اعترافات القديس أغسطينوس

دي مقدمة من مترجم الكتاب (الخوري يوحنا الحلو)

• ظروف النشأة:
  • مكان الميلاد: تاغسطا ( المعروفة اليوم "سوق أخرس") في الجزائر
  • زمان الميلاد: سنة 354 م
  • ظروف البيت: بيت شريف ميسور الحال من أب وثني و أم مسيحية
  • اتعلم كويس جداً (لأن ده كان أهم مقومات النجاح في المجتمع الروماني وقتها)
  • لكن كانت البيئة اللي هو فيها بيئة وثنية كلها خلاعة … و أغسطينوس تمادى في الشر لدرجة إنه أنجب من الخطية وهو عنده 16 سنة
• دوّر أغسطينوس عن الشبع في الحاجات دي و ملقاش
  • شهوات الجسد
  • الفلسفة و العلم و الحكمة البشرية
• القديسة مونيكا كانت على طول بدموع بتحاول ترشد أغسطينوس للإيمان الحقيقي من صغره … ورغم ابتعاده الدائم عن طريق الحق إلا أنها لم تفقد الأمل أبداً في أن ترى ابنها مسيحياً مؤمناً
• رحلته في العالم:
  • قرطاجة (تونس): اتعلّم فيها ثم عاد إليها و أسّس مدرسة للخطابة وهو شاب
  • روما ثم ميلانو سنة 384 م كمدرّس للخطابة
    راحت القديسة مونيكا وراه ميلانو … و هناك تعرّف على القديس أمبروسيوس أسقف المدينة
    أُعجِب بعظاته (من ناحية البلاغة ثم كمحتوى بفضل رعاية القديس أمبروسيوس له) لحد ما آمن و اتعمّد
  • ماتت القديسة مونيكا و مات ابن أغسطينوس هناك فعاد إلى الجزائر
    هناك خدم ربنا و أصبح كاهناً ثم أسقفاً … و كتب الكتاب ده على 13 جزء

كتاباته فيها عمق فلسفي كبير و مشاعر صادقة ... في صورة صلاة و حوار مع الله
تعالوا نشوف ملخص كل كتاب مع جزء من صلاة القديس أغسطينوس في الجزء ده

الكتاب الأول: الحداثة

• ندم جداً على تأخر معموديته
• انتقد جداً المنهج اللي كان يدرسه في الصغر و اللي كان يدعو للفجور (من خلال دراسة أساطير اليونان و آلهتهم و قصص كتير فيها خطية)
• وانتقد اهتمام المجتمع الزائد بالعلم والفصاحة على حساب الأخلاق و الفضيلة و القرب من ربنا
• كان بيحب السرقة من صباه وكان زعيم عصابة فيها ناس من أصحابه

الكتاب الثاني: الفتى المراهق

• اختلط الحب عنده بالشهوة و تمادى فيها بدون حدود
• شكَر ربنا جداً لأنه أعطاه فرصة يتوب عن الفترة دي … و بحكمة ينصح كل من لم يقع في هذه الخطايا إنه يشكر ربنا على نعمته بدل ما يحسّ بالبر الذاتي أو يدين غيره
• انتقاله إلى قرطاجة:
  • و هو عنده 16 سنة انتقل مع عائلته إلى مدينة قرطاجة عشان يدرس في مكان أحسن … و في اعترافاته شكر القديس أغسطينوس والده على اهتمامه إنه يعلّم ابنه لكنه لامَه لأنه لم يهتم به روحياً ولا أخلاقياً
  • لكن خلصت فلوس والده فاضطر يخرج من المدرسة … وقتها ارتكب الزنا رغم دموع و نصائح والدته
  • كمان تمادى في السرقة (مش عن احتياج بل حباً فيها، و في الأغلب سرق حاجات ملهاش قيمة زي شوية ثمار)

الكتاب الثالث: في قرطاجة

• و هو في قرطاجة مات والده
• كان فارق معاه في مهنة الخطابة إن الناس تمجّده و تستحسن كلامه
• بحث عن الحكمة في الفلسفة البشرية فلم يجد ضالته … لمّا قرأ الكتاب المقدس وقتها برضه لم يجد هدفه و لم يفهم كنوز الحكمة في الكتاب المقدس
• عن القديسة مونيكا:
  • اتكلم كتير عن دموع أمه في الوقت ده بسبب بعده عن ربنا، و ذكر حلم لها ربنا بشّرها إن ابنها سوف يؤمن في يوم من الأيام زبها … فضلت تصلي له 9 سنين و هو بعيد عن ربنا و رافضه
  • فضلت تطلب بدموع من أسقف المدينة إنه يكلم أغسطينوس، و الأسقف رفض و مشافش أمل فيه بسبب عنده … و بعد إلحاح كتير منها قال لها الجملة المشهورة: ثقي أن ابن هذه الدموع لن يهلك أبداً

الكتاب الرابع: عواصف و ظلمات

• من سن 19 ل 28 استمر أغسطينوس في حياته العابثة و اتخذ زوجة غير شرعية
• في الوقت ده مات صديقه القريب منه … و حزن عليه جداً و كره الحياة بعد موته
• لام نفسه على تعلقه الزائد بصديقه … دي خدعة بتخلي فراق الأشخاص صعب جداً

الكتاب الخامس: وميض في الليل

الجزء ده بيتكلم عن عامه ال29

• يستفيض القديس أغسطينوس في التحذير من إن الإنسان يتمادى في طلب العلم و المعرفة على حساب ربنا … لأنه مهما عرف مش هينفعه العلم بحاجة لو بعيد عن ربنا بل يؤذيه بالكبرياء (زي اللي فهم أبعاد شجرة و طولها و عرضها و مراحل حياتها … لكن لم يأكل من الثمر)
• في الوقت ده سافر روما يدرّس فيها الخطابة (لأن الدراسة في روما كان فيها التزام أكتر) … و رغم إن ده مكانش برضا القديسة مونيكا، لكنها فضلت تصلي له و تبكي عليه
• و هو وحيد في روما أصابته حمّى شديدة و كان هيموت … و شكر ربنا في مذكراته إنه لم يمُت وهو بعيد عن ربنا و إن ربنا أعطاه فرصة ثانية (حتى لو لسة في الوقت ده مكانش فاهم كده) … و قال إن في ده استجابة من ربنا لصلوات أمه القديسة
• بيقول إنه كان عارف إن أفكاره و سلوكه غلط لكن كان جواه رفض لربنا و بيكابر
• لكن أغسطينوس لم تعجبه الحياة في روما … فراح ميلانو وهناك قابل القديس أمبروسيوس و أُعجِب بفصاحة عظاته و كمان بمعاملته له (زي الأب لابنه)
  و شوية شوية قرّر أغسطينوس يبقى من الموعوظين في الكنيسة (يعني لسة ولا آمن ولا اتعمّد بس بيسمع عظات و ماشي في سكة الإيمان)

الكتاب السادس: لحاق أمه به إلى ميلانو

• القديسة مونيكا راحت وراه ميلانو .. و فرحت جداً لمّا عرفت إنه بقى موعوظ (حسّت إن صلواتها بدأت تُستَجاب) و فضلت تصلي له
• حكى في الوقت ده عن صديقين له: البيوس اللي آمن زيه بعد كده و نبريديوس
• انتقد أغسطينوس بشدة المصارعة الدامية اللي كانت بتحصل في ملاعب روما … وقال إن البيوس في وقت سقط في فخ حب المشاهد الدموية دي لأنه اتّكل على نفسه و سمع كلام صحابة و راح مرة رغم إنه مش مقتنع

الكتاب السابع: صعوبة التحرر من فكرته الخاطئة عن الله

• في الوقت ده أغسطينوس تأكد من كذب التنجيم والعرافة
• أغسطينوس شغله جداً إنه يعرف: إيه مصدر الشر اللي في العالم؟ لو ربنا صالح، ليه فيه شر في العالم؟
  و أدرك إن السبب مش في ربنا بل في فساد الإرادة البشرية
• شَغَله في الوقت ده إنجيل يوحنا ورسائل القديس بولس

الكتاب الثامن: عدوى المثل

• في الوقت ده اقترب أغسطينوس من الإيمان، و لكن كان صعب عليه و تغيير كبير إنه يترك عاداته و مركزه و تفكيره القديم
• و عرف أن ربنا الراعي الصالح اللي بيدوّر على الخروف الضال … و يقبل توبة كل ضال
• و عرف من صديق مسيحي عن سيرة الأنبا أنطونيوس
• في الآخر قرّر يسلّم حياته لربنا و يتعمّد و يبقى مسيحي هو و ابنه و صديقه البيوس … و ما أعظم فرحة القديسة مونيكا بهذا التغيير

الكتاب التاسع: صلاة الشكر

• ساب أغسطينوس الخطابة و بدأ يبشر بالسيد المسيح و يقرأ بفرحة و تدقيق سفر المزامير و خصوصاً المزمور 4 (إذ دعوتُ استجبتَ لي يا إله لِرّي)
• رجع من إيطاليا لإفريقيا … و ماتت أمه مونيكا بعد فترة مرض بسيطة بالحمى و أغسطينوس كان عنده 33 سنة
• و حكى القديس أغسطينوس عن القديسة مونيكا:
  • نشأتها وتربيتها الصالحة
  • زواجها و تحملها لطبع و عصبية زوجها عشان تكسبه للمسيح (و ده اللي حصل فعلاً قبل موتها)
  • كانت أمينة مع حماتها
  • كانت بتصنع سلام بين الناس

في الكتاب العاشر: أمله الوحيد معرفة الله
بدأ القديس أغسطينوس يعيش حياة نسك و يركز و يتأمل على معرفة ربنا

الكتاب ال11: استغاثته بالله في أداء رسالته الجديدة

• بيبدأ القديس أغسطينوس بتأكيد أن الله هو خالق الكون كله … رغم جهلنا بتفاصيل كتير قبل و أثناء الخلق
• كمان هو الأزلي الأبدي … حاجة إحنا صعب جداً ندركها لأننا محدودين بالزمن

في الكتاب ال12: شرح مَقَاطع من كتاب سفر التكوين
كمّل القديس أغسطينوس تأملات عن إصحاح 1 في سفر التكوين (بداية الخليقة)

الكتاب ال13: فعل الشكر

• الجزء ده بيتكلم فيه عن الثالوث القدوس و تأملات في أجزاء من الكتاب المقدس (خصوصاً رسائل القديس بولس)
• بيقول إن االعطية مهمة (إن إنسان يعمل خير) لكن الثمرة أهم (الدافع الداخلي وراها) … دي اللي بتفرّح ربنا

و فعلاً ده أحسن ختام ... لمّا نقرأ عن قديس: نهتم بالفضيلة اللي ورا السلوك مش بالسلوك نفسه اللي ممكن يبقى عالي علينا أو مش مناسب لنا

ده ملخص جزء من وعظة كنسيات - الأباء الأرمن و اللاتين - ابونا لوقا ماهر

الملخص

• القديس أوغسطينوس من قديسين الآباء اللاتين في القرن الرابع و الخامس ... لقبه ابن الدموع
• اتولد في الجزائر من أب و جدة وثنيين متعصبين ... و القديسة مونيكا المسيحية اللي كان عندها ولد و بنت غيره صاروا رهبان
• أوغسطينوس تمثل بأبيه الوثني ... كان زعيم عصابة مش بس له ابن من الخطية
• القديسة مونيكا آمن على يدها الأب و الجدة ... و فضلت وراء أوغسطينوس من الجزائر لقرطانة لروما لميلانو
• اتغير بفضل:
  1. الشفاعة:
     دموع القديس مونيكا
  2. الرعاية:
     عظات و رعاية القديس أمبروسيوس
  3. كلمة ربنا:
     رسائل القديس بولس
  4. القدوة:
     كتاب (حياة أنطونيوس) للبابا أثناسيوس

الدروس

فيه دروس كتير نطلع بيها من الكتاب ده:

1. اللي بيدوّر على الحقيقة بصدق ربنا هيوصّله له (لشخص يسوع المسيح)
2. نعمة عظيمة اننا اتولدنا مسيحيين و عارفين الحق و وسط كنيسة تسلك على الحق
3. قوة التوبة اللي بدّلت حياة القديس أغسطينوس تماماً

بركة صلاة القديسة مونيكا و القديس أغسطينوس تكون معانا
نقدر نعرف معلومات أكتر في سنكسار 22 مسرى (عيد نياحته)