برنامج فتح كلام

ملاية من السماء ... أعمال الرسل 10


تأمل رائع عن رؤيا بطرس الرسول (أعمال الرسل 10) ... إزاي ربنا بيقبل و بيستخدم كل الناس ... و إزاي أنا كمان لازم أقبل الكل ... لأن كلنا لينا مكان على (ملاية من السماء)


وعظة ملاية من السماء (عن رؤيا بطرس الرسول اللي بتبيّن إن ربنا بيقبل الكل) من برنامج فتح كلام لأستاذ عادل ألفونس


#قراءة:
#استماع:

العنصرية و التمييز بين الناس من أكتر العيوب و الصفات السيئة الموجودة في الإنسان لحد دلوقتي ...
رجل يحس إنه أفضل من ست، غني يحس إنه أفضل من فقير، أبيض يحس إنه أحسن من أسمر، أوروبي أو أمريكي يحس إنه أفضل من إفريقي أو آسيوي ...
حتى في الكنيسة، مسيحي ممكن يحس إنه أحسن من بقية الناس ...
طبعاً الموضوع ده عكس فكر ربنا تماماً، لكن كلنا ممكن نقع فيه ... حتى بطرس القديس و الرسول العظيم وقع في الفكر ده ...
لكن ربنا ورّاه رؤية غيّرت له، و للبشرية كلها الفكر ده ... بملاية من السماء


قصة إيمان كرنيليوس قائد المئة الأممي ... نلاقيها في أعمال الرسل إصحاح 10
و نشوف فيها إزاي بطرس اليهودي المتمسك و المفتخر بشريعته إلى درجة رفض الآخرين، إزاي ربنا خلّاه أول رسول يكرز لحد من الأمم ... تعالوا نشوف


القصة

القديس بطرس ساعتها كان في مدينة يافا ... طلع السطح يصلّي صلاة الساعة السادسة (12 الظهر) ... بعدها جاع جداً ... و شاف رؤيا

اذبح و كُل

السماء مفتوحة، وإناء نازلا عليه مثل ملاءة عظيمة ... وكان فيها كل دواب الأرض والوحوش والزحافات وطيور السماء ... وصار إليه صوت: «قم يا بطرس، اذبح وكل»

أعمال الرسل 10 : 11 - 13

الحقيقة رد القديس بطرس كان عجيب جداً!! كان عارف إن ربنا اللي بيكلّمه لكن رفض ياكل مرة و 2 و 3

لأ يا رب

فقال بطرس: «كلا يا رب! لأني لم آكل قط شيئا دنسا أو نجسا». فصار إليه أيضا صوت ثانية: «ما طهره الله لا تدنسه أنت!». وكان هذا على ثلاث مرات، ثم ارتفع الإناء أيضا إلى السماء

أعمال الرسل 10 : 14 - 16

بعد كده القصة تستمر زي ما نقرأ في سفر أعمال الرسل إصحاح 10، إن ربنا خلّى كرنيليوس قائد المئة التقي يبعت رسل لبطرس و قال لبطرس يروح معاهم، و يكرز بطرس لكرنيليوس و بيته، و يحل الروح القدس على كرنيليوس و بيته
فيعرف القديس بطرس فكر الله:

الكل مقبول عند ربنا

بالحق أنا أجد أن الله لا يقبل الوجوه. بل في كل أمة، الذي يتقيه ويصنع البر مقبول عنده

أعمال الرسل 10 : 34 - 35

التأمل

ربنا داعي الكل و قادر يطهّر الكل و عايز بشارته توصل للكل ... و كل واحد فينا هيلاقي نفسه على الملاية ... الكتاب قال عن الملاية:

وكان فيها كل دواب الأرض والوحوش والزحافات وطيور السماء

أعمال الرسل 10 : 12
  1. دواب الأرض: لو أنا ماعنديش أي موهبة، ماعنديش حاجة تميّزني عن غيري، إمكانياتي قليلة، برضه لي مكان على الملاية ...
    زي القديس بطرس الرسول نفسه اللي ربنا حوّله من صياد عادي إلى أعظم رسول و قائد الرسل
    ربنا بيختار 'المزدرى و غير الموجود'
  2. المزدرى ... له مكان

    لو أنا متواضع في إمكانياتي، عندي ثقة إن حتى لو كده ليّ مكان على الملاية، أقول له يا رب ماعنديش غير فلسين، اقبلهم منّي ... لو لقيت حد عنده صغر نفس، هاطمّنه و أقول له إن ربنا قادر يعمل بالقليل اللي عنده و إن له مكان على الملاية

  3. الوحوش: لو أنا شخص قاسي، صعب الطباع، ماحدش بيقدر يحتملني، على طول في حالة ضيق و خناق مع الناس و مع نفسي، برضه لي مكان على الملاية ...
    زي القديس موسى الأسود اللي ربنا حوّله من رئيس عصابة إلى قديس عظيم، و زي القديس بولس الرسول اللي قال عن نفسه: كنت مضطهد و مفتري، لكن ربنا رحمه
  4. الصعب الطباع ... له مكان

    لو أنا قاسي القلب دلوقتي، مافقدش الأمل إن ليّ مكان على الملاية، أقول له يا رب: توّبني فأتوب و ظبّط طباعي ... لو لقيت حد قاسي أو عصبي أو عنيف، مش هارفضه أو أكرهه ... بل أظهر له محبة لإن له مكان على الملاية

  5. الزحافات: لو الدنيا ملطّشة معايا، ظروفي صعبة جداً، من إحباط لإحباط و من ضيق لضيق، برضه لي مكان على الملاية ...
    زي نازفة الدم و المخلّع اللي رغم طول فترة المرض و الظروف الصعبة لم يفقدوا الأمل و ربنا تحنّن عليهم و في الوقت المناسب شفاهم
    ربنا هو اللي قال' تعالوا إليّ يا جميع المتعبين و الثقيلي الأحمال و أنا أريحكم'
  6. اللي ظروفه صعبة ... له مكان

    لو أنا ظروفي الصعبة مطوّلة، على طول عندي تجارب و ظروفي مش حلوة، مافقدش الأمل إن ليّ مكان على الملاية، أخلّي رجائي في ربنا و أرمي عليه و هو هيتمجّد بيّ ... لو لقيت حد ظروفه صعبة، هاطمّنه و أقول له أكيد نصبر و هاتنتهي على خير لإن له مكان على الملاية

  7. طيور السماء: لو أنا شخص عندي أحلام و طموحات كبيرة جداً و مش عارف أحققها، برضه لي مكان على الملاية ...
    زي موسى النبي اللي كان نفسه يكون قائد لبني إسرائيل و يحرّرهم، لكنه اتكل على نفسه في الأول ففشل ... لكن بعد كده في الوفت الصح، ربنا دعاه و عمل أكتر بكتير من اللي كان هايزه و بقى أعظم نبي في العهد القديم
    ربنا هو اللي بيصنع النجوم و يحقق الأحلام
  8. الطَموح ... له مكان

    لو عندي طموحات عالية و كبيرة ليّ مكان على الملاية، أسلّم كل إمكانياتي لربنا و أثق في تدبيره و مواعيده و هو هيتمجّد بيّ ... لو لقيت حد طموح أشحّعه ماحبطوش و أقول له ربنا هيتمجّد بيك لإن ليك مكان على الملاية


احترم كل الناس ولا تحتقر إنسان .. قدّم المسيح للكل
... اوعى تقفل الباب في وش أي حد ... كلنا لينا مكان على الملاية


عجبتك الوعظة؟


  • تقدر تعمل account على الموقع من هنا و تحتفظ بالوعظة على صفحتك في ال favourites
  • تقدر تعمل share للصفحة دي مع أصحابك و كنيستك عشان نسمع و نستفيد بالوعظة دي مع بعض
  • تقدر تعمل download لكلام الوعظة على الجهاز بتاعك

نرحب جداً بكل الوعظات سواء اللي متسجلة لخدام في الكنيسة أو أي وعظة انت سمعتها و حابب تشاركها مع إخواتك ... لو سمعت وعظة حلوة تفيد الشمامسة من أي مرحلة عمرية ابعت لنا