كورنثوس التانية

بيبدأ القديس بولس في الإصحاح الأول ب شكر لربنا على تعزيته ليه و لكل من هم في ضيقة (ممكن قصده الناس اللي تابت من أهل كورنثوس بعد رسالته الأولى)

الذي يعزّينا في كل ضيقتنا، حتى نستطيع أن نعزّي الذين هم في كل ضيقة بالتعزية التي نتعزّى نحن بها من الله.

كورنثوس التانية 1 : 4

في الإصحاح التاني بينتقل لقضية الإنسان اللي أخطأ مع امرأة أبيه ... و بعد ما أوصى بعقابه عشان يتوب و يحس بالجريمة اللي عملها (في الرسالة الأولى)، بيطلب من أهل كورنثوس يسامحوه و يظهروا له حبّهم ... عشان ماييأسش و يُقَع تحت يد الشيطان فيهلك

لئلا يطمع فينا الشيطان، لأننا لا نجهل أفكاره.

كورنثوس التانية 2 : 11

في الإصحاح التالت بيقارن القديس بولس بين خدمة العهد القديم (لما موسى النبي أخد لوحي الشريعة على الجبل و نزل وجهه مضيء لدرجة إنه كان بيحُط برقع على وجهه) و بين خدمة العهد الجديد ... و بيقول إن طالما خدمة العهد القديم (و في الآخر هي حروف الناموس مكتوبة) حصلت في مجد، فكم بالأولى جداً خدمة العهد الجديد اللي الوسيط بتاعها ربنا يسوع القائم المخلّص لشعبه
المفروض إحنا بقى مانعملش زي بني إسرائيل و مانخلّيش فيه برقع على عيننا و عقلنا يحجب عننا ربنا يسوع

و نحن جميعاً ناظرين مجد الرب بوجه مكشوف، كما في مرآة، نتغير إلى تلك الصورة عينها، من مجد إلى مجد، كما من الرب الروح

كورنثوس التانية 3 : 18

الإصحاحات من 4 ل 7 بتبيّن معنى المجد ده ... و قد إيه هو عكس المنظر اللي أهل كورنثوس متوقعينه

في إصحاح 4 بيبيّن لهم إن زي ما ربنا ملَك على خشبة الصليب، كذلك رسله ماعندهومش صورة المجد اللي العالم متخيّلها

و لكن لنا هذا الكنز في أوانِ خزفية، ليكون فضل القوة للّه لا مِنّا ... حاملين في الجسد كل حين إماتة الرب يسوع، لكي تظهر حياة يسوع أيضاً في جسدنا.

كورنثوس التانية 4 : 7 و 10

في إصحاح 5 بيبيّن محبة ربنا و فدائه على الصليب عشان يصالحنا مع الله ... و دي خدمة القديس بولس و باقي الرسل: خدمة المصالحة كسفراء لربنا يسوع

و هو مات لأجل الجميع كي يعيش الأحياء فيما بعد لا لأنفسهم، بل للذي مات لأجلهم و قام ... أي إن الله كان في المسيح مصالحاً العالم لنفسه، غير حاسب لهم خطاياهم، و واضعاً فينا كلمة المصالحة. إذاً نسعى كسفراء عن المسيح، كأن الله يَعِظ بنا. نطلب عن المسيح: تصالحوا مع الله. لأنه جعل الذي لم يعرف خطية، خطية لأجلنا، لنصير نحن بر الله فيه.

كورنثوس التانية 5 : 15 و 19 ل 21

في إصحاح 6 بيبيّن القديس بولس لأهل كورنثوس إن تعبه في الخدمة عشان اسم ربنا يسوع فيهم قصاده مجد و تعزية من جواه ... زي ربنا يسوع المصلوب ... و أهل كورنثوس في رفضهم لصورة القديس بولس بيرفضوا صورة السيد المسيح المصلوب

كحزانى و نحن دائما فرحون، كفقراء و نحن نُغنِي كثيرين، كأنّ لا شيء لنا و نحن نملك كل شيء

كورنثوس التانية 6 : 10

في إصحاح 7 بيصالحهم القديس بولس و يقول إنه فرح للناس اللي تابت من الرسالة الأولى و حزنت حزن روحي

لأن الحزن الذي بحسب مشيئة الله ينشئ توبة لخلاص بلا ندامة، و أما حزن العالم فينشئ موتاً.

كورنثوس التانية 7 : 10

في الفترة دي كان فيه حالة فقر و مجاعة شديدة في أورشليم ... و القديس بولس كان بيجمّع بركات من باقي كنائس آسيا و أوروبا لإخواتهم في كنيسة أورشليم.

ناس كتير استجابت لدعوته (زي كنيسة فيلبي) .. لكن كنيسة كورنثوس ماستجابتش قوي.

طبعاً ده أقلق القديس بولس لأن عدم السخاء في العطاء يدل على عدم فهم للإنجيل ... لربنا يسوع اللي أخلى ذاته و تجسّد آخذاً صورة عبد عشان يغنينا بمجده، إحنا اللي الخطية أفقرتنا و أفلستنا.

الإنسان المسيحي إنسان معطاء (مش بس في الفلوس)

فإنكم تعرفون نعمة ربنا يسوع المسيح، أنه من أجلكم افتقر و هو غني، لكي تستغنوا أنتم بفقره.

كورنثوس التانية 8 : 9

هذا و إنّ من يزرع بالشُح فبالشُح أيضاً يحصد، و من يزرع بالبركات فبالبركات أيضاً يحصد. كل واحد كما ينوي بقلبه، ليس عن حزن أو اضطرار. لأن المعطي المسرور يحبه الله. و الله قادر أن يزيدكم كل نعمة، لكي تكونوا و لكم كل اكتفاء كل حين في كل شيء، تزدادون في كل عمل صالح.

كورنثوس التانية 9 : 6 ل 8

في الآخر بيقارن القديس بولس مؤسس كنسية كورنثوس بين نفسه و بين المعلمين المفتخرين بأنفسهم اللي هناك و بيذمّوا في القديس بولس ... و اجتذبوا ناس كتير وراهم، شايفينهم مبهرين أكتر من القديس بولس

في إصحاح 10 بيقول إن مبدأ إن الشخص يفتخر بنفسه ده مبدأ خاطئ تماماً في الخدمة!

و أما: من افتخر فليفتخر بالرب. لأنه ليس من مَدَح نفسه هو المُزكَّى، بل من يمدحه الرب.

كورنثوس التانية 10 : 17 و 18

في إصحاح 11 بيقارن نفسه بالخدام المفتخرين دول ... و بيقول لو على أسباب الافتخار البشري فأنا عندي أسباب افتخار أكتر: "أنا يهودي فرّيسي ... ظهر لي ربنا يسوع بنفسه و دعاني ... و أنا كرّست نفسي للخدمة و أنا أكتر واحد تِعِب و تحمّل آلام في كل الرسل ... و أنا عُمري ما تقِّلت عليكم، بل كنت باشتغل عشان أوصّل لكم الإنجيل مجاناً" ... و طبعاً القديس بولس خايف على ولاده إن المعلمين الفاسدين دُول يبعدوهم عن ربنا

و لكنني أخاف أنه كما خدعت الحية حواء بمكرها، هكذا تفسد أذهانكم عن البساطة التي في المسيح.

كورنثوس التانية 11 : 3

في إصحاح 12 بيكشف القديس بولس إنه في رؤية صعد للفردوس ... بعد كده خاف و حس إنه افتخر بنفسه (مضطر عشان أولاده يصدقوه)، ف قال لهم على ضعفاته اللي ربنا سمح بيها عشان يحمي بولس من التكبّر

و لئلا أرتفع بفَرط الإعلانات، أُعطيت شوكة في الجسد، ملاك الشيطان ليلطمني، لئلا أرتفع. من جهة هذا تضرعت إلى الرب ثلاث مرات أن يفارقني. فقال لي: تكفيك نعمتي، لأن قوتي في الضعف تكمل. فبكل سرور أفتخر بالحري في ضعفاتي، لكي تحلّ عليّ قوة المسيح.

كورنثوس التانية 12 : 7 ل 9

في إصحاح 13 بيختم القديس بولس رسالته بتحذير شديد لأهل كورنثوس، إنه هاييجي يزورهم للمرة التالتة قريّب ... (يعني يراجعوا نفسهم و إيمانهم و نظرتهم للقديس بولس) عشان هم في خطورة كبيرة لو استمروا في فكرهم المتكبر ده

جرِّبوا أنفسكم، هل أنتم في الإيمان؟ امتحِنوا أنفسكم. أم لستم تعرفون أنفسكم، أن يسوع المسيح هو فيكم، إن لم تكونوا مرفوضين؟

كورنثوس التانية 13 : 5