الحكمة

• روح الحكمة (الروح القدس) مش ممكن يسكن واحد بيحب الخطية … لازم نطهر أحشائنا عشان روح الحكمة يسكن فينا
• الروح القدس مالئ المسكونة كلها من البدء و يعرف خبايا كل إنسان و أفكاره و يبكّته على الشر … و في الدينونة كل واحد يُجازَى حسب أعماله
• و الشر مش صناعة الله الذي خلق كل شيء (حسن جداً) بل الموت دخل العالم باختيار الإنسان إنه يعصى الله

لكن المنافقين هم استدعوا الموت بأيديهم وأقوالهم (حكمة 1 : 16) أخدها القديس غريغوريوس في القداس: أنا اختطفت لي قضية الموت

• بعد السقوط و دخول الموت، بدأ يكون فيه أولاد الله المتمسكين به و عايزين يرجعوا يطيعوه … و أغلبية من الأشرار اللي شعارهم (لنأكل ونشرب لأننا غداً نموت)
• و طبعاً تحت هذا الشعار، قيم الرحمة والمحبة والحق بتضيع و يكون البقاء للأقوى
• و يصبح أولاد ربنا اللي ينادون بوصاياه مبكّتين للخطاة لأنهم مختلفين عنهم و نور لعالم مظلم لا يريد النور … بالتالي يرفضهم العالم و يضطهدهم

لكن بحسد إبليس دخل الموت إلى العالم (حكمة 2 : 24) أخدها القديس باسيليوس في القداس: و الموت الذي دخل إلى العالم بحسد إبليس

• أولاد ربنا سواء تعرضوا لأحزان أو ضيقات أو اضطهادات في حياتهم (بسماح من ربنا)، لو تحملوها و هم ثابتين و مليانان رجاء في ربنا: رجائهم لن يخزى، الحياة الأبدية في ملكوت السموات … زي الذهب الذي تنقى بالنار أو ذبيحة المحرقة المقبولة
• بينما الأشرار اللي رفضوا ربنا مهما كان عندهم مال أو سلطة أو قوة على الأرض، مش هيبقوا مبسوطين بها و كمان ينالوا عقاباً أبدياً على خطاياهم
• و الناس اللي استطاعوا يحافظوا على عفتهم في عالم فيه شر و زنا (زي الرهبان)، لهم مكافأة عند ربنا حتى لو إزدرى بهم الناس و حتى لو لم يكن لهم أولاد بالجسد
• و الناس الأخيار اللي ربنا بيختار إنهم ينتقلوا بدري، الموت هنا رحمة لهم من الشر اللي في العالم و تنتظرهم المكافأة من ربنا
• بينما الأشرار في اليوم الأخير هيندموا إنهم بعدوا عن سكة ربنا … لكن الفرصة هتكون انتهت

هنا واضح إن فكر الحياة الأبدية و الدينونة موجود من العهد القديم

• الحكمة و العدل و التواضع أهم صفات الملوك لأن ربنا هيحاسبهم حساب دقيق على السلطة اللي معاهم: عملوا بها إيه
• و الحكمة تيجي لكل من يطلبها من قلبه … يطلب كلمة ربنا و يعمل بها

سليمان هنا بيتكلم عن خبرة شخصية لواحد عادي طلب الحكمة من كل قلبه و نالها

• و سليمان عمل كده: طلب الحكمة من ربنا (مصدر الحكمة) فوق كل شيء (غنى أو كرامة أو صحة) فنالها مع كل الخير
• و حكمة سليمان شملت الفطنة (يعرف يتصرف في المواقف المختلفة) - فهم أسرار الكون والمخلوقات و الفلك - الفصاحة (التعبير عن نفسه)
• و ينتقل للكلام عن أقنوم الحكمة (ربنا يسوع): خالق كل شيء، النور الأزلي، الابن الوحيد، محب البشر، البسيط

الحكمة السمائية اللي من الروح القدس دي مافيهاش غيرة أو حسد … عشان كده القديسين عمرهم ما يغيروا من بعض ولا يكتموا الحكمة عن الناس (زي الشمع اللي نوره مش بيقل لو نوّر شمع تاني)

• كلمة الله خالق الكل (آية 2 ل 4)
• المعين لنا في شدائدنا (آية 9)
• معطي الحياة الأبدية (آية 13)

سليمان لمّا عرف الصفات دي اشتهى تجسد أقنوم الحكمة، و ده اللي هيتكلم عنه في الجزء القادم

واضح إن في الإصحاح ده فكر التجسد … سليمان هنا بيصلي إن الله برسل الحكمة الأزلي عشان يخلّص الناس و يقودهم إلى مشيئته و مرضاته

• سليمان الحكيم بيكمل أحداث قصة الخروج من مصر على يد موسى النبي، و يتأمل في حدث إن ربنا أخرج للشعب ماء من الصخرة (بعد ما عطشوا) و بالمعجزة دي أكيد حسوا باللي حس به المصريون لمّا ربنا حوّل النهر إلى دم في أحد الضربات
• و يشرح لنا سليمان الفارق: عطش أولاد ربنا كان إنذاراً لهم لكي لا يتذمروا بل يثقوا في ربنا، بينما الضربات التي أصابت المصريين كانت عشان يشوفوا يد ربنا و يؤمنوا به بعدما استهزأوا به في الأول لمّا موسى كلم فرعون
• و في الآخر ربنا محب البشر كلهم و هدفه إن كل الناس تتوب و تخلص

الجزء الختامي في الإصحاح رائع جداً و بيوضح لنا إن ربنا هو هو من العهد القديم … تفكرنا بالجزء اللي بنقوله في ختام صلوات الأجبية (الذي لا يشاء موت الخاطئ مثلما يرجع ويحيا)

• و الدافع الرئيسي للتوبة هو الروح القدس اللي بيوبّخنا على خطايانا و يدفعنا للتوبة
• و ربنا في عقابه للأشرار رحيم جداً: مش بيفنيهم مرة واحدة، بل يكون العقاب تدريجياً عشان يكون فيه فرصة لمحاسبة النفس ووقت للتوبة (لأن ربنا عايز الناس تتوب)
• بعد كده كلام رائع من سليمان عن قوة ربنا و تلاقيها مع رحمته

• يتعجب سليمان الحكيم من الناس اللي مش مدركة وجود ربنا رغم قدرته الواضحة في الخليقة، و بتعبد مخلوقات (زي الشمس أو البحر)
• و يتعجب أكتر من الناس اللي بتعمل أصنام و تعبدها!!

الموضوع ده للأسف مستمر بطرق كتير في عالمنا الأيام دي (إن الناس تحط حاجات في مكانة أعلى من ربنا)، والقديس بولس قال كلام بنفس المعنى في الإصحاح الأول من رسالة رومية … وفي الآخر للأسف كل الناس دي بلا عذر لأن وجود رينا واضح جداً

• يركز سليمان الحكيم على البحّارة اللي بيعبدوا أوثان من خشب قبل ما يركبوا البحر عشان تحفظ سفنهم (اللي من الخشب برضه!!) من أمواج البحر … بينما من يحفظنا في حياتنا من أمواج العالم هو ربنا و عنايته لنا من خلال فلك نوح (الكنيسة و الصليب)
• و يقول إن سبب دخول الأصنام العالم هو كبرياء الناس و حبهم للمجد الفارغ … ملك بعيد عن الناس أمرهم إنهم يعملوا له تمثال كأنه موجود بينهم، فيتملّقوه إلى درجة العبادة (خصوصاً مع إتقان صنّاع الأصنام لتلك التماثيل)
• بعد كده تطور الموضوع لأنهم عملوا تماثيل وأطلقوا عليها اسم ربنا … و عبدوها بطريقة فيها إباحية و فساد أخلاق و تقديم أولادهم ذبائح

هنا واضح إن عبادة الأوثان (الاتكال على أي حاجة غير ربنا) هي أصل و مصدر لكل الشرور

• سليمان يستكمل و يقول إن أولاد ربنا لا تغويهم عبادة أي حد غيره لأنهم عارفين قدرته … و لمّا يخطئوا بدون قصد، ربنا رحمته واسعة و يرحم
• بينما اللي بيصنع أوثان أو اللي يعبدها، الاتنين غايب عن بالهم فكرة الدينونة: ربنا (خالق الكل) يدين كل واحد حسب أعماله
• و بالتالي لأن فكرة الموت و الدينونة غايبة عن بالهم، همّهم الوحيد هو الكسب في الدنيا مهما كانت الطريقة

آية جميلة جداً (لأن معرفتك هي البِر الكامل) … مش أخلاق أو سلوكيات، ولاد ربنا طريقهم هو معرفته

• لكن مش معنى كده إن شعب إسرائيل كان مع ربنا على طول: تذمروا في البرية و ربنا عاقبهم بالحيّات المحرقة تأديباً لهم … لكن من رحمته أعطاهم الخلاص بالحية النحاسية
• ده مختلف عن عقاب الله لسدوم وعمورة بالفناء (أمطار من النار) لأن الناس دي استنفذت كل فرص التوبة
• بينما ربنا كان معتني بشعبه: يقودهم و يعطيهم المَنّ من السماء
• بالتالي وجود الله و قدرته واضح جداً للكل

آية جميلة جداً شبه اللي ربنا استخدمها في التجربة (لكي يعلم بنوك الذين أحببتهم، أيها الرب، أن ليس ما تخرج الأرض من الثمار هو يغذو الإنسان، لكن كلمتك هي التي تحفظ المؤمنين بك)

• البعد عن الله بيوصّل لحالة كده مقدمة للجحيم: ظلام و خوف و رعب و توهان و كابوس لا ينتهي … ده اللي حصل للمصريين مع ضربة الظلام
• دي نتيجة الخطية … حتى لو الخطية في الخفاء (الظلمة)، الظلمة دي بتدخل جوة القلب
• و مهما حاولوا يخرجوا من الحالة دي: مستحيل بدون توبة
• بينما أولاد الله على العكس، ملكوت الله داخلهم و عامود النور يقودهم في سلام و هدوء

ربنا سمح بحالة التعاسة دي للأشرار عشان يتوبوا حتى لا يستمروا في هذه الحالة للأبد

• و عقاب ربنا للمصريين عقاب عادل: الضربة الأخيرة كانت قتل أبكارهم زي ما فرعون قتل أطفال الإسرائيليين … و ده كان بعد ضربات كثيرة لم يتوبوا بعدها و لم يطلقوا الشعب
• و بينما كان المصريون يبكون على أبكارهم، كان بنو إسرائيل يسبحون الله بعد الفصح
• و بالضربة دي أيقن المصريون تماماً قوة الله و عمله مع شعبه … فخرج إسرائيل من مصر
• لكن بعدها شعب إسرائيل نفسه لمّا تذمّر و عبد العجل الذهبي في البرية ربنا أهلك منهم كثيرين، و نفس الكلام مع قورح وداثان و أبيرام اللي أرادوا أخذ الكهنوت بدون دعوة من ربنا
• لكن بفضل شفاعة موسى وهارون، ربنا اكتفى بعقاب الشعب و لم يفنِهِم

واضح جداً هنا أهمية دور الكاهن البار و تأثير شفاعته في شعبه قدام الله

• للأسف فرعون لم يتعظ بل قاد جيشه للهلاك (الأرضي و الأبدي) لمّا طلع وراء شعب إسرائيل … و فعلاً أدركهم و حاصرهم عند البحر الأحمر
• لكن ربنا تمجد بوضوح عشان يخلّص شعبه: السحاب ظلل على الشعب و فصل بينهم و بين المصريين، و البحر انشق وظهر اليابس فيه
• و نفس الكلام مع لوط البار اللي ربنا خلّصه من شر أهل سدوم و عمورة
• و بالتالي كان مصير أولاد الله: التسبيح و النجاة و رحلة عظيمة قادهم فيها الله برعايته … بينما نصيب اللي أنكروا ربنا و استمروا في عنادهم رغم الرسائل الواضحة هو الهلاك