المكابيين - الجزء التاني (إصحاح 8 ل 16)

يهوذا يلجأ للرومان

• (آية 1 ل 16) صعود الرومان:
  • طبعاً أورشليم كانت في سلام نسبي لكن لسة ألكيموس و بكيديس كانوا عايشين و بيخطّطوا ضدها
  • في الوقت بدأ صعود الرومان ... دولة قوية أخضعت فرنسا و أسبانيا و شعوب تانية
  • و حتى اليونانيون لمّا حاولوا يحاربوهم غلبهم الرومان، و أصبحت روما منافس قوي جداً لليونان
  • كمان كان عندهم حكم جماعي (مجلس شورى) و كانوا أوفياء للشعوب اللي ساندتهم (زي مصر) ... و الشعوب اللي غلبوها أعطوها الحرية الدينية
• (آية 17 ل 32) يهوذا يلجأ للرومان:
  • يهوذا اقتنع بالتعاون مع الرومان عشان يوقّف هجمات الإمبراطور ديمتريوس عليه و يعيش في سلام هو و شعبه
  طبعاً ده عكس وصية متثيا قبل ما يموت (قال ليهوذا مايثقش في أي إنسان) و عكس وصية عدم الاتّكال على ذراع بشر ... لكن كان فيه حجة إن العالم بيتغيّر و محتاجين نعمل صداقات مع الشعوب الأخرى و نعيش في أمان (زي ما حزقيا عمل لمّا حاول يتحالف مع مصر و بعدها بابل للدفاع ضد أشور)
  • يهوذا أرسل 2 رسل لروما يسألهم معاهدة مشتركة للحماية من هجمات اليونان
  • و الرومان وافقوا على المعاهدة و هدّدوا ديمتريوس و أوصوه بعدم الهجوم على اليهود تاني

استشهاد يهوذا

• (آية 1 ل 22) هجوم ديمتريوس و استشهاد يهوذا:
  • بعد هزيمة جيش نكانور، رجع ديمتريوس أرسل جيش قوي مع بكيديس و ألكيموس (20 ألف راجل و 8 آلاف فارس) رايحين أورشليم
  • يهوذا جمع جيشه (3 آلاف) و راحوا يدافعوا عن أورشليم
  • للأسف جيش يهوذا خاف من كثرة عدد جيش بكيديس و تراجع منهم عدد كبير قبل ما يبدأ القتال (مافضلش من ال3 آلاف غير 800 بس!)
  • و حتى ال800 دول كانوا خايفين ... يهوذا فهم إن ربنا كان واقف معاهم ضد جيوش أقوى و أكتر بكتير لكن المرة دي هم ضعفوا لأنهم توكّلوا على ذراع بشر (الرومان) ... لكن يهوذا قرّر بيأس إنه يحارب الحرب الأخيرة
  • يهوذا و رجاله حاربوا بشجاعة ... لكن يهوذا استشهد في الحرب دي ... و جيشه هرب لمّا هو مات
• (آية 23 ل 53) اضطهاد المكابيين و قيادة يوناثان:
  • بعد كده ركّز ديمتريوس على مطاردة و قتل عائلة يهوذا و أصدقائه
  • المكابيين اختاروا يوناثان أخو يهوذا قائد ليهم
  • بكيديس عرف و راح يحاربهم
  • انتصر يوناثان و جيشه و قدروا يهربوا بعد ما قتلوا جزء من جيشه
  • و حاولوا يحصّنوا مدن يهوذا و يكمّلوا مقاومة
• (آية 54 ل 57) نهاية ألكيموس:
  • طبعاً جيش بكيديس كان بيتقدّم، و ألكيموس أمر بالبدء في هدم الهيكل
  • لكن ربنا ضربه بمرض الشلل و مات
  • و بكيديس رجع للملك، و هدأت البلاد سنتين
• (آية 58 ل 73) حرب ثم سلام مع بكيديس:
  • للأسف كالعادة راح ناس يهود منافقين تاني شجّعوا بكيديس إنه ييجي يحارب المكابيين
  • لكن المكابيين قدروا يعرفوا الخطة، و بفضل شجاعة يوناثان و سمعان قدروا ينتصروا على جيش بكيديس و ألحقوا به خسائر كثيرة
  • بكيديس غضب جداً على المنافقين اللي حرّضوه على الحرب و قتل منهم كتير
  • يوناثان طلب الصلح و نهاية الحرب مع بكيديس
  • و بكيديس وافق و حلف له إنه مش هايرجع يحاربه تاني، و ردّ له بعض الأسرى ... و حكم يوناثان إسرائيل و عاشت الأرض في سلام حوالي 7 سنين

حروب على مُلك العالم

• (آية 1 ل 14) ابن أنطيوخس يحارب ديمتريوس:
  • ابن الملك أنطيوخس (اسمه الإسكندر) لمّا كبر، قدر يستميل إليه البطالمة و بقى قائد قوي و ملك على البطالمة (الجزء الجنوبي) ... و جمع جيشه عشان يحارب ديمتريوس و ينتقم منه و يستردّ مُلك السلوقيين لعائلته تاني
  • ديمتريوس خاف إن الإسكندر يتحالف مع المكابيين، فهادن المكابيين ... و سمح لهم بتطهير القلعة اللي كانت في أورشليم و ببناء سور و تحصين المدينة و تجميع جيش لهم
• (آية 15 ل 47) ديمتريوس و الإسكندر يتملّقون المكابيين:
  • الإسكندر فعلاً لمّا سمع ببطولة المكاببين، أرسل رسالة سلام و هدايا ليوناثان مع وعد إنه هايفضل الكاهن الأعظم و الحاكم لو مَلَك الإسكندر ... و يوناثان قبل الهدية
  • لمّا سمع ديمتريوس أسرع برسالة مشابهة ليوناثان و وعده فيها بالحرية الدينية و الإعفاء من الجزية و مناصب مهمة لليهود في المملكة و هدايا كتير جداً عظيمة
  • يوناثان و الشعب ماصدّقوش ديمتريوس نظراً لماضيه السيء المليان بالغدر معاهم ... و وقفوا في صف الإسكندر
• (آية 48 ل 66) الإسكندر ينتصر على ديمتريوس:
  • الإسكندر قدر ينتصر على ديمتريوس و يقتله ... و استردّ مُلك أبيه أنطيوخس
  • بعدها تحالف مع حاكم مصر
  • الإسكندر كان أمين في وعده مع يوناثان ... أرسل إليه و أكرمه و لم يستمع لوشاية المنافقين ضده
  • و حكم يوناثان في أورشليم و عاشت الأرض في سلام لمدة 5 سنين
• (آية 67 ل 89) ديمتريوس الابن يحارب الإسكندر:
  • جه ابن ديمتريوس (كان اسمه ديمتريوس برضه) يحارب الإسكندر و يحاول استرداد المُلك
  • و استعان بأبلونيوس قائد جيش أنطيوخس السابق (إصحاح 3) ... أبلونيوس أرسل ليوناثان يهدّده
  • يوناثان اتنرفز و راح يحاربه ب 10 آلاف مع سمعان أخيه ... و قدر ينتصر عليه رغم تحالف بعض أقطاب الفلسطينيين مع أبلونيوس (زي أشدود و أشقلون)
  • طبعاً الإسكندر انبسط جداً و ارتفع شأن يوناثان عنده أكتر و أجزل له العطايا

بين الحرب و السلام

• (آية 1 ل 37) بطليموس ينقلب على الإسكندر:
  • رغم إن كان فيه تحالف بين ملك مصر (بطليموس) و بين الإسكندر (الإسكندر كان جوز بنته) إلا إنه مع ظهور ديمتريوس طمع بطليموس و جمع جيوش عشان يحارب الإسكندر و يسطو على مملكته
  • راح كأنه في زيارة عادية ... و صل سوريا و إسرائيل و قابل يوناثان اللي ودّعه و رجع تاني أورشليم
  • بطليموس بعد ما تفقّد مملكة الإسكندر أرسل لديمتريوس يطلب التحالف معه ضد الإسكندر ... و أخد بنته زوجة الإسكندر و أعطاها لديمتريوس ... و ملّك نفسه على آسيا
  • الإسكندر ساعتها كان بيواجه حرب داخلية و لم يستطع الثبات أمام بطليموس
  • بطليموس انتصر ... مات الإسكندر و ملك مكانه ديمتريوس ... و بعدها كان فيه صُلح بين يوناثان و ديمتريوس
• (آية 38 ل 53) انقلاب على ديمتريوس و إنقاذ يوناثان له:
  • ديمتريوس لمّا الدنيا أصبحت في سلام سرّح جيشه ... طبعاً ده أغضب الجيش جداً لأن السلطة و الفلوس راحت منهم ... و ده أدّى لحدوث بوادر تحالفات و انقلاب عليه
  • في الوقت ده أرسل له يوناثان إنه يخرّج باقي الجنود من القلعة في أورشليم و يطهّرها تماماّ ... ديمتريوس وافق بشرط مساعدة يوناثان له ضد الانقلاب ... و يوناثان وافق و أرسل له رجال إلى أنطاكية
  • للأسف الغضب من الشعب على ديمتريوس كان عظيم ... لكن اليهود ساندوه ضد شعب و جيش أنطاكية ببأس عظيم
  • شعب أنطاكية لمّا لقى كده، ترجوا الملك يخلّصهم من اليهود ... و عملوا صُلح و هدأت الأحوال
  • للأسف ديمتريوس لمّا الدنيا استقّرت تاني لم يفِ بوعده ليوناثان
• (آية 54 ل 74) أنطيوخس التالت يملك:
  • حصل انقلاب ناجح المرة دي على ديمتريوس بقيادة قائد الجيش تريفون و أنطيوخس ابن الإسكندر
  • الملك الجديد سالم يوناثان و عظّمه
  • و يوناثان قدر يقمع ثورات الشعوب المحيطة (فلسطين و سوريا) و سيطر على أورشليم

تكرار خطأ التحالف مع روما

• (آية 1 ل 23) يوناثان يكرّر خطأ يهوذا:
  • نفس غلطة يهوذا اللي شفناها في إصحاح 8 بيكرّرها يوناثان ... بيشوف في الرومان حليف قوي يحميهم من الانقلابات الكتير المتوالية اللي بيشهدها العالم ... رغم إن ربنا كان هو اللي حاميهم و محافظ عليهم وسط كل ده
  • يوناثان أرسل رسالة لتجديد التحالف و الإخاء مع الرومان
  • و الرومان وافقوا
• (آية 24 ل 38) ديمتريوس يحارب مرة أخرى:
  • ديمتريوس رجع يحارب إسرائيل تاني بجيش كبير ... لكن يوناثان كان مستعد له و قدر يدفعه
  • و قرّر يوناثان و سمعان أخيه تحصين أورشليم و رفع أسوارها و بناء سور حول القلعة و محاصرتها
• (آية 39 ل 54) أسر يوناثان:
  • سنة 142 ق.م. تريفون قائد الجيش قرّر ينقلب على أنطيوخس الملك ... و شاف إنه يقتل يوناثان حتى لا ينجد الملك
  • يوناثان عرف و خرج للقاءه بجيش عظيم جداً
  • تريفون قرّر استعمال الحيلة: قال ليوناثان إنه مش جي يحارب بل جي يسلّمه مدينة (بطلمايس) اللي هي عكّا ... و للأسف يوناثان صدّق و رجّع معظم جيشه
  • تريفون قدر يستدرج يوناثان ل(بطلمايس) ... و قفل عليه المدينة و قدر يقبض عليه هو الرجال اللي معه
  • كان عايز كمان يقضي على باقي الجيش الكبير، لكن الجيش قدر يتماسك حتى في غياب قائده

سمعان يتولى القيادة

• (آية 1 ل 11) سمعان يحمّس الشعب:
  • تريفون قرّر يجمع جيش عظيم و ينزل يقضي على أورشليم
  • طبعاً شعب اليهود كانوا خايفين جداً و بلا قائد
  • سمعان شجّعهم و قال إنه هايكمّل مسيرة عائلته و إخوته حتى إلى الاستشهاد
  • و تحمّس الشعب و حصّنوا أورشليم
• (آية 12 ل 30) تريفون يخدع سمعان:
  • تريفون زي ما خدع يوناثان للأسف خدع سمعان ... قال له إنه محتجز يوناثان عشان له دين عند الملك ... و طلب من سمعان إرسال الدين ده (100 قنطار فضة) مع ولاد يوناثان ال2
  • للأسف سمعان كان حاسس إن تريفون بيخدعه لكن نفّذ الكلام
  • تريفون غدر و تقدّم على أورشليم لكن ماقدرش يدخلها بسبب تكاثر الثلج ... قتل يوناثان و رجع
  • سمعان أخد جثة يوناثان و دفنه في مقبرتهم في مودين
• (آية 31 ل 42) سلام في بداية عهد سمعان:
  • تريفون كمان خدع في الآخر أنطيوخس و قتله و مَلَك مكانه
  • سمعان حصّن أورشليم ... و أرسل لديمتريوس يطلب منه إعفاء اليهود من الجزية لأنهم خسروا كتير جداً بسبب خداع تريفون (زي ما قرأنا في الإصحاح اللي فات)
  • و ديمتريوس وافق ... و حصل سلام لفترة من الوقت
• (آية 43 ل 54) تطهير داخلي:
  • سمعان بدأ يهجم على أعداء إسرائيل من شعوب المحيطة (زي غزة) ... سمعان كان رحيم معاهم و لم يقتلهم لكن أخرجهم من المدينة و أسكن فيها يهود أتقياء
  • و أخيراً نجح حصار القلعة ... و خرج من فيها و طهّرها سمعان في احتفال كبير
  • و خلّى يوحنا ابنه يبقى قائد الجيش

هدوء و سلام في الأرض

• (آية 1 ل 15) هدوء و سلام أيام سمعان:
  • ديمتريوس استنجد بمادي و فارس (المملكتين اللي احتلّتهم اليونان أيام الإسكندر الأكبر) عشان يساعدوه يحارب تريفون و يرجّع مُلكُه
  • لكن ملك فارس قبض عليه و سَجَنه ... و بكده استقرّت الأرض و خلت من الحروب لفترة
  • و عاشت يهوذا في رخاء و قوة ... ممتدّة التخوم و فيها خير و تمسُّك بالشريعة
• (آية 16 ل 49) تجديد الإخاء مع الرومان:
  • الرومان لمّا سمعوا بموت يوناثان أرسلوا لسمعان يواسوه و يؤكدوا على استمرار الإخاء و التحالف مع اليهود
  • و سمعان ردّ برسالة و هدية لتجديد الإخاء
  • و شعب اليهود كله كان طاير من الفرحة بحكم سمعان و فترة السلام و الاقتراب من ربنا دي بعد فترة طويلة جداً من الحروب

الحرب العالمية تعود من جديد

• (آية 1 ل 14) أنطيوخس ابن ديمتريوس يحاصر تريفون:
  • بعد ما انتهى خطر ديمتريوس، ظهر ابنه أنطيوخس ... اللي جهّز جيش كبير و نوى يستردّ حُكم أبيه من تريفون
  • أرسل رسالة لسمعان يعده فيها بالحرية و بعطايا عظيمة في حالة مُلكه
  • بعدها هجم على تريفون اللي جيشه كان فيه كتير منه بيناصر أنطيوخس ... و حاصره في مدينة دورا
• (آية 15 ل 31) غدر أنطيوخس:
  • الرومان أرسلوا رسائل لكل الملوك يعلنون فيها تحالفهم مع اليهود
  • في الوقت ده أرسل سمعان جنود و هدايا لأنطيوخس أثناء حصاره لتريفون
  • أنطيوخس كان غدّار و رجع في كلامه ... أرسل واحد من قوّاده اسمه أتينوبيوس يهدّده بالقتال في حال عدم تسليم بعض المدن لهم مع جزية كبيرة
• (آية 32 ل 41) أنطيوخس يحارب سمعان:
  • طبعاً سمعان رفض تسليم المدن لأنها من نصيب إسرائيل و أرضهم أصلاً ... و الجزية رفض المبالغة فيها
  • الملك على طول أخد قرار الحرب ... وكّل قائد اسمه كندباوس بالمهمة دي و خطة إنه يستولي على قدرون القريبة من أورشليم و منها يحارب سمعان ... و وصل قدرون فعلاً
  • في الوقت ده كان تريفون هرب من الحصار، فالملك تعقّبه

الغدر و موت سمعان

• (آية 1 ل 10) سمعان يحمّس ابنيه لقيادة القتال:
  • سمعان لمّا عرف من يوحنا ابنه بحركة كندباوس، وكّل يوحنا و يهوذا (ابنيه) باستكمال مسيرة الدفاع عن اليهود لأنه كان شاخ و كبر في السن
  • حمّسهم و فكّرهم إن ربنا نَصَرهم قبل كده مرات كتيرة رغم قلة عددهم
  • و انتخب 20 ألف مقاتل و راحوا يقابلوا جيش كندباوس .. و يوحنا قاد القتال بشجاعة
  • و قدروا فعلاً يدفعوا جيش كندباوس و يرجّعوهم شوية عن أورشليم
• (آية 11 ل 24) غدر بطلماوس و نهاية سمعان:
  • للأسف زوج ابنة سمعان طمع في الحكم و نوى على قتل سمعان و ولديه
  • رتّب مأدبة لسمعان و بنيه و قتلهم غدراً ... كان سمعان و ولديه يهوذا و متثيا (يوحنا مكانش موجود)
  • و بسرعة كتب بطلماوس للملك عشان يكافئه و أرسل رجال لقتل يوحنا و رجال للسيطرة على أورشليم
  • يوحنا عرف و قدر يتخلّص من الرجال دول ... و أكمل مسيرة عائلته في القتال و الدفاع عن اليهود