حامل الأيقونات

الأيقونات

• في الجزء الفوقاني نلاقي صورة السيد المسيح الفادي على الصليب لأن دي أهم صورة و أكتر صورة توضح محبة ربنا لنا
  على يمينه العدرا مريم و على شماله يوحنا الحبيب (لأنهم هم بس اللي كانوا معاه وقت الصليب)
• تحتها صورة العشاء الرباني اللي ربنا أسس فيها يوم خميس العهد سر الإفخارستيا (التناول) اللي به نقدر نتحد به لمّا نتناول جسده و دمه.
  أحياناً بدلها بتكون موجودة صورة (العشاء الأخير)، عشاء الفصح اللي يهوذا حضره (الصورة بيكون فيها 12 تلميذ) لأنها الأكثر انتشاراً ... لكن طبعاً الأفضل يكون صورة العشاء الرباني و تأسيس الإفخارستيا (11 تلميذ)
• على يمين و شمال الصورة نلاقي التلاميذ ال 12 (أعمدة الكنيسة).
• في حضن الآب في الهيكل نلاقي صورة المسيح الضابط الكل (الألف و الياء).
• على يمين الهيكل (الناحية البحرية): العدرا مريم (الملكة عن يمين الملك)
  و على اليمين صورة البشارة (لما الملاك جبرائيل بشّر العدرا) و بعد كده الملاك ميخائيل (رئيس الملائكة و من أعلن قيامة السيد المسيح) ثم أيقونات الشهداء و القديسين.
• على شمال الهيكل (الناحية القِبلِية): صورة القديس يوحنا المعمدان (و أحياناً قبلها صورة تانية للسيد المسيح) ثم أيقونات الشهداء و القديسين.

الأبواب

فيه 3 أبواب للهيكل: الوسطاني (الرئيسي أو الملوكي لأنه بيوصل للمذبح على طول) و اليمين و الشمال

السرج و القناديل

قدام صورة كل قديس فيه قنديل منوّر (لأن نور ربنا أشرق في القديس ده)
طبعاً صورة ربنا مفيش قدامها قنديل لأن هو النور الحقيقي

بيض النعام

من الحاحات الجميلة اللي بنشوفها في كنيستنا : بيض النعام بين الصور
البيض عموماً بيرمز للقيامة و الحياة الجديدة (لأن الكتكوت بيخرج لوحده من البيضة و تبدأ حياته)

المقصود من النعام لأن عندما تبيض النعامة تدفن بيضها وتبقي بعيدة عنه ولكن عينها عليه مثال لربنا يسوع لأنه تركنا في العالم ولكن عينه علينا دائماً ويرعانا

عايزين لمّا نشوف حامل الأيقونات نبص على القديسين العظماء اللي فيه و نطلب شفاعتهم فينا و نحاول نبقى زيهم