نحميا

صلاة نحميا

• يبدأ الإصحاح بزيارة أحد إخوة نحميا من أورشليم إلى شوشن عاصمة فارس .. نحميا بيسأله على أحوال أورشليم و كله اشتياق أن يسمع الخير عن مدينة الآباء و الأجداد .. أرض الموعد و الهيكل الذي تجدّد
• لكنه يجد إجابة صادمة: الشعب في حالة عار و شر عظيم، و المدينة سورها منهدم (أي حد يدخل و يخرج و يعمل اللي هو عايزه)
• مع الصدمة يبان معدن نحميا كرجل إيمان وصلاة و أفعال لا أقوال .. نجده يجلس و يبكي و يصوم و يصلّي صلاة رائعة فيها كل مقومات الصلاة زي ما نقرأ في التأمل تحت

الإصحاح ده يعلّمنا إننا في مشاكلنا نرفع قلوبنا لربنا في تواضع و انسحاق و ثقة في رحمته

طموح نحميا الروحي

• بعد الصوم و الصلاة و التفكير، جاءت الفرصة لنحميا لمّا الملك سأله عن سبب حزنه .. نحميا بحكمة قال له إنه عايز يروح يبني مدينة (مقابر آبائه) .. و الملك وافق و أيّد نحميا بالمعدّات و كمان بحماية عسكرية و رسائل تؤكد موافقة الملك
• نحميا وصل أورشليم، و بمنتهى الحكمة أخفى خطته لحد ما عمل دراسة ميدانية تامة للمدينة و السور و كوّن خطة محكمة .. ساعتها جمع الرؤساء و قال لهم خطّته وقال لهم إن ربنا يعطيهم النجاح .. و هم اتحمّسوا جداً
• طبعاً رؤساء المدن المحيطة بهم بدأوا المقاومة لأنهم بيكرهوا أورشليم و مش عايزين مصالحهم تقف .. لكن نحميا لم يهتم بسخريتهم من ضخامة المشروع ولا تلميحاتهم

الإصحاح ده يعلّمنا إننا لا نيأس مهما كانت الحروب و التجارب ضدنا!! ده شغل ربنا و هو هاينجّحه حتى لو بالمنطق مش ممكن .. إله السماء يعطينا النجاح (إحنا متأكدين، و عشان كده) نحن عبيده نقوم و نبني

بناء السور

الخطة الجميلة بتاعة نحميا إنه يوزّع بناء السور على كل فئات الشعب (كهنة ولاويين و عظماء و عمّال بكل أنواعهم) .. كل واحد يبني قدام بيته أو منطقته فقط لحد ما السور يتّصل .. والناس معظمهم استجاب و تحمّس و أنجز في العمل

نتعلم هنا إن أحسن خطة لبناء الكنيسة هي إن كل واحد يبقى مسئول عن بيته و أسرته و أولاده .. المجتمع المسيحي كان كده زمان قبل ما يكون فيه في الكنيسة اجتماعات و مدارس أحد، كان الدور على البيت

الحرب الروحية

نشوف هنا حربين من الحروب المشهورة للشيطان في صورة طوبيا و سنبلط و جشم:

• السخرية والاستهزاء:
  "أكيد مش هيقدروا يبنوا و أكيد محدش يسمح لهم .. ده لو طلع تعلب هيهدّ لهم السور بتاعهم ده" .. و نحميا على طول رفع الموضوع بالصلاة لربنا، و حمّس الشعب اللي كان بيشتغل بروح واحدة و لم يؤثر فيهم كلام الأعداء
• التخويف:
  عن طريق جواسيس يندسّوا وسط الشعب و يضعفوا عزيمتهم بالكلام عن خطة لقتلهم و الهجوم عليهم (و ممكن يكون فعلاً بدأ تنفيذ هجمات على تجمعات صغيرة) .. والشعب فعلاً بدأ يخاف .. لكن نحميا حمّسهم و عمل حلّ (يد تبني و يد تحمل السلاح): نوبات حراسة عشان لو حصل هجمات يقدروا يصدّوا و يجمعوا بعض بالبوق

اللي بيعمل شغل ربنا هيقابل مقاومة من الشيطان .. لو استسلم لها هيخاف و يرجع .. لكن لو عمل زي نحميا و رمى على ربنا بالصلاة و كان له همّة و قلب على الشغل، ربنا مستحيل هيخذله بل هيقدر يغلب الشيطان و كل ألاعيبه

محبة الفقراء

• بعد ما بناء السور مشي كويس، بدأت تظهر على السطح مشكلة الطبقية في الشعب ده .. ناس معظمها غلبان و راهن أرضه، و اضطر يبيع أولاده و بناته عبيد عشان يقدر يدفع الضرائب للملك الفارسي و يعيش .. بينما السادة مافيش في قلبهم رحمة تجاه إخوتهم بل يقرضوهم بالربا بدل ما يساعدوهم
• نحميا وبّخ هذا السلوك بشدة و قال لهم: ده إحنا في السبي كنّا بنحاول نشتري و نُطلِق إخواتنا من العبودية تقوموا انتم مستعبدينهم كده؟! كل الناس ترجّع الأراضي للفقراء و بلاش ظُلم و ربا، انتم كده كده أغنياء و مش محتاجين
• قدام قوة منطقه و تصرّفه هو الشخصي (عطفه على الفقراء و تنازله عن كل حقوقه المادية)، الأغنياء استجابوا و تابوا، و سبّح الشعب كله ابتهاجاً

نحميا يعطينا مثل للقائد العفيف اللي بيعطي شعبه بمحبة كل ما عنده بدل ما يستفيد مادياً من وظيفته (و ده حقه) .. و كل ده في سرية بينه و بين ربنا عشان خاطر ربنا بس

شائعات وافتراءات

الإصحاح ده فيه مزيد من الحروب على نحميا .. لكن ينتهي بانتصار نحميا و إكمال بناء السور

• حرب التعطيل: حاول أعداء نحميا يعطّلوا الشغل و يقولوا له: طيب تعالى نتفاوض و نتكلم ونشوف النتيجة إيه .. و هم مافيش في نيّتهم غير الشر لنحميا (إنه قدام الناس يسيب الشغل .. و لمّا يوصل لهم يقتلوه) .. لكن نحميا كان فاهم إنه يعمل عمل ربنا اللي ماينفعش يتعطّل ولا يضيع فيه وقت
• حرب الشائعات: هدّدوا نحميا إنهم يعملوا فتنة و يقولوا إنه عايز يتمرّد على ملك فارس و إنه يبني المدينة و يحصّنها عشان يحكمها .. طبعاً الهدف من كده إرباك نحميا و محاولة تعطيله عن العمل .. لكن نحميا صلّى و لم يعطِ هذه الشائعات أي اهتمام
• حرب (خَف على نفسك): دي حرب داخلية من أحد رجال العدو في صفوف إسرائيل: قال لنحميا ادخل الهيكل و امسك قرون المذبح عشان تبقى في أمان من خطر الأعداء .. طبعاً لو عمل كده الشعب كله هيخاف و يتوقّف الشغل تماماً .. لكن نحميا ردّ بطريقة رائعة: أرجُل مثلي يهرب؟
• حرب (دول ناس كويسين): دي حرب داخلية برضه من رجال العدو في صفوف إسرائيل: ناس بتقول لنحميا كلام خير على الأعداء عشان نحميا يلين من ناحيتهم فيجدوا طريقة للكلام معاه و إقناعه بإيقاف العمل .. لكن نحميا كان عنده تمييز و لم يلتفت لهذه الأكاذيب

نوع جديد من الحروب في الخدمة بيبيّنه لنا الإصحاح ده: حروب من الداخل .. عدو الخير أحياناً بيحاول يحطّم الكنيسة من داخلها .. و قادة الكنيسة محتاجين إفراز و تمييز عشان يفرّقوا بين كلام الحق و الكلام الباطل اللي شكله حق

تدبير الخدمة

الإصحاح ده فيه 3 دروس:

• تعيين مسؤولين عن النظام: نحميا لم ينفرد بالقيادة، بل استودع مسئولية نظام فتح الأبواب و الحراسة لبعض من إخوته صفتهم الرئيسية هي الأمانة .. بتعليمات واضحة عشان يعمل نظام في المدينة
• تسجيل بيانات الشعب: بعد بناء السور ييجي وقت التركيز على النظام الداخلي وبناء البيوت .. نحميا قرّر يعمل إحصاء كده لعائلات المدينة بأنسابهم عشان يشوف توزيعهم و احتياجاتهم .. و لمّا ظهر أن بعض الكهنة مش من نسل هارون، أوقفهم نحميا عن الخدمة
• جمع تبرُّعات للخدمة: طبعاً الكهنة و اللاويين المفروض مايشتغلوش غير في خدمة ربنا و يعيشوا على عُشور باقي الأسباط .. فبدأ نحميا بنفسه و عمل حملة تبرُّعات للكهنة و اللاويين عشان يركّزوا في الخدمة و يعرفوا يعيشوا .. و اشترك الرؤساء والشعب كله

دروس جميلة في الخدمة و تدبيرها بيعطيها لنا الإصحاح ده .. و كلمة (أمين خدمة) هي اسم حقيقي لأن أهم معيار في تدبير النظام هو الأمانة

توبة جماعية

• بعد دور الخادم العلماني (نحميا) في البناء و تنظيم المدينة و الناس، ييجي دور الخادم الروحاني (عزرا) في بناء الشعب روحياً و تعليمهم وصايا ربنا
• و الشعب جه لعزرا و طلب منه (يوم روحي) مركَّز كده على الشريعة (أسفار التوراة) اللي أُهمِلَت و ماكانوش عارفينها مدة طويلة ... و عزرا قعد يقرا للشعب كله من على المنبر طول النهار و الشعب في منتهى التركيز والإصغاء له و للّاويين اللي كانوا بيساعدوا في التفسير
• بعد كده اشتغلت نعمة ربنا في النفوس الجائعة له اللي كلها محبة و حماس .. ربنا حرّك قلبهم بتوبة صادقة بعد ما عرفوا قد إيه هم بعاد عن الوصية و مهملين فيها .. و إن ده سبب العار اللي كانوا فيه و السبي
• و جه دور الخادم الروحي الحكيم اللي حوّل دموع التوبة لمشاعر فرح و خلاص .. بدل مشاعر يأس و إحباط .. نحميا وعزرا شجّعوا الشعب و فرّحوهم
• و اكتشفوا أنهم في أول الشهر السابع (موعد الاحتفال بعيد المظال زي ما مكتوب في سفر اللاويين) .. فعيّدوا به عيداً روحياً لمدة 7 أيام كلها فرح و تركيز في كلمة ربنا

التوبة و دموعها الصادقة .. أكتر حاجة تفرّح ربنا و تفرّح التائب نفسه

الاعتراف بالخطية

استمرّت النهضة الروحية للشعب و لم تنطفئ .. بعد أسبوعين تقريباً من عيد المظال، عملوا يوم روحي امتزج فيه التسبيح بالتوبة:

• التسبيح:
  للّة الخالق العظيم .. اللي اختار إبراهيم و ميّزه و قدّسه، و وعده إن شعبه يرث أرض الموعد .. الوعد اللي تحقّق بعد آيات و عجائب كثيرة (شق البحر - المن - عمود السحاب وعمود النار …) .. و لمّا ربنا أعطاهم الأرض كان طويل الأناة جداً عليهم في فترة القضاة و الملوك .. و حتى لمّا حصل السبي، ربنا رتّب عودتهم برحمته
• التوبة:
  على كل التذمُّر و العصيان على مدار تاريخهم من ساعة خروجهم من مصر (زي حادثة العجل الذهبي) مروراً بفترة القضاة اللي كان فيها ارتداد روحي مستمر و حتى فترة الملوك اللي في الآخر رفضوا ربنا تماماً

الإصحاح ده من أجمل إصحاحات التسبيح .. ما أجمل استمرار النهضة الروحية و عدم انطفائها سريعاً (الأرض الجيدة مش الأرض اللي مالهاش أصل)

تجديد العهد

• بعد التوبة و الاعتراف، ييجي العمل الإيجابي و البداية الجديدة .. الشعب اللي قلبه مع ربنا عمل ميثاق مكتوب بعهد جديد مع ربنا .. و وقّع على الميثاق ده نحميا و الكهنة و اللاويين و عظماء الشعب
• الميثاق ده كان فيه:
  • إنهم هيعيشوا شعب مقدس لربنا (شريعته اللي تحرّكهم مش اللي بيعمله باقي الشعوب)
  • مش هيتزوّجوا من الشعوب الوثنية (ده على طول هو سبب فسادهم و زَيَغانهم)
  • يلتزموا بالشريعة ناحية ربنا (تقديس السبت و العشور و البكور و التقدمات …)
  • يلتزموا بالشريعة ناحية إخوتهم (إسقاط الديون و منع الربا و الالتزام بأعمال الرحمة ...)

التوبة لازم بعدها على طول عمل (إيجابي) .. بداية جديدة حقيقية .. و لو توبة جماعية كمان بتكون عظيمة جداً لأن كل واحد بيفكّر أخوه و يشجّعه

أورشليم الجديدة

• خطة تسكين أورشليم: أورشليم كانت واسعة جداً على عدد سكّانها الحالي .. و طبعاً ده هيعمل خطر عليها و يقلّل الازدهار فيها .. بالتالي خطة نحميا إنه يسكّن فيها عظماء الشعب مع الكهنة و اللاويين و النثينيم (المرتلين) مع سبطَيّ يهوذا و بنيامين مع 10% من باقي الأسباط
• تدشين السور: و عملوا احتفال كبير جداً و يوم عيد لتدشين السور وسط ذبائح و تسابيح من الكل (شعب و كهنة ولاويين) .. تسبيح و فرح اتسمع على مسافة من المدينة (زي يوم أحد السعف)
• لمسات أخيرة في النظام: وضع نحميا اللمسات الأخيرة في تنظيم العبادة و المخازن و السور و التسبيح

تنظيم و تدبير الخدمة و الإداريات فيها حاجة مهمة و مش ثانوية .. لازم يكون فيه ترتيب و تدبير مش هرجلة (إلهنا إاه نظام)

• نحميا رجع تاني لوظيفته في فارس .. و بعد شوية عمل افتقاد لأورشليم و شاف إيه الأحوال .. و كانت الأحوال كارثية:
  • خدمة الهيكل:
    توقفت و لم يعُد أحد يهتم بإرسال العشور للّاويين و الكهنة .. فرجعوا يشتغلوا في الأرض تاني
  • الحالة الروحية:
    تدهورت بشدة .. اليهود اختلطوا بالشعوب المحيطة و تزوّجوا منهم
  • حالة الأسوار:
    لم يكُن هناك مراقبة على الأسوار، و أي تاجر كان يقدر يدخل و يخرج براحته حتى في يوم السبت اللي ممنوع فيه العمل حسب الوصية
• نحميا ظبّط كل الأوضاع دي بكل حسم و حزم