصوم الكبير) ... و زي ما قال ربنا: " حينما يُرفع عنهم العريس فحينئذ يصومون" (لوقا 5 : 35).

و فعلاً ماينفعش نصوم صوم العهد الجديد اللي عايزه ربنا (اللي كلّه محبة و صلاة و خدمة) غير لمّا نذوق و نفهم فرحة القيامة و مدى محبة ربنا لينا.

و صوم الرسل الطابع اللي يميّزه هو الخدمة و الصلاة من أحل الكنيسة (غير مثلاً الصوم الكبير اللي الطابع بتاعه التوبة الشخصية و عمل الرحمة).

و دايماً صوم الرسل بيبدأ بعد عيد حلول الروح القدس و بينتهي يوم 12 يوليو بعيد استشهاد الرسولين العظيمين بطرس و بولس.

يا ريت كلّنا نشترك و ناخد بركة الصوم ده بمعناه الروحي ... معنى المحبّة لربنا و لكل الناس و الخدمة في الكنيسة و في أي مجال نقدر عليه.