فليمون

# 1: صلاة افتتاحية

بيبدأ بسلام لفليمون و عائلته ... و صلاة شكر على محبة فليمون و إيمانه اللي هو مشهور بيهم، و بيمهّد له طلبه بالكلام عن شركة الإيمان بين كل المؤمنين

لكي تكون شركة إيمانك فعّالة في معرفة كل الصلاح الذي فيكم لأجل المسيح يسوع

فليمون 1 : 6

• الإيمان لازم يكون معاه أعمال تؤكده ... أعمال شركة = أعمال محبة = أعمال صلاح
• و كل من يؤمن بربنا يسوع هو جوة هذه الشركة ... الكل متساوي

نتعلّم إيه؟

لو هاتطلب طلب صعب أو غير متوقع من حد، من الحكمة إنك تنبّهه لصفات كويسة فيه و حقايق تمهّد لطلبك

يا رب إدّيني حكمة إني أكسب الشخص (بدون رياء) عشان أوصّله لما يرضيك

# 2: طلب القديس بولس

• آية 10 ل 15 بيقول فيها القديس بولس إن أُنِسيمس بقى ابنه في الإيمان و بيخدمه ... بقوا عائلة واحدة في المسيح ... و رغم إنه عايز أُنِسيمس يفضل معاه إلا أنه لازم الخلاف بين أُنِسيمس و فليمون يتحَل لمصلحة ال2


• آية 16 بيطلب القديس بولس من فليمون يقبل أُنِسيمس كأخ مش كعبد


• آية 17 ل 19 شفاعة عظيمة من القديس بولس من أجل أُنِسيمس، بيقول لفليمون اقبله كأنه أنا

لا كَعَبد في ما بعد بل أفضل من عبد: أخاً محبوباً و لا سيّما إليَّ فَكَم بالحَريّ إليك في الجسد و الرب جميعاً

فليمون 1 : 16

• الآية دي قوية جداً ... عشان نفهمها، لازم نعرف إن القانون الروماني كان بيدّي السادة سُلطة كاملة على عبيدهم ... يعني فليمون من حقه يجلد و يحبس أُنِسيموس زي ما هو عايز
• القديس بولس مش بس بيقول له يسامحه، ده بيقول له اقبله كأنه أخوك مش عبد ليك
• دي حاجة طبعاً غريبة جداً على أغنياء روما و مش مقبولة في مجتمعهم

فإن كُنت تحسبني شريكاً فاقبَله نَظيري. ثم إن كان قد ظلمك بشيء أو لك عليه دين فاحسِب ذلك عليَّ

فليمون 1 : 17 و 18

• ما أعظمك أيها القديس بولس ... بيعمل زي السيد المسيح اللي حمل خطايانا عشان يصالحنا لنفسه ... بيقول لفليمون إن الغلط اللي عمله أُنِسيموس و الدين اللي عليه أنا اللي مستعد أوفّيه، احسبه عليّ أنا ... بكده القديس بولس وسيط بيصالح بين فليمون و أُنِسيموس
• كمان نتعلّم يعني إيه الشركة في المسيحية ... بولس = فليمون = أُنِسيموس قدام ربنا، ال 3 ولاده المؤمنين بيه و محتاجين غفرانه ... إخوات في المسيح و محتاجين غفرانه على الصليب ... و بالتالي كلنا عبيده (مافيش سيد و عبد) و لازم نغفر لبعض (و نتعلم من مثل العبد الذي لم يغفر)

نتعلّم إيه؟

ماينفعش تبقى عارف إن 2 مؤمنين بربنا يسوع و بينهم خلاف كبير ممكن تحلّه و تسكت عشان خايف تخسر حد فيهم ... لازم بحكمة و بمعونة ربنا تتدخّل لحَل هذا الخلاف الشديد

يا رب خلّيني وسيط للخير و المغفرة بين ولادك ... عشان الشيطان مايزرعش خلافات بيننا ممكن تضيّع مننا السما

# 3: تحية ختامية

في الختام بيقول القديس بولس لفليمون إنه واثق في إيمانه و طاعته و إنه هايعمل حتى أكتر من اللي طلبه منه

إذ أنا واثق بإطاعتك كتبت إليك عالماً أنك تفعل أيضاً أكثر ممّا أقول

فليمون 1 : 21

• جميلة دالة المعلّم و الأب على أولاده

نتعلّم إيه؟

زي ما التمهيد للطلب محتاج حكمة، ختام الطلب كمان محتاج حكمة ... إنك بمحبة تضع ثقتك في اللي قدامك إنه كويس و إنه مش هايخذلك بل هايعمل أكتر كمان ما انت عايز

يا رب إدّيني حكمة إني أشجّع ولادك على التعلم من صفاتك الحلوة عشان كلنا نتعلم منها و نحطها هدف لنفسنا نمشي عليه