اجتماع خدام مدرسة الشمامسة - 2019

ثمر الخدمة


كلمة للخدام الشباب عن ثمار الخدمة و استفادة الخادم من الخدمة و مقياس النجاح في الخدمة ... و أهمية تعب الخادم .. و هل لازم الكل يخدم؟


كلمة للخدام الشباب عن ثمار الخدمة من اجتماع خدام مدرسة الشمامسة بكنيسة العدرا الدقي 2019 لدكتور هاني صبحي


#قراءة:
#استماع:

السيد المسيح في ختام وصاياه و كلامه للرسل (و هو بيصعد للسماء) قال لهم: "اذهبوا و تلمذوا جميع الأمم" ...
طب يا رب مش واسعة شوية "كل الأمم"؟! ده احنا 11 واحد كنا خايفين و مستخبيين
طب يا رب هل عندنا إمكانيات مادية أو دعم من أي حكومة؟ ... الحقيقة لأ
الموضوع شكله مستحيل
لكن بعد 10 أيام في يوم حلول الروح القدس، قال القديس بطرس وعظة جابت 3000 نفس

يا ترى إيه اللي بيحصل في الخدمة؟


الخادم هو المستفيد الأول

  • حكاية رمزية: الصخرة (موجودة في ال slides، اضغط على الصورة)
    • زي شغلنا كخدام ... أوقات بنحسّ إننا بنزق صخرة كبيرة مستحيل تتحرّك ... مش بنلاقي ثمر واضح فممكن نيأس
    • و الشيطان بيلعب جداً على الحتة دي ... و يقول لكل خادم: اعمل حاجة تانية في الدنيا ممكن تجيب فايدة
    • لازم الخادم يقابل كده بالصلاة ... و يطلب من ربنا: يا رب ماذا تريد أن أفعل؟
    • ربنا بيجاوب بحنان

      يا ابني لم أتوقع منك تحريك الصخرة ... لكن انظر إلى عضلات يديك، كيف صارت أقوى كثيراً بسبب دفع الصخرة

    • و ربنا استجاب لطاعة خادمه و حرّك الصخرة

  • ده اللي حصل مع بطرس يوم الخمسين ... ربنا هو اللي حرّك قلوب الناس

  • أول ثمر للخدمة يناله الخادم مش المخدوم ... بالإيمان و الطاعة
  • الخدمة أحد أعظم المنابع اللي تغذي بالروح ... البعد عنها هايخلينا زي الشجرة اللي هاتدبل لو لم تُروى ... مافيش أي منبع تاني ممكن يعوّض غياب الخدمة


مقياس النجاح: التعب أم الثمر؟

  • حكاية رمزية: الشجرة (موجودة في ال slides، اضغط على الصورة)
    • زي قصة شجرة الطاعة (غصن جاف .. مهما رويته مش هايثمر)
    • أوقات احنا نفكّر كده في المخدومين: مافيش فايدة
    • ربنا ممكن يعمل معجزات .. لو الخادم فِضِل عنده إيمان و طاعة و مثابرة
    • عشان يكون فيه ثمر ... لازم يكون فيه أصل قوي (خادم ماسِك في ربنا)


  • الموضوع برضه محتاج وقت

  • مراحل العمل في الأرض:
    1. الحارث ... يحرث الأرض و يساويها ...
      في بداية الزراعة، الأرض شكلها بور جداً .. مستحيل تثمر!

    2. الزارع : يرمي البذار في الأرض ...
      هل ده تبديد للبذار؟ ليه الزارع رمى في كل الأراضي مش بس الأرض الجيدة؟
      لأن دي مسئولية ربنا (الله الذي ينمّي) ... ماتستخسرش كلمة ربنا في أي حد

    3. الساقي : يسقي الأرض ... زي الخادم اللي عايز يوصّل كلمة ربنا للكل ...
      أنا كخادم، مش دوري بس أقاوم العادات السيئة (الحشيش اللي في الأرض) بل أستبدلها بكلمة ربنا

    4. الحاصد : بيلم الثمر! ييجي بس لحظة جمع الثمار

    بس كل واحد فيهم بياخد أجره

    يَجِبُ أَنَّ الْحَرَّاثَ الَّذِي يَتْعَبُ، يَشْتَرِكُ هُوَ أَوَّلًا فِي الأَثْمَارِ

    تيموثاوس التانية 2 : 6

  • طب الأجرة تبقى إزاي؟

      الأجرة عند ربنا حسب التعب مش الثمر

      كُلَّ وَاحِدٍ سَيَأْخُذُ أُجْرَتَهُ بِحَسَبِ تَعَبِه

    • ده قمة العدل عند ربنا ... هو الوحيد اللي بيقيّم كده
    • خادم ابتدائي أو حضانة أو إعدادي هو اللي بدأ الشغل من الأول .. و ممكن يطلع المخدوم كاهن أو خادم عظيم بعد كده حتى لو مابانش في وقتها
    • السيد المسيح نفسه بالجسد لم يكن حاصداً بل زارع ... ساب الثمر لتلاميذه و ولاده
    • فيه أنبياء و عظماء تعبوا كتير جداً ... و حتى لو الثمر بان لنا إنه قليل، مكافأتهم عظيمة عند ربنا (زي إرميا و نوح)
    • فيه ناس ماتعبتش تقريباً بس الثمر بان كتير (زي يونان النبي) ... بس ده مش معناه إنه أخد أجر أكبر عند ربنا

الخدمة للجميع

    ماينفعش يبقى فيه حد عاطل في الكنيسة كخدمة ... العضو الخامل يضمر

  • أي عضو للكنيسة لازم يكون له دور ... ماينفعش أكون سمّيع

  • و الخادم اللي بيقف حتى فترة بسيطة بيخسر كتير

  • لازم نقاوم الفتور

فرحة ربنا بخدمتنا

قصة رمزية: واحد تاه من العيلة في يوم من الأيام ... بيبقوا مشغولين عليه جداً ... لو حد لقاه و ودّاه ليهم بيبقوا مبسوطين انبساط مش عادي

ربنا بينبسط كده لما نرجّع ولاده ... خدمتنا ليها فايدة عظيمة


ملخص: قواعد الثمر

  • الثمر من نفس نوع الزرع ... هاتزرع زرع روحي بأمانة هاتحصد

  • البذار قليلة و الثمر كثير جداً

  • الزرع في الخفاء ... و الثمر في العلن

  • الوقت طويل بين الزرع و الحصاد ... لكن الثمر هاييجي

  • الثمر غالي جداً عند ربنا

ربنا يدينا نثمر في خدمتنا


عجبتك الوعظة؟


  • تقدر تعمل account على الموقع من هنا و تحتفظ بالوعظة على صفحتك في ال favourites
  • تقدر تعمل share للصفحة دي مع أصحابك و كنيستك عشان نسمع و نستفيد بالوعظة دي مع بعض
  • تقدر تعمل download لكلام الوعظة على الجهاز بتاعك

نرحب جداً بكل الوعظات سواء اللي متسجلة لخدام في الكنيسة أو أي وعظة انت سمعتها و حابب تشاركها مع إخواتك ... لو سمعت وعظة حلوة تفيد الشمامسة من أي مرحلة عمرية ابعت لنا