ظهور الصليب

قصة ظهور الصليب جميلة جداً و مهم نكون عارفينها ... تعالوا نشوفها من منهج طقس المدرسة ل KG1

سؤال:
هو بعد ما ربنا يسوع اتصلب، إيه اللي حصل للصليب نفسه؟؟

الإجابة:
فضل ماحدش لاقيه لحد ما جت ملكة عظيمة اسمها هيلانة و ابنها الملك قسطنطين ... لاقوه و عملوا كنيسة عظيمة ليه

• كان فيه زمان ملكة اسمها الملكة هيلانة
  ... باباها و مامتها كانوا مسيحيين و ربوها تربية مسيحية جميلة خالص و اتجوزت الملك قنسطنس و جابت ولد اسمه قسطنطين
• و في يوم و هي نايمة سمعت صوت بيقول لها:

روحي أورشليم و دوري كويس علي الصليب المقدس

• راحت قالت لابنها قسطنطين علي اللي سمعته و هو قال لها

متخافيش هساعدك نلاقي الصليب


• و فضلوا يدوروا كتيييير لغاية ما عرفوا إنه موجود تحت جبل كبير خالص من الزبالة ...
• قالت للجنود إنهم يشيلوا كل الزبالة
• لقت 3 صلبان
  و عرفت ان 2 منهم بتوع الاتنين حرامية اللي اتصلبوا مع بابا يسوع و فضلت الملكة هيلانة تصلي كتييير علشان بابا يسوع يرشدها ل أنهي واحد الصليب المقدس
• لغاية ما لقت جنازة ماشية
  ف جريت بسرعة وقّفتهم و حطت أول صليب علي الميت محصلش حاجة...حطت تاني صليب برضه محصلش حاجة لكن أول ما حطت الصليب التالت الميت قام من الموت بقوة الصليب المقدس

• علشان كده الكنيسة بتحتفل بظهور الصليب المقدس يوم 10 برمهات
• و الملكة هيلانة اخدت الصليب و بنت كنيسة كبيرة و حطته فيها ...
  علشان كده الكنيسة بتحتفل مرة تانية بتدشين كنيسة الصليب يوم 17 توت