اللحن بيقدّم لنا السيد المسيح كرئيس كهنة العهد الجديد ... ممسوح من الله الآب على طقس ملكي صادق (طقس ذبيحة الخُبز و الخمر اللي هم جسده و دمه اللي قدّمهم للّه الآب على الصليب كذبيحة مقبولة فداء للعالم كلّه) ... و صارت دي هي الذبيحة الوحيدة في العهد الجديد، يقدّمها وكلاء الله (الكهنة و الأساقفة) كل يوم على المذبح

اللحن متقسّم 4 أجزاء:

1. واحد هو الآب القدوس : واحد هو الابن القدوس : واحد هو الروح القدس : أمين
   اللحن بيبدأ بعقيدة أساسية، هي المساواة في الجوهر (اللاهوت) بين الآب و الابن و الروح القدس


2. معك الرياسة ... على طقس ملشي صادق
   بعد كده اللحن بيبّن لنا من النبوّات إزاي ربنا يسوع هو رئيس كهنة العهد الجديد ... من مزمور 110 (قال الرب لربّي) ... و المزمور ده رتّبته لنا الكنيسة في وقت الساعة التاسعة (وقت موت المسيح بالجسد على الصليب، لأن هو ده الوقت اللي اتحقّقت فيه النبوة دي، بتقديم السيد المسيح جسده و دمه ذبيحة مقبولة على الصليب، على طقس ملكي صادق
   و المعنى ده استفاض القديس بولس الرسول في شرحه في رسالته للعبرانيين


3. يا أبانا القديس رئيس الكهنة ... مبارك الرب الإله إلى الأبد أمين
   الجزء اللي بعد كده، بنطلب فيه من ربنا يحفظ لنا رعاتنا وكلاؤه (بقيادة بطركنا و أسقفنا) ... و يثبّتهم و يملا كنيسته بالسلام و يغفر لنا خطايانا


4. يا جميع الامم باركوا الرب ... حق الرب يدوم إلى الأبد : أمين هلليلويا
   الجزء الأخير هو جزء تسبيح (مزمور 117 اللي بنقراه في صلاة الغروب) ... بنبارك ربنا على رحمته الدائمة إلى الأبد

و بالتالي و أبونا بيقدّم الحمل، هو بيمثّل السيد المسيح (رئيس الكهنة) اللي قدّم ذاته كحَمَل بلا عيب