أخبار الأيام الأول

• إصحاح 1: من آدم ليعقوب
  • السفر يبدأ بمجموعة من الأنساب و الأسماء و ده ممكن يخلّينا نحسّ بالملل و نقول (و إحنا مالنا؟) ... لكن في الحقيقة الكتاب المقدس هنا بيلخّص لنا العهد القديم من خلال الشخصيات المهمة و المميّزة اللي فيه
  • و في الإصحاح ده بنراجع شوية معلومات مهمة:
    1. من آدم لنوح: بنفتكر سقوط آدم، و قتل قايين لهابيل (النسل استمر عن طريق شيث) ... و إيمان نوح وقت الطوفان اللي من خلاله استمرت البشرية
    2. أبناء نوح: بنفتكر إن حام اللي استهزأ بأبيه هو اللي جه من نسله أعداء اليهود (اللي أتوا من نسل سام) بعد كده ... زي كنعان (اليبوسيين و الحثّيين و الجرجاشيين) و مصرايم - بينما نسل سام بيوصل لأبونا إبراهيم
    3. من إبراهيم ليعقوب: بنفتكر برضه الخطأ اللي في زواج إبراهيم من هاجر ... إسماعيل ولد أعداء لإسرائيل (زي قيدار) و برضه قطورة اللي تزوّجها إبراهيم في الآخر ولدت أعداء (زي مديان)
    4. اسحق ابن الموعد: جه منه يعقوب (إسرائيل) و عيسو (شعب أدوم اللي بقى عدو لإسرائيل)
• إصحاح 2: من يعقوب لداود
  • يعقوب جاء من نسله الأسباط ال12 ... بنفتكر يهوذا سبط الملوك (اللي من نسله داود) و لاوي سبط الكهنة (اللي جه من نسله هارون)
  • من يهوذا ييجي فارص (عن طريق ثامار)
  • بعد كده وصولاً إلى سلمون اللي تزوّج من راحاب
  • و ولدوا بوعز اللي اتجوّز راعوث و ولدوا عوبيد جد داود الملك
• إصحاح 3: الملوك من نسل داود
  • داود وأولاده: و كنّا شفنا اللي حصل مع أمنون وثامار، و أبشالوم، و أدونيا ابن حجيث، و الملك سليمان (سفر صموئيل الثاني)
  • ملوك يهوذا لحد السبي: من أول رحبعام بن سليمان لحد السبي (سفريّ الملوك)
  • العودة من السبي: بقيادة زربابل ... و بعد كده انتهى الملوك من نسل داود (سفر عزرا)

  إصحاح 4 بيقول لنا على بقية لسبط يهوذا مع سبط شمعون (اللي بعد سبي مملكة الشمال، جه جزء منهم و احتمى بأورشليم في عصر حزقيا الملك) ... و في وسط أسماء سبط يهوذا بنسمع عن يعبيص و صلاته

• إصحاح 5 ل 8: بقية الأسباط
  • إصحاح 5 يكلّمنا عن أسباط عبر النهر (رأوبين وجاد ونصف سبط منسّى اللي ملكوا شرق نهر الأردن) ... و نقدر نتعلّم من كل سبط درس:
    1. رأوبين: بكر يعقوب اللي كان المفروض يكمّل مسيرة الآباء البطاركة (إبراهيم و إسحق و يعقوب) ... لكنه اختار غلط و دنّس فراش أبيه، و بالتالي سبط رأوبين بقى سبط صغير و مانسمعش عن أي حد مميّز من هذا السبط
    2. جاد: سبط ممكن مانسمعش عنه، لكنه في حربه مع الشعوب اللي كانت ساكنة الأرض طلبوا معونة ربنا اللي أعطاهم انتصار رائع
    3. منسّى: اللي اتحسب سبط لوحده بسبب بركة يعقوب المضاعفة ليوسف ابنه ... كان سبط كبير جداً لكن للأسف لمّا استقرّوا في الأرض خانوا ربنا و عبدوا الأوثان، عشان كده سمح ربنا بسبي أشور لهم

  إصحاح 6 بيكلّمنا عن سبط لاوي (سبط الكهنة واللاويين) تحديداً في 3 أزمنة:
  1) قبل الوصول لأرض الموعد: بداية الكهنوت عن طريق تكريس ربنا هارون وأولاده من بعده ... و بنفتكر إن فيه من أولاده طلعوا وحشين (ناداب و أبيهو اللي قدّموا نار غريبة قدام ربنا و ذبيحة بطريقة لم يأمر بيها ربنا) و ولاد كمّلوا مسيرة الكهنة بطريقة مظبوطة (خصوصاً أليعازر الذي غار لربنا بعد انتشار الزواج من الأمم في الشعب)
  2) قبل داود: بعد الوصول لأرض الموعد، بنفتكر إن اللاويين مكانش ليهم مكان خاص بيهم بل كانت ليهم مُدُن الملجأ منتشرة في وسط أرض إسرائيل كلها
  3) من وقت داود: اللي عمل نهضة كبير جداً خصوصاً في خدمة التسبيح (بقيادة مرتّلين لاويين زي هيمان و أساف)

  • إصحاح 7 يكلمنا عن نسل بقية الأسباط (يساكر و بنيامين و نفتالي و منسّى و افرايم و أشير) اللي سبتهم أشور … بنسمع عن بنات صلفحاد من سبط منسّى (عدد 26 و 27) اللي حافظوا على اسم أبيهم اللي ماكانش عنده بنين
  • إصحاح 8 يكلمنا عن سبط بنيامين
    • من ناحية شاول الملك: أول ملك في إسرائيل اللي بدأ بداية رائعة لكنه بعد كده عمل خطايا كتير ما تابش عنها و ربنا رفضه
    • لكن قبل شاول فيه بطل و قاضي مهم جداً هو إهود بن جيرا رجل السيف و البوق (أحود في آية 6)
  • نلاحظ إن فيه سبطين لم يُذكَر لهم أنساب:
    • سبط دان: اللي يعقوب تنبأ عنه إنه هايكون أفعى على الطريق .. و التفاسير بتقول إن ضد المسيح ها ييجي منه
    • سبط ربولون: أسرع سبط سقط في الوثنية

  إصحاح 9 بيركّز على العائدين من سبي بابل، و كان معظمهم من الكهنة و اللاويين، و ده منطقي لأن مع السنين الكتير كتير من اليهود المسبيين بدأوا يعتبروا بابل بلدهم ... و رجّعوا طقس الخدمة اللي كان أيام داود الملك

إصحاح 10 يحكي قصة هلاك شاول زي ما نقرأها في صموئيل الأول 31، و بتحذّرنا إن شاول أول ملك اللي كان بدأ بداية روحية رائعة ... سقط في خطايا رهيبة و ربنا رفضه

• إصحاح 11 ل 21: مُلك داود
  أحداث من حياة داود (مذكورة في سفر صموئيل الثاني) زي ما بنشوف في الجدول

  إصحاح 12 يشرح إزاي جيش داود العظيم جداً تكوّن و المراحل اللي أبطاله انضموا ليه فيها:
  أبطال خرجوا معاه من الأول و هو هربان من شاول - أبطال انضمّوا له بعد كده و هو في صقلغ قبل ما يملك - أبطال انضموا له في حبرون وهو ملك على يهوذا فقط - أبطال انضموا له بعد ملكه على كل إسرائيل

  إصحاح 15 بيضيف لنا بعض المزامير اللي سبّحها داود يوم نقل التابوت إلى الخيمة الجديدة:
  1) مزمور 105 (احمدوا الرب. ادعوا باسمه. عرّفوا بين الأمم بأعماله)
  2) و مزمور 96 (سبّحوا الرب تسبيحاً جديداً)
  3) و مزمور 106 (احمدوا الرب لأنه صالح، لأن إلى الأبد رحمته.)

• إصحاح 22 ل 29: داود يحضّر لبناء الهيكل
  أحداث جديدة من حياة داود تركز على التحضير لبناء الهيكل
  • إصحاح 22 داود يجهز مواد البناء: داود فهم إن ابنه سليمان هو اللي يبني الهيكل (زي ما ربنا وعده)، و ساعد سليمان إنه يجهّز له كل المواد اللي محتاج لها من حجارة و خشب و حديد و نحاس
  • إصحاح 23 ل 26: تقسيم مسئوليات الخدمة على سبط لاوي
    1. (23) اللاويين:
       داود مش بس جهّز الأدوات بل كمان وزّع الخدمة بطريقة حكيمة على اللاويين، ما بين إشراف على الهيكل و بين خدمة (تسبيح و مساعدة الكهنة) و حراسة و دراسة للشريعة
    2. (24) الكهنة:
       داود كمان قسّم الكهنة إلى 24 فريق وزّع عليهم الخدمة بحيث كل فريق يمسك الخدمة فترة
    3. (25) المرتّلين:
       داود كمان قسّم المرتّلين إلى 24 فريق، بقيادة 3 كبار (هيمان و يدوثون و آساف) ... كان عنده 288 مرتّل خبير في التسبحة و استخدام الآلات الموسيقية، لأن خدمة التسبيح دي كانت مهمة جداً بالنسبة لداود نفسه، و كل جيل (أو معلّم أو مرتّل) بيسلّم الجيل اللي بعده
    4. (26) الحراسة و الخزانة:
       داود كمان قسّم خدمتين على اللاويين: خدمة الحراسة و خدمة أمانة الخزانة اللي فيها أدوات الخدمة من عشور و قمح و زيت و خمر (زي لجنة الكنيسة دلوقتي)
  • إصحاح 27 حاشية داود: الإصحاح ده بيركز على
    • قادة جيش داود (و تقسيم الجيش): داود بعد ما استراح من الحرب، قسّم الجيش بتاعه ل 12 فريق، كل فريق بيمسك الأمن و الحماية لشهر تحت قيادة أحد أبطال داود ... و كل فريق فيه 24 ألف
    • رؤساء الأسباط ال12
    • رؤساء خدّام داود و حاشيته القريبين منه (زي الوزراء كده دلوقتي)
  • إصحاح 28 تسليم خطة البناء لسليمان: داود عمل اجتماع على مستوى القمة (كل الرؤساء و القادة في إسرائيل) و قال لهم إن سليمان يملك بعده (اختيار ربنا) و إنه هو اللي يبني الهيكل، و هم معاه و يسندوه ... ويكشف لنا داود كمان إن ربنا قال له على مكوّنات الهيكل و شكله (زي ما سلّم موسى خيمة الاجتماع)، فداود سلّم ده لسليمان، مع المواد اللي كان أعدّها و خطة تنظيم الكهنة و اللاويين
  • إصحاح 29 تقدمات الشعب لبناء الهيكل: الإصحاح ده جميل جداً ... فيه 3 نقاط:
    • داود لم يكتفِ بإنه جمع كل المعدّات و الخامات لبناء الهيكل، ولا إنه شخصياً قدّم مواد زيادة بل أعطى الفرصة لجميع الشعب إنه يشارك بتقدمات لبناء الهيكل ... و طبعاً دي رسالة كل خدمة (إن الكل لازم يشارك عشان يحسّ بالفرحة و الانتماء)
    • احتفالاً بالتقدمات دي، داود جمع الشعب و ذبحوا ذبائح عظيمة، و صلّى داود صلاة رائعة بنقرا جزء منها في سبت النور ... كلها تعظيم في ربنا و إدراك إنهم لو قدّموا حاجة فهي من يد ربنا ليه، مش جود منهم (عشان مايشعروش بالكبرياء)
    • صلّى داود إن ربنا يحفظ قلب هذا الشعب و قلب سليمان كاملاً باستقامة في إرضاء ربنا، ثم مات داود ... أكتر شخص كان يرمز للسيد المسيح