معلومة تاريخية

سانتا كلوز

خدام مدرسة مار إفرام السرياني

| 5 دقايق قراية

بابا نويل شخصية حقيقية و كان قديس عظيم ... تعالوا نعرف أكتر

كلنا عارفين حكاية بابا نويل اللي في كل عيد ميلاد بييحي بلبسه المميز على عربيته و يجيب هدايا حلوة للأولاد و البنات ..
و لمّا كبرنا شوية، عرفنا إن اللي بيجيب الهدايا في البيت هم بابا و ماما .. و في الكنيسة هم الأنكل أو الميس ..
فإيه حكاية بابا نويل ده بالظبط؟


بابا نويل أو سانتا كلوز هو شخصية حقيقية لقديس بنحتفل بعيد نياحته يوم 10 كيهك .. هو القديس نيقولاوس أسقف مورا في القرن الرايع الميلادي المعروف بعطائه و إحسانه على شعبه ..
إيه حكاية القديس ده؟

القديس ده كان من عيلة تقية و غنية .. و هو كاهن، عرف إن فيه ناس فقيرة و محتاجة فلوس ضروري و كان عايز يساعدهم من غير ما يعرفوا ..
خد فاوس و حطّها في كيس و بالليل من غير ما حد يحس بيه رماها من شباك بيت العيلة دي عشان يصحوا يلاقوا الفلوس تاني يوم .. و عمل كده مرة تانية ..
فصاحب البيت كان نفسه يعرف مين اللي بيعمل كده ففضل سهران لحد ما في المرة الثالثة شاف القديس و عرفه و شكره جداً.

بعد نياحة القديس ده انتشرت حكايته (و إحسانه على الفقراء بالطريقة دي) في أماكن كتير في روسيا وأوروبا وكان الناس بيدّوا بعض هدايا في عيد الميلاد على اسمه ..
وبدأت الحقيقة تختلط بالأسطورة.. و جه اسم بابا نويل ككلمة فرنسية تعنى أب الميلاد
بعد كده بدأ الكتاب و الأدباء يتخيلوا و يرسموا شخصية بابا نويل و حكايته لحد ما وصلوا لشكله الحالي و شخصيته إنه بيحطّ للأطفال هدايا ليلة عيد الميلاد عشان يصحوا الصبح يلاقوها فينبسطوا أكتر.

دي حكاية بابا نويل اللي في الأصل كان قديس محب للفقراء ..
فحتى لو كان اللي بيجيب لنا الهدايا في العيد مش هو سانتا كلوز .. على الأقل قصة القديس الأصلي هي اللي خلّت الناس تحتفل بالهدايا بالطريقة دي في عيد الميلاد ..
يا ريت نفتكر كل ما نشوف سانتا كلوز قصة القديس نيقولاوس .. و نعمل زيه في إننا نحاول نفَرَّح الناس اللي حوالينا في العيد.

  • تقدر تعمل account على الموقع من هنا و تحتفظ بالمعلومة على صفحة ال account بتاعك
  • تقدر تعمل share للصفحة دي مع أصحابك و كنيستك عشان نستفيد بالمعلومة ده مع بعض
  • تقدر تعمل download للمعلومة على الجهاز بتاعك

كلّمنا

🤔 إيه رأيك في المعلومة دي و طريقة العرض؟ هل عرفت حاجة جديدة و مفيدة؟
🥰 إيه اللي عاجبك و حابب نركّز عليه أكتر؟
💡 إيه اللي مش عاجبك و حاسس إننا لازم نعمله أحسن؟ إزاي نطور و نحسن نفسنا؟
أي تعليق أو اقتراح هيفيدنا جداً