ويلٌ لكم أيها الكتبة والفريسيون المراؤون! لأنكم تأكلون بيوت الأرامل، ولعلّة تطيلون صلواتكم. لذلك تأخذون دينونة أعظم.

معنى الآية

• تبكيت ربنا للناس دي بسبب الرياء: أُظهر غير اللي جوايا عشان مش عايز أبان وِحِش (زي القبر المبيّض من الخارج) … دي خطية أساسها الكبرياء
• اللي باين للناس من برة: صلوات طويلة (دي حاجة كويسة) .. و لكن لعلّة!! اللي جوة: تأكلون بيوت الأرامل
• المعنى: لمّا حد ينتقل و يروحوا يصلوا عليه، يطيلون الصلاة عشان ياخدوا فلوس أكتر … عشان كده ربنا وصّى التلاميذ: مجاناً أخذتم مجاناً أعطوا

الناس دي كانت في مناصب قيادية عند اليهود … بالتالي كلام ربنا هنا لكل واحد في موقع مسؤولية

أسباب الرياء

المشكلة الرئيسية: الهدف من الصلاة عندهم ضاع تماماً

• يا إما هدف غلط زي الكتبة و الفريسيين (عايز ياخد فائدة أو مدح من الناس) يا إما الهدف مش موجود (نصلي ونصوم كما لقومٍ عادة مع الكنيسة و خلاص)
• ده عكس ناس كتير مكانتش بنفس التديُّن الظاهري للكتبة و الفريسيين لكن هدفهم من الصلاة كان واضح و صحيح زي: الكنعانية - نازفة الدم - أصحاب المفلوج ... كلهم كان هدفهم زي يعقوب لمّا قال لربنا: لن أطلقك إن لم تباركني
• ربنا هدفه واضح و إرادته أعلنها لنا بوضوح من البداية: خلاصنا .. ده لازم يكون هدفنا الرئيسي: أوصل السما
• أهداف حياتنا المرحلية (سواء في حياتنا اليومية أو في بيتنا أو شغلنا أو دراستنا أو خدماتنا أو تعاملاتنا) لازم تخدم هذا الهدف الأساسي و تكون على نفس الخط معاه … لو فيه تعارض يبقى الهدف المرحلي غلط

لازم كل خطوة في حياتنا الروحية يبقى لها هدف … و مش هيوصل للهدف غير اللي عينه عليه

ضياع الهدف

فيه مشاكل كتير نتايجها إننا نفقد الهدف الصحيح في حياتنا الروحية:

1. غياب الهدف:
   من الأول أنا مش عارف أنا عايز إيه
2. ضياع الهدف:
   اتشتّت في وسط الرحلة (زي يهوذا) .. ناس كتير بدأت وماكمّلتش الطريق الروحي (زي ديماس تلميذ بولس) … الشوك (مشاغل الحياة ومغرياتها) خنق الزرعة فلم تُثمر
3. انحراف الهدف:
   زي الكتبة و الفريسيين اللي هدفهم أصبح هدف غلط

حلها التوبة (تغيير الاتجاه) و الاعتراف

أنواع العلاقة بربنا

المقياس أو الترمومتر في رحلتك: مدى علاقتك بالله، إوعى يبقى فيه حاجة شغلاك عنه أو عن الهدف ده

• علاقة ملغيّة (مش موجودة):
  ناس رافضة وجود ربنا و عايزة تعيش على مزاجها
• علاقة أُمنية:
  "نِفسي أبقى كويس بس مش قادر" .. يفضل حياته كلها يتمنى بس مش بياخد خطوة إيجابية => للأسف إيمان بدون أعمال ميت
• علاقة نَفعِية (مصلحة):
  أنا مع ربنا طول ما حياتي كويسة و ماشية على مزاجي فقط (كأنه بيقول لربنا: لتكُن مشيئتي) … لو حصل حاجة مش على هواه بيقلب على ربنا
• علاقة وقتية:
  مواسم بس (أسبوع الآلام أو بداية السنة) ... لو ليك هدف لازم تكمّل الطريق مش ترجع اللي مشيته بعد ما الموسم يخلص
• علاقة حقيقية:
  و دي مش مقتصرة على الرهبان أو الكهنة فقط … لازم يكون فيه كل يوم
  • اتصال:
    (مقياس المحبة هو الاتصال): مش بس الكنيسة، لازم في المخدع علاقة شخصية: صلاة من ناحيتي و ردّ في الكتاب المقدس من ناحية ربنا
  • اعتذار لمّا أزعل ربنا:
    محاسبة النفس و توبة كل يوم قبل ما أنام

  كل نَفَس أتنسّمه. أسبح اسمك القدوس. يا ربى يسوع المسيح مخلصى الصالح

ربنا يدّينا إننا نضع هدف صحيح لحياتنا الروحية: العلاقة الحقيقية اليومية الدائمة مع الله … و نفضل محتفظين بالهدف ده طول حياتنا