كتير للأسف "بيقاوح" في الصلاة باللغة القبطية ... ناس تقول: أنا ليه أصلّي بلغة أنا مش فاهمها؟ و الحل بالنسبة لهم بدل ما يتعلّموا حتى الحاجات البسيطة بالقبطي عشان يستمتعوا بتراث الكنيسة و ألحانها و صلواتها إنهم يلغوا القبطي خالص من الصلاة
على الناحية التانية بنلاقي في أوروبا ناس مهتمّة جداً بالقبطي لما يمثّله من تراث عظيم .. من ضمنهم العالِم والتر إوينج كرام

• كرام اتولد سنة 1865 في اسكتلندا
• كان أديب و عالم في الدراسات القبطية Coptology
  و ال Coptology علم مُعترف بيه و مهم في الغرب، مش بس عشان التراث الكنسي ... بل التراث المصري كله قبل دخول العرب
• بعد ما اتخرّج من جامعة أوكسفورد، اهتم بدراسة المصريات Egyptology لدرجة إنه سافر باريس و برلين عشان يبحث في دراسته أكتر
• أفنى معظم حياته في دراسة اللغة القبطية
• سنة 1939م عمل مرجع عظيم جداً ... قاموس قبطي إنجليزي اسمه A Coptic Dictionary
  القاموس ده نتاج أكتر من 30 سنة شغل و بحث مع مجموعة من الباحثين
• القاموس ده بقى المرجع الرسمي للغة القبطية في أوروبا لأنه كان غني جداً بالمعلومات الدقيقة و التفاصيل اللي مبنية على دراسة
• كمان ترجم كتب كتير منها كتب للبابا أثناسيوس الرسولي
• مات سنة 1944

كان مقتنع جداً إن اللغة القبطية هي لغة الكنيسة المصرية و تراثها، و إنها ماينفعش تتساب و تندثر ... و أفنى حياته عشان يبحث فيها
و ده الصح ... اللغة القبطية أهميتها اللي عرفها حتى الغرب إنها تحمل تراث تاريخي و لاهوتي لكنيسة الإسكندرية القديمة