معلومة كنسية

ألقاب العدرا

خدام مدرسة مار إفرام السرياني

| 5 دقايق قراية

أمنا العدرا ليها مكانة كبيرة جداً و لها ألقاب كتير ... تعالوا نشوف أهمّها

أمنا العدرا هي أعظم قديسة في البشرية كلها .. هي اللي اختارها ربنا و اتولد منها عشان يفدينا و يخلّصنا ..
فيه شرف أكتر من كده ممكن حد يناله؟ و بالتالي مفيش أقدس من الإنسانة اللي نالت الشرف ده ..
تعالوا نشوف أهمّ 10 ألقاب للعدرا مريم و سبب تسميتها بهم


  • 1 – الثيئوتوكوس (والدة الإله):
    ده أهم لقب للعدرا خصوصاً من ناحية عقيدتنا و إيماننا .. و عشان كده بنقوله في مقدمة قانون الإيمان .. و معناه إن العدرا ولدت الله الظاهر في الجسد
  • 2 – أم النور:
    و ده أشهر لقب للعدرا و بنقوله برضه في قانون الإيمان .. لأنها ولدت النور الحقيقي الذي ينير لكل إنسان
  • 3 – الحمامة الحسنة:
    (تي اتشيرومبي إثنيسوس) و ده برضه من أشهر الألقاب و بنقوله في معظم مدايح و ألحان العدرا .. زي لحن "شيري ني ماريا" اللي بيتقال في التسبحة ..
    زي الحمامة اللي جابت غصن الزيتون (رمز السلام) لنوح في الفلك .. و كمان الحمامة ترمز للبساطة و الطهارة (كونوا بسطاء كالحمام)
  • 4 – الملكة:
    اللي تنبأ عنها داود في مزمور 45: "قامت الملكة عن يمينك أيها الملك" .. و دي بنقولها في ذكصولوجية العذراء في رفع بخور عشية .. و العدرا دايماً في الأيقونات مكانها على يمين المسيح
  • 5 – المجمرة الذهب:
    و ده اللي بنقوله في لحن "تي شوري" .. لأن الشورية اللي جواها الجمر المشتعل من غير ما تتحرق بترمز لأمنا العدرا
  • 6 – السماء الثانية:
    و ده بنقوله في ترنيمة "طوباكي يا مريم" .. لأن السماء مسكن الله .. و أثناء الحمل المقدس كانت العدرا مسكن الله
  • 7 – مدينة الله (أو مدينة الملك العظيم):
    لأنها اللي قصدها داود في مزمور 86: "أعمال مجيدة قد قيلت عنك يا مدينة الله" .. و اللقب ده إحنا بنقوله في لحن "بي أويك" لما بنقول: " لأنهم تكلموا من أجلك بأعمال كريمة أيتها المدينة المقدسة التى للملك العظيم"
  • 8 – الكرمة:
    زي ما بنقول في قِطَع الساعة الثالثة: "أيتها الكرمة الحقيقية الحاملة عنقود الحياة"
  • 9 – العليقة:
    لأن العليقة ترمز للعدرا .. و دي بنقولها في مديحة "العليقة" في شهر كيهك
  • 10 – العروس:
    اللي اختارها الملك السماوي ... راجع مزمور 84 (فاض قلبي بكلام صالح ...) اللي بيقول فيه "كل مجد ابنة الملك من داخل" ... و الحتة دي بنقول جزء منها في طقس الإكليل

و لها ألقاب تانية كتير (زي عصا هارون و قبة موسى و سلّم يعقوب) ..
و ألقاب عميقة بنقولها في الثيئوتوكيات زي عجينة البشرية و معمل الاتحاد
عايزين ندوّر و نفهم سبب الألقاب دي .. و نطّمن و نفرح إن لينا أم بالعظمة دي بتشفع فينا في كل حين

  • تقدر تعمل account على الموقع من هنا و تحتفظ بالمعلومة على صفحة ال account بتاعك
  • تقدر تعمل share للصفحة دي مع أصحابك و كنيستك عشان نستفيد بالمعلومة ده مع بعض
  • تقدر تعمل download للمعلومة على الجهاز بتاعك

كلّمنا

🤔 إيه رأيك في المعلومة دي و طريقة العرض؟ هل عرفت حاجة جديدة و مفيدة؟
🥰 إيه اللي عاجبك و حابب نركّز عليه أكتر؟
💡 إيه اللي مش عاجبك و حاسس إننا لازم نعمله أحسن؟ إزاي نطور و نحسن نفسنا؟
أي تعليق أو اقتراح هيفيدنا جداً