لاويين

ذبائح العهد القديم نوعين:

• تقدمة شُكر:
  ناس بتشكر ربنا بتقديم عيّنة بسيطة من اللي ربنا أعطاه لهم
• ذبائح اعتذار:
  تقديم ذبيحة حيوانية (دم) للاعتذار لربنا على خطية مع الاعتراف بها .. بيموت الحيوان (رمزياً) بدل الإنسان (لأن أجرة الخطية موت) و يكفّر (يغطّي) الدم على الخطية (زي ما هايتشرح أكتر بعد كده)

• الذبائح دي بتخلّي بني إسرائيل دايماً شايفين رحمة ربنا (غفرانه) لكن كمان عدله و عدم سماحه بالخطية
• الجزء ده بيبدأ به السفر زي ما احنا بنبدأ القداس بصلاة الصُلح (الصُلح تم بصليب ربنا يسوع، ذبيحة العهد الجديد)
• ربنا أعطى فرصة لكل واحد يقدّم ذبيحة حسب مقدرته (بقر للأغنياء، و ممكن غنم، و ممكن حمام أو يمام للفقراء)
• ذبيحة الخطية الخاصة بالكاهن أو الجماعة كلها يُدخَل بدمها إلى القدس (عكس الذبيحة الخاصة بشخص عادي، دمها بيبقى على مذبح المحرقة فقط)

رسامة هارون و بنيه ككهنة

طقس رسامة هارون و بنيه (على يد موسى بدُهن المسحة المقدس اللي يرمز للميرون) ككهنة لهم أدوار:

• تقديم الذبائح عن أنفسهم و عن الشعب
• شفعاء بين الشعب و الله (لأن الشعب فشل في الحفاظ على عهده مع الله، ماقدروش يكونوا قديسين)
• ناس مكرّسين (مخصّصين / مقدَّسين) يقدروا يتكلّموا مع الله في حضرته و يشفعوا في الشعب (زي ما موسى كان بيعمل)

موت ناداب و أبيهو

حدث صعب في بداية الكهنوت و عقاب شديد من ربنا عشان يفهّم شعبه من الأول إنهم لازم يكونوا قديسين عشان يتمتّعوا بحضرته

• إصحاح 11 الأطعمة الطاهرة و النجسة:
  • ربنا بيوصيهم مايكلوش حيوانات معيّنة (زي الخنزير و الأرنب) و بعض أنواع الطيور و المخلوقات البحرية
  • طبعاً فيه معاني و تأملات: إن اللي بيجتر ده يرمز لمن يلهج في كلام ربنا نهاراً و ليلاً .. و من يشق الظلف مثال لمن يقبل كلمة ربنا (العهد القديم و الجديد معاً) أو من يقبل الآب و الابن معاً
  • و ناس بتقول إن دي عادات صحية أو رموز عشان يفتكروا دايماً فكرة القداسة و إنهم مش زي باقي الأمم
  • طبعاً إحنا في العهد الجديد ماعندناش أطعمة نجسة (أعمال الرسل 10) .. بل ما يخرج من الفم و القلب هو اللي ينجّس مش ما يدخل
• إصحاح 12 الولادة:
  • شريعة الختان (للابن الذَكَر فقط طبعاً)
  • تقديم ذبيحة بعد تطهير الأم (40 يوم من ميلاد الابن أو 80 يوم من ميلاد البنت)
  • ده اللي بنقراه في إنجيل النوم: العدرا و القديس يوسف النجار راحوا الهيكل في اليوم ال40 لميلاد ربنا يسوع و معاهم ذبيحة الفقراء (فرخي حمام)
  • ده رمز لحالة الخطية اللي فيها طبيعة الإنسان (بالخطايا ولدتني أمي)
• إصحاح 13 و 14 الأمراض الجلدية:
  • الأمراض الجلدية (زي البَرَص كده) .. حالة النجاسة بتبقى مؤقتة فترة من الوقت فيها انعزال عن الجماعة
  • البَرَص كان مرض مرتبط بالخطية .. و كانت الناس تعتبره لعنة و عقاب من ربنا
  • لكن بعد ما يطهر الابرص، يرجع المحلة تاني بعد تقديم ذبائح معيّنة
• إصحاح 15 الإفرازات الجسدية:
  • نفس الكلام عن السيل (إفرازات جسدية معيّنة) تنجّس الإنسان
  • لكن لوقت محدود، بعدها يرجع يطهر تاني

• إصحاح 16 و 17 طقس يوم الكفارة:
  • الكاهن بياخد تيسين
  • تيس منهم بيُذبَح و يُنضَح من دمه على قدس الأقداس (موضع حضرة الله) .. ذبيحة خطية عن خطايا و نجاسات الشعب
  • و التاني يضع الكاهن يديه عليه معترفاً بخطايا الشعب كله (بيضع الخطية رمزياً عليه) و بعدين بيطلقه في البرية
  • بنفهم من إصحاح 17 إن دي مش محاولة لإرضاء إله (غاضب من شعبه) بل نعمة من إله صالح يحب شعبه و عايز ينقذهم و بفديهم من خطيّتهم
  • و ده معنى كلمة (كفّارة): تغطّي خطاياك
    to cover your sins
• بعض التأملات و المعلومات:
  • ده اليوم الوحيد المسموح فيه لرئيس الكهنة يدخل لقدس الأقداس .. يقدّم دم عن نفسه و عن الشعب .. في هيبة و استعداد عظيم جداً
  • التيس اللي بيوضع عليه خطايا الشعب ده اسمه (كبش الفداء) .. و التعبير المشهور جي من الشريعة دي
    scapegoat
  • انطلاق التيس ده بالخطية رمز لمحو الخطية من الشعب
  • طبعاً بيسبق الذبائح دي ذبيحة بخور .. و البخور من أهم الذبائح من العهد القديم زي ما ممكن نقرا هنا
  • إصحاح 17 بيركّز على عدم ذبح ذبائح للأوثان و عدم أكل الحيوانات بدمها (يعني بدون سفك دمها)

• إصحاح 18 البُعد عن العلاقات الجنسية المُحَرَّمة:
  • الإصحاح ده اتكرّرت فيه كلمة (أنا الرب) 7 مرّات .. يعني ربنا اللي بيتكلّم و بيوصي شعبه بما يجب أن يفعلوه عشان يكونوا قديسين
  • طبعاً المجتمعات حواليهم كانت وثنية بما فيها من ممارسات جنسية خاطئة، فربنا بينبّه شعبه إنهم مختلفين عن باقي الشعوب: مايعملوش زيّهم .. بسبب خطايا الشعوب دي ربنا هايطردهم من الأرض
  • طيب يا رب نعمل إيه؟ ربنا بيقول: احفظوا وصاياي فتحيوا .. لو مامشيتوش على وصاياي بل عملتم زي باقي الشعوب، هايكون مصيركم زيّهم (ربنا إله عادل و ماعندوش مكيالين)
  • الوصية الواضحة: ابعدوا عن الزنا و عن المِثلية في العلاقات .. اللي بيعمل كده على طول تُقطَع تلك النفس من الشعب
  • وصية تانية واضحة: ابعدوا عن عبادة الأوثان بكل الممارسات اللي فيها
• إصحاح 19 و 20 وصايا في العلاقات بين الناس:
  • بعد كده بينتقل الكلام لوصايا كتير متنوّعة .. و برضه في آخر كل وصية: (أنا الرب)
  • زي العناية بالفقراء:
    ربنا بيقول لهم لمّا يحصدوا أرضهم مايجزّوهاش لآخرها بل يسيبوا حبّة للفقراء عشان يلقّطوا وراء الحصّادين (زي ما راعوث عملت في حقل بوعز)
    و عندما تحصدون حصيد أرضكم لا تكمل زوايا حقلك في الحصاد. و لقاط حصيدك لا تلتقط. و كرمك لا تعلّله، و نثار كرمك لا تلتقط. للمسكين و الغريب تتركه. أنا الرب إلهكم. (لاويين 19 : 9 و 10)
    لا تغصِب قريبك و لا تسلِب، و لا تُبِت أجرة أجير عندك إلى الغد. (لاويين 19 : 13)
  • زي الالتزام بالعدل و المحبة:
    تفادي العثرة للضعفاء و الحُكم بالعدل و عدم الكراهية
    لا تشتم الأصمّ، و قدّام الأعمى لا تجعل معثرة، بل اخشَ إلهك. أنا الرب. لا ترتكبوا جوراً في القضاء. لا تأخذوا بوجه مسكين و لا تحترم وجه كبير. بالعدل تحكم لقريبك. لا تسعَ في الوشاية بين شعبك. لا تقِف على دم قريبك. أنا الرب. لا تُبغض أخاك في قلبك. إنذاراَ تُنذِر صاحبك، و لا تحمل لأجله خطية. لا تنتقم ولا تحقد على أبناء شعبك، بل تحب قريبك كنفسك. أنا الرب. (لاويين 19 : 14 ل 18)
  • إصحاح 20 فيه عقوبات صارمة و رادعة على خطايا الزنا و عبادة الأوثان و المِثلية .. عشان من الأول ماحدّش يدخّل هذه النجاسات في الشعب

• طبعاً الكهنة كوسطاء بين الله و الناس، عليهم معايير أعلى للقداسة من الشعب العادي
• زي مثلاً عدم التعبير عن الحُزن بطريقة جسدية .. و زي غياب العيوب الخلقية (رمز للخطايا)
• و نلاقي معنى مهم: ماينفعش الاقتراب من الأقداس لإنسان نجس (يعني لازم توبة حقيقية قبل التناول) .. و ماينفعش الغريب ياكل من الأقداس (لازم الانضمام لشعب ربنا بالمعمودية قبل التناول)

أعياد سنوية:

1. إصحاح 23 : 4 ل 8 عيد الفصح:
   • ده في اليوم 14 من الشهر الأول
   • ده تذكار لل10 ضربات و خلاص الله لإسرائيل من العبودية في مصر .. نفس طقس الفصح الأول
   • طبعاً خروف الفصح من الرموز الواضحة و المشهورة لصليب ربنا يسوع .. و الصلب حصل يوم عيد الفصح .. فأصبح الفِصح بالنسة لنا هو عيد القيامة
   • يوم خميس العهد ربنا يسوع أسّس لنا فصح العهد الجديد (الإفخارستيا)
2. إصحاح 23 : 4 ل 8 عيد الفطير:
   • 7 أيام بعد الفصح على طول
   • ده تذكار لآخر ليلة قضوها في مصر و إنهم مشيوا من مصر مستعجلين جداً
3. إصحاح 23 : 15 ل 22 يوم الخمسين:
   • بعد 50 يوم من الفصح
   • ده فيه تقديم لربنا من خير و ثمر الأرض (شكر لبركة الرب)
   • طبعاً الروح القدس حَلّ في اليوم ال50 على الرسل، فالعيد المقابل له عندنا هو عيد حلول الروح القدس
4. إصحاح 23 : 23 ل 25 يوم الأبواق:
   • ده بيكون في اليوم ال1 من الشهر السابع (رأس الشهر)
   • ده اللي بيبدأ فيه الاستعداد للعيدين الجايين
5. إصحاح 23 : 26 ل 32 يوم الكفارة العظيم:
   • ده بيكون في اليوم ال10 من الشهر السابع
   • ده اللي اتشرح طقسه في إصحاح 16
   • يوم التوبة و تكفير الخطايا
6. إصحاح 23 : 33 ل 43 عيد المظال:
   • ده في اليوم ال15 من الشهر السابع و بيستمر 7 أيام
   • طقسه جميل: فيه السُكنى في خيام و احتفال بأغصان النخل و الزيتون و الماء
   • ده تذكار لسُكنى إسرائيل في الخيام في الصحراء و عناية ربنا بهم
   • في اليوم التامن من العيد كان الاحتفال بالماء و رشّه على المذبح و هم بيسبّحوا الله
   • في اليوم ده في حياة ربنا يسوع، صرخ و قال: "إِنْ عَطِشَ أَحَدٌ فَلْيُقْبِلْ إِلَيَّ وَيَشْرَبْ. مَنْ آمَنَ بِي، كَمَا قَالَ الْكِتَابُ، تَجْرِي مِنْ بَطْنِهِ أَنْهَارُ مَاءٍ حَيٍّ" (يوحنا 7 : 37 و 38)
7. إصحاح 23 : 9 ل 14 الباكورة:
   • ده بيكون في الربيع
   • ده فيه الشُكر لربنا إنه أعطلهم أرض الموعد و بارك لهم في ثمر الأرض
   • بيقدّموا فيه لربنا من باكورة ثمار الأرض

أعياد موسمية:

1. إصحاح 23 : 1 ل 3 السبت:
   • بيكون يوم مقدّس للرب و مافيهوش أي شُغل
   • طبعاً ده عندنا بقى يوم الحد
2. سفر العدد إصحاح 10 : 10 رأس الشهر:
   • ده عيد شهري في رأس الشهر
   • شبه اللي بنعمله ككنيسة (يوم 29 من الشهر القبطي فيه الاحتفال بتذكار البشارة و الميلاد و القيامة)
3. إصحاح 25 : 1 ل 7 السنة السابعة:
   • كل سابع سنة، يريّحوا الأرض و مايزرعوهاش
   • طبعاً دي ثقة في بركة ربنا اللي هايعطيهم قوت يومهم في السنة السابعة
4. إصحاح 25 : 8 ل 55 السنة ال50 (سنة اليوبيل):
   • كل 50 سنة، برضه يدّوا سنة أجازة للأرض (يعني زرع السنة ال48 يكفيهم كمان السنة 49 و 50)
   • لكن الأهم في السنة ال50 دي هي إطلاق كل الديون و كل الأراضي المرهونة و العبيد و الإماء .. ده طبعاً رمز لفداء ربنا يسوع لينا و عشان كده قرأ نبوة إشعياء:
     روح السيد الرب عليَّ، لأن الرب مَسَحَني لأبشّر المساكين، أَرسَلَني لأعصِب منكسري القلب، لأنادي للمسبيين بالعِتق، و للمأسورين بالإطلاق. لأنادي بسَنَة مقبولة للرب، و بيوم انتقام لإلهنا. لأعزّي كل النائحين. (إشعياء 61 : 1 و 2)

• إصحاح 26 بركات الطاعة و لعنات العصيان:
  • ربنا بيّن لهم بركات طاعة الوصية (خير في الأرض - سلام و أمان - يكونوا شعب الله و الله يسكن بينهم)
  • و بيّن لهم عقوبات العصيان .. و نلاحظ إنها عقوبات تدريجية لأن هدفها التوبة (من أول قلة الخير في الأرض لحَد إن الناس تاكل ولادها و ييجي عليها سبي و تُطرَد من الأرض) .. و الخطوات دي فعلاً هي اللي حصلت بعد كده وقت سبي إسرائيل و يهوذا رغم تحذيرات الأنبياء
  • لكن يبقى ربنا أمين لعهده مع شعبه .. لو تابوا حتى بعد كل ده هايردّهم مرة تانية
• إصحاح 27 النذور:
  • بيتكلم عن أهمية التزام كل الناس بأي ندر يندروه لربنا