مزامير - الجزء التاني (مزمور 3 ل 41)

• كاتب المزمور:
  داود النبي
• مناسبة الكتابة:
  • لمّا كان هربان من أبشالوم ابنه لمّا عمل انقلاب عليه و حاول ياخد المملكة منه ويقضي عليه (صموئيل الثاني 15)
  • أعلن نفسه ملك في أورشليم بعد سنين كان بيحبّب الناس فيه و يكرّههم في داود .. ففيه ناس كانت معاه … كمان أخيتوفل مستشار داود خانه و راح في صف أبشالوم
  • داود بتواضع عجيب هرب من أورشليم بدل ما يواجه أبشالوم
  • و راح جبل الزيتون (اللي ربنا يسوع صلّى فيه في بستان جثسيماني) .. و هناك عرف إن معظم أحبائه خانوه (بما فيهم مفيبوشث بن يوناثان زي ما قال صيبا خادمه بكذب وقتها) .. و طلع له شمعي بن جيرا يشتمه و يفتري عليه
  • ساعتها داود كان في موقف صعب جداً .. الكل بيتخلّى عنه بما فيهم ابنه .. و الناس (و الشيطان) بتقول له إن حتى ربنا تخلّى عنه و إن ربنا هو سبب التجربة دي
• المواضيع الرئيسية في المزمور:
  • يا رب، ليه ناس كتير جداً بتجرحني و تضايقني و تؤذيني باطلاً
  • لكن يا رب أنا في ضيقتي أصرخ لك و أنا واثق في استجابتك
  • أنا عارف يا رب إني حتى لو مُتّ مش هتكون دي النهاية .. انت معايا و بتعضّدني و ترفع راسي
  • عمري ما أخاف حتى من ربوات الناس اللي ضدّي
  • واثق في خلاصك يا رب زي ما عملت معايا قبل كده كتير (الأسد و الدب و جليات و شاول) .. ياللا يا رب قُم و اسندني و خلّصني و سكّت أصوات الإحباط دي
• استخدامه في طقس الكنيسة:
  صلاة باكر - المزمور الثالث

• كاتب المزمور:
  داود النبي
• مناسبة الكتابة:
  بعد المزمور الثالث بوقت بسيط، و هو بيعدّي الأردن هرباً من أبشالوم اللي طلع وراه بالجيش عشان يقتله (صموئيل الثاني 17)
• المواضيع الرئيسية في المزمور:
  • يا رب انت دايماً تستجيب لصلاتي حين أدعوك .. خليك معايا في الوضع الصعب ده
  • أما أنتم يا بني البشر، لحد امتى هاتحبوا الباطل و تمشوا وراء الأكاذيب؟
  • ده ربنا هو اللي اختارني أملك على شعبه و قواني بنعمته
  • اتقوا الله .. و لو أخطأتم توبوا يومها و اذبحوا ذبائح و توكّلوا عليه
  • الناس المشغولة إنها تشوف الخير على الأرض .. ربنا يعطيني السرور و السلام اللي يخليني كل يوم أنام و أنا مطمئن و أنا معه
• استخدامه في طقس الكنيسة:
  • صلاة باكر - المزمور الرابع
  • الجزء (قد ارتسم علينا نور وجهك يا رب. أعطيت سروراً لقلبي) بيتكرّر كتير في مزامير القداس

• كاتب المزمور:
  داود النبي
• مناسبة الكتابة:
  صموئيل الثاني 15
  • كان صعبان عليه جداً خيانة أخيتوفل مستشاره اللي تحالف مع أبشالوم ضده
  • كان معه صادوق الكاهن (هرب مع داود) و أبياثار، ومعهم تابوت العهد
  • داود اعترض و قال لهم يرجّعوا التابوت مكانه .. و ربنا لو أراد إنه يرجع هيرجع
  • بالتالي المشاعر هنا فيها وجع شديد من خيانة أخيتوفل
• المواضيع الرئيسية في المزمور:
  • يا رب اسمع صراخي .. ماليش حد غيرك، كل يوم الصبح بدري أقوم أتكلم معك و أصلّي لك
  • و دايماً يا رب واثق في استجابتك و منتظر تدخُّلك .. واثق إنّك مش هتسيب الشر ينتصر، بل ستنتقم على الإثم
  • و أنا واثق في رحمتك إني أرجع تاني أورشليم أسجد في هيكلك المقدس .. رجّع لي يا رب السلام في حياتي اللي ضاع بسبب أعدائي الأشرار الكذابين
  • واثق إنك تنهي المشكلة دي .. و أفرح وأبتهج بك و بعنايتك لي
• استخدامه في طقس الكنيسة:
  صلاة باكر - المزمور الخامس

• كاتب المزمور:
  داود النبي
• مناسبة الكتابة:
  عند توبة داود بعدما أخطأ مع بثشبع
• المواضيع الرئيسية في المزمور:
  • يا رب ويّخني و أدّبني .. لكن من غير غضب أو غيظ لأني ضعيف .. ارحمني يا رب لأني ضعيف جسدياً و نفسياً و روحياً
  • يا رب لحد امتى؟ هتسيبني ضعيف و غلطان؟
  • خلّصني يا رب قبل أن يدركني الموت لأن بعد كده مفيش فرصة توبة
  • تعبت من دموع التوبة و من غمّ الخطية يا رب .. لكن لي رجاء فيك
  • ابعدوا عني يا شياطين، أنا عارف إن ربنا هيقبل صلاتي
• استخدامه في طقس الكنيسة:
  • صلاة باكر - المزمور السادس
  • لحن أنا أعرف

• كاتب المزمور:
  داود النبي
• مناسبة الكتابة:
  • كان فيه واحد من سبط بنيامين (اسمه شمعي) كان بيشتم داود داود ظُلماً و يفتري عليه
  • داود اتضايق جداً لأنه ماعملش لأي حاجة وحشة لعائلة شاول أو غيرهم
  • و لمّا اتضايق صلّى المزمور ده طالباً عدل ربنا و تدخّله
• المواضيع الرئيسية في المزمور:
  • يا إلهي خلّصني .. أنا دايماً اتّكالي عليك
  • يا رب الشيطان عدوّي بيهيّج ناس ضدّي زي الأسد اللي عايز يبتلعني
  • يا رب انت عارف إن أنا ماشي على وصاياك و لا ظلمت حد ولا جيت على حد .. كل الاتهامات و الكلام اللي بيقوله أعدائي هو كلام باطل
  • و بالتالي اللي بيحصل معايا ده مش عدل و أكيد ده مايرضيش صلاحك يا رب
  • لكن انت يا رب قاضي عادل و قوي .. واثق إنك ستنتقم من الشيطان و تُظهر قوّتك و تدين أعدائي و تُنهي شرّهم
• استخدامه في طقس الكنيسة:
  مزمور الساعة التاسعة من ليلة خميس العهد

• كاتب المزمور:
  داود النبي
• مناسبة الكتابة:
  • كتبه داود في أول حياته و هو لسة راعي غنم
  • لحن فرايحي و كلام فيه تسبيح بسيط لواحد فرحان مع ربنا
• المواضيع الرئيسية في المزمور:
  • يا رب انت مجدك عظيم جداً في السماوات و الأرض
  • و أكتر ناس عارفين كده هم الأطفال و المتواضعين .. اللي انت تخليهم يسبحون بحمدك
  • أنا شايف السما و القمر و النجوم و كل خليقتك العظيمة
  • يا رب يطلع من الإنسان عشان تكلّله بالمجد و البهاء حتى أصبح أقل من الملائكة بحاجة بسيطة، و سلّطته على أعمال يديك كلها في الأرض و البحر و السماء؟
• اقتباسه في الكتاب المقدس:
  
  • استخدمه السيد المسيح يوم أحد السعف لمّا رؤساء الكهنة قالوا يسكّت الجموع اللي قالت أوصنا (متى 21)
  • في عبرانيين 2 : 9، القديس بولس استخدم تعبير (الذِي وُضِعَ قَلِيلًا عَنِ الْمَلاَئِكَةِ، يَسُوعَ) عشان يعبّر عن ناسوت السيد المسيح
• استخدامه في طقس الكنيسة:
  صلاة باكر - المزمور الثامن

• كاتب المزمور:
  داود النبي
• مناسبة الكتابة: موت واحد من ولاد داود
  • موت ابنه من بثشبع .. داود صام و صلّى و بكى و طلب من ربنا، لكن ربنا أراد إن الطفل يموت
  • أو موت أبشالوم .. اللي مات في الحرب ضد داود، داود طلب من الجيش الترفق بأبشالوم لكن يوآب لم يشفق
  • تجربة صعبة
• المواضيع الرئيسية في المزمور:
  • يا رب أشكرك على كل حال، انت كل أعمالك خير و أنا دايماً أسبحك
  • أنا عارف يا رب إنك قاضي عادل وإنك مش هتسمح لأعدائي الشياطين إنهم يضايقوني أو يمرّروا حياتي
  • أنت يا رب هتُهلك أعدائي الشياطين، و تكون ملجأ المسكين والمنسحق
  • سبّحوا الرب اللي بيسمع صلاة المساكين و يرحمهم
• استخدامه في طقس الكنيسة:
  (لكي أحدّث بكل تسابيحك في أبواب ابنة صهيون) الآية دي تُستخدم في مزامير القداس

• كاتب المزمور:
  داود النبي
• مناسبة الكتابة:
  • في الترجمة السبعينية، المزمور 9 و 10 مضمومين في مزمور واحد
  • في التقليد اليهودي، المناسبة هنا هي موت جليات (رمز الشر) على يد داود
• المواضيع الرئيسية في المزمور:
  • يا رب انت ليه مش بتتدخّل في أوقات الشر اللي فيها الأزمنة صعبة على المساكين
  • الشرير عمّال يظلم المسكين، و مش حاطط في دماغه إن فيه إله يجازي بالعدل .. بل يستهزئ بربنا
  • لكن هو حالياً يا رب منتصر و يسحق المسكين اللي اتّكاله عليك
  • يا رب قُم و ارفع يديك و جازي الأشرار

• كاتب المزمور:
  داود النبي
• مناسبة الكتابة:
  • لمّا كان شاول يطارد داود في الجبال طالباً قتله، أصدقاء داود كانت مشورتهم إنه يهرب لأن شاول هو الملك و بالتالي موت أو حياة داود في يده
  • داود كتب المزمور عشان يبيّن إن ربنا هو اللي يده في كل شيء .. مش في يد شاول
• المواضيع الرئيسية في المزمور:
  • أنا متوّكل على الرب، إزاي بتقولولي اهرب زي العصافير؟
  • آه فيه مؤامرات ضدي، لكن أعمالي مستقيمة قدام ربنا ضابط الكل، لن أهرب!
  • إذا القامات الروحية اللي قدام الناس خافت وهربت قدام المؤامرات، إزاي الناس ننعلّم منها الثبات و الإيمان و الاتكال على الله؟
  • بصّوا للسما و شوفوا ربنا على عرشه في هيكل قدسه .. أنا في امتحان لكن ربنا يخلّصني وينتقم من أعدائي

• كاتب المزمور:
  داود النبي
• مناسبة الكتابة: صموئيل الأول 22
  • لمّا داود هرب من شاول لمدينة الكهنة اللي استقبلوه و أكل خبز مائدة الوجوه .. قعد كام يوم و مشي
  • كان موجود دواغ الأدومي اللي فتن على داود و قال لشاول بكلام مبالغة و كذب (لأن أخيمالك الكاهن مكانش عارف إن داود هرب من شاول)
  • شاول أمر بقتل كل الكهنة
  • الخبر وصل لداود اللي حسّ بالذنب و الدهشة من دواغ الأدومي و أمثاله
• المواضيع الرئيسية في المزمور:
  • يا رب خلّص .. بقى فيه ناس كتير معندهاش أمانة .. قلبهم و كلامهم غش و كذب
  • يا رب انت ليه ساكت على الكلام ده .. أكيد هييجي يوم تقطع هذه الشفاه الغاشة المتملقة .. اللي فاكرين إنهم بكلامهم هيكسبوا دايماً
  • يا رب من أجل المساكين الأمناء خلّص يا رب
  • انت كلامك يا رب زي الفضة المصفّاة النقية .. أنت قلت إنك تحرس الأبرار و تحافظ عليهم، بينما الأشرار هييجي وقت يهربوا منك
• استخدامه في طقس الكنيسة:
  صلاة باكر - المزمور ال11

• كاتب المزمور:
  داود النبي
• مناسبة الكتابة:
  أغلب المفسرين بيقولوا إنه بعد سقوط داود في الخطية (سواء مياشرةً أو لمّا أيشالوم حاربه)
• المواضيع الرئيسية في المزمور:
  • يا رب انت نسيتني؟ دوّرت وشك الناحية التانية بسبب خطيتي؟
  • يا رب عدوّي الشيطان عمّال ينتصر عليّ .. أنا حزين جداً
  • يا رب لحد امتى أفضل أغلط و أقع كده؟
  • استجب لي يا رب و نوّر عينيّ عشان أفهم إن الخطية هاتموّتني .. خلّيني أنتصر على الشيطان ولا أتزعزع في علاقتي بك
  • يا رب أنا واثق في رحمتك و خلاصك و استجابتك بتوبتي .. هافضل أرنّك لك
• استخدامه في طقس الكنيسة:
  صلاة باكر - المزمور ال12

• كاتب المزمور:
  داود النبي
• مناسبة الكتابة:
  صموئيل الأول 25
  • قصة داود و نابال (معنى اسمه جاهل) … لمّا داود و رجاله كانوا بيحموا غنم و أرض نابال، و لمّا جه وقت جَز الغنم طلب داود بأدب من نابال إنه يعطيه نصيب
  • رد نابال كان قاسي و أهان داود اللي غضب جداً و كان رايح يقتل نابال
  • ظهرت أبيجايل الحكيمة زوجة نابال اللي كلمت داود بحكمة و أعطته حقه و زيادة .. ردّت داود عن غضبه
• المواضيع الرئيسية في المزمور:
  • الجاهل يقول في قلبه: مافيش ربنا، ماليش دعوة به ... أنا أحيا على مزاجي من غير ضوابط
  • لكن ربنا موجود و شايفه من السماء … شايف كل البشر قدامه و بيدوّر على اللي بيطلبه من قلبه
  • للأسف الخطية والفساد انتشروا في البشرية كلها .. لم يعُد هناك شخص صالح تماماً يرضي الله
  • اللي بياكل حق غيره ده لازم يخاف من ربنا لأنه خالف وصاياه … و للأسف مش بيسمعوا رأي الأتقياء اللي بينهم
  • يا رب أظهِر خلاصك و رُدّ شعبك من سبي الشيطان .. فرّحنا يا رب
• اقتباسه في الكتاب المقدس:
  في رومية 3 : 12 اقتبس القديس بولس آية (ليس من يعمل صلاحا، ليس ولا واحد)

المزمور 53 تقريباً هو هو بالظبط .. فرق آية أو 2
و بالتالي ربنا عايز يؤكّد لنا الرسالة: الجاهل هو اللي يرفض وجود الله .. بينما الفاهم هو اللي يطلب الله
داود كتب المزمور ده بروح النبوة عن الأيام اللي هيبقى فيها حصار أورشليم على يد مملكة أشور

• كاتب المزمور:
  داود الملك
• مناسبة الكتابة:
  
  • لمّا داود رجّع تابوت العهد لخيمة الاجتماع بكل إكرام
  • كان بقاله 20 سنة مش في الخيمة .. أخذه الفلسطينيين في حرب، ثم تنقّل من بيت لبيت حتى استقر في بيت أبيناداب ثم عوبيد أدوم
  • داود راح يجيب التابوت و كان فرحان جداً في اليوم ده
  • قال المزمور ده للناس عشان يفهّمهم صفات الوجود في خيمة الاجتماع في حضرة الله
  • و أصبحت عادة عند اليهود: اللي داخل الخيمة يسأل اللاوي البواب السؤال ده .. و اللاوي يقول له ال10 صفات اللي في المزمور
• المواضيع الرئيسية في المزمور:
  • يا رب انت لك الأرض كلها .. مين ده اللي يقدر يدخل بيتك و يقترب منك؟
  • 4 صفات إيجابية: سالك بالكمال - عامل الحق - متكلّم بالصدق - يكرم رجال الله و القديسين
  • 6 صفات سلبية: لا يشي بلسانه - لا يصنع الشر - لا يحب سماع كلمات السوء على حد - لا يخلف وعوده - لا يأخذ ربا بل يساعد قريبه - لا يقبل رشوة
  • اللي يعمل كده مش بس يدخل مسكن الله على الأرض .. بل يملك معه إلى الأبد
• استخدامه في طقس الكنيسة:
  صلاة باكر - المزمور ال14

• كاتب المزمور:
  داود النبي
• مناسبة الكتابة:
  
  • لمّا كان هربان في الجبال من وجه شاول
  • بعض الناس وشوا به وقالوا مكانه لشاول اللي أخذ جيشه وحاصر الجبل
  • داود صلّى المزمور ده .. حاسس إن ساعة موته وشيكة و محتاج معجزة
  • و المعجزة حصلت: جه لشاول خبر بهجوم الفلسطينيين على إسرائيل فيرجع بجيشه عشان ينقذ الموقف
  • و داود سمّى المكان (صخرة الزلقات) لأن الله دحرج عنه شر شاول
• المواضيع الرئيسية في المزمور:
  • يا رب احفظني أن كل اتّكالي عليك
  • أن بحب ولادك الأنقياء و أفرح بالتعامل معهم .. أما اللي بيعبدوا أوثان من الشعوب اللي حوالينا (داود كان شافهم لأنه كان على الحدود) ماليش دعوة بيهم ولا بأعمالهم
  • انت نصيبي اللي أنا فرحان به، واثق إنك هاتردّ لي ميراثي الحَسَن
  • و حتى و أنا هربان في الجبال، أنا ثابت فيك و في وصاياك و شايفك أمامي كل حين
  • عشان كده قلبي فرحان بك و متمسك برجائي فيك .. عرّفني يا رب طريقك
• اقتباسه في الكتاب المقدس:
  أعمال الرسل 2 في عظة القديس بطرس بعد حلول الروح القدس
• استخدامه في طقس الكنيسة:
  صلاة باكر - المزمور ال15

• كاتب المزمور:
  داود النبي
• مناسبة الكتابة:
  نفس ظروف المزمور 16
• المواضيع الرئيسية في المزمور:
  • المزمور ده مزمور صلاة .. مافيهوش غير صلاة و تضرُّع لربنا .. حوار مع الله
  • يا رب أنت إله الحق .. اسمع صلاتي اللي بقولها باستقامة قلب و نقاوة أعمال وأمانة
  • يا رب أنت عارف إني بحاول أتوب و أحفظ وصاياك و كلامك في حياتي
  • استجب لي يا رب في صلاتي و ارحمني من أعدائي الأقوياء المحيطين بي كالأسد اللي عايز يفترس الفريسة .. احفظني زي حدقة العين
  • يا رب انت نصيبي الصالح مش أي حاجة من الدنيا .. أنتظر وجهك و أشبع إني أستيقظ فأرى وجهك

• كاتب المزمور:
  داود الملك
• مناسبة الكتابة:
  • في نهاية حياة داود
  • بيلخص كل خبراته مع ربنا .. إزاي شاف ربنا اشتغل معاه من ساعة ما كان راعي غنم لحد ما أصبح ملك عظيم، و إزاي خلّصه من كل أعدائه
• المواضيع الرئيسية في المزمور:
  • أحبك يا رب .. صخرتي و حصني اللي على طول أحتمي فيه من أعدائي
  • يا رب في كل المخاطر اللي عديت بها صرخت إليك فسمعتَ خلاصي و استحبت لي بعدلك و انتقمت من الأشرار و كافأتني على تمسُّكي بك و توبتي المستمرة
  • أنت يا رب النور اللي بينوّر ظلمتي و يضيء حياتي .. أنا معاك يا رب مش خايف من جيوش بل واثق من معونتك لي .. أنت يا رب ترس لكل من يحتمي بك
  • أنت يا رب اللي بتسهّل طرقي قدامي و تقود خطواتي و تهب لي النصرة
  • يا رب أعطني الانتصار على أعدائك الشياطين و اسحقهم تحت أقدام ولادك سريعاً إلى الأبد
• اقتباسه في الكتاب المقدس:
  المزمور ده هو هو تقريباً صموئيل الثاني 22
• استخدامه في طقس الكنيسة:
  بعض الآيات مستخدمة في الهوس الكيهكي

• كاتب المزمور:
  داود النبي
• مناسبة الكتابة:
  داود الراعي الصغير وسط المراعي والحدائق ماسك القيثارة و يسبّح ربنا مع الطبيعة
• المواضيع الرئيسية في المزمور:
  • السماء و النجوم و الشمس بتسبّحك و تعلن مجدك كل يوم
  • مالهومش صوت مسموع بالودان، بس منطقهم و تسبيحهم وصل لكل الناس
  • و الشمس بتطلع كل يوم زي العريس الفرحان اللي بيسرع في طريقه لزوجته لحد ما تاخد طريق السماء كله
  • كذلك ناموسك الكامل الصادق اللي بينوّر العينين و يفرّخ القلب
  • خليني أحفظ كلامك يا رب و نجني من السهو و الخطايا المستخبية جوايا و الكبرياء
• اقتباسه في الكتاب المقدس:
  (إلى جميع الأرض خرج صوتهم، وإلى أقاصي المسكونة أقوالهم) استخدمها القديس بولس في رومية 10 : 18 عن كرازة الآباء الرسل للعالم كله
• استخدامه في طقس الكنيسة:
  • صلاة باكر - المزمور ال18
  • كتير من الآيات موجودة في الهوس الكيهكي
  • نصف مزمور صلاة الإكليل (مثل العريس الخارج من خدره) من المزمور ده

• كاتب المزمور:
  داود الملك
• مناسبة الكتابة:
  • قبل حربه مع بني عمون (صموئيل الثاني 10)
  • داود كان في سلام مع الكل .. و لمّا مات ملك بني عمون أرسل رسل يعزّوهم
  • لكن الملك الجديد فهم غلط و أهان رسل داود .. و تحالف مع آرام عشان يحارب داود
  • مكانش قدام داود غير إنه بسرعة يجهز جيشه و يخرج للحرب .. و قبل الحرب صلّى داود المزمور ده .. وأصبحت عادة عند الملوك قبل أي حرب إنهم يصلّوا المزمور ده
• المواضيع الرئيسية في المزمور:
  • ربنا يستجيب لك من سماه رغم الموقف الصعب اللي انت فيه
  • هيفتكر الخير اللي انت عملته و يعظم جداً عنده و يتمم كل اللي انت عايزه
  • و أنا باصلي المزمور أنا واثق يا رب في استجابتك لي
  • أعدائنا مجهزين أكتر مننا كتير، لكن إحنا معانا اسم الرب إلهنا اللي يخلّصنا
• اقتباسه في الكتاب المقدس:
  قبل ما حزقيا يحارب أشور، قال كلام من روح المزمور ده (أخبار الأيام الثاني 32)
• استخدامه في طقس الكنيسة:
  صلاة الساعة الثالثة - المزمور ال19

• كاتب المزمور:
  داود الملك
• مناسبة الكتابة:
  • بعد انتصار داود في الحرب اللي قال قبلها مزمور 20 .. يشكر ربنا على انتصاره على بني عمون
  • و أصبح يُقال عند تدشين ملوك إسرائيل
• المواضيع الرئيسية في المزمور:
  • يا رب أشكرك على عظم أعمالك معي .. كل اللي طلبته أعطيتني إياه يا رب و فرّحتني بخلاصك
  • أعطيتني البركة و المجد و طول الأيام .. و أهلكت كل الأعداء الأشرار و خلّصت أولادك
  • يا رب أنا أتوكل عليك و أسبجك و أشكرك من أجل نعمك العظيمة

• كاتب المزمور:
  داود النبي
• مناسبة الكتابة:
  المزمور ده من النبوات اللي داود قالها .. ليس له علاقة خالص بحياته، هو بيتنبأ عن السيد المسيح و بيحكي المزمور ده على لسانه
• المواضيع الرئيسية في المزمور:
  • يا رب ليه سبتني في الضيقة الصعبة اللي أنا فيها دي؟ أنا عارف إن هذه الضيقة هي إرادتك و إرادتي من أجل خلاص العالم
  • أنت القدوس اللي بيسمع تسبيحات و صلوات أولاده .. اتكل عليك كل آباؤنا فخلّصتهم
  • لكن وضعي حالياً مختلف .. أنا زي الدودة اللي الناس تستهزئ بها .. بيقولوا: خلوا ربنا يخلصه إن كان أراده
  • يا رب ليس لي مُعين سواك .. و حولي أعداء أقوياء و أشرار مثل الثيران اللي عايزين يفترسوني
  • يا رب أنقذ نفسي من يد الشيطان عشان أخلّص أولادك و أبشّر إخوتي اللي في الجحيم بخلاصك .. عشان الكل يسبّح اسمك و يفرحوا معانا في ملكوتك
• اقتباسه في الكتاب المقدس: المزمور ده بيحكي عن آلام ربنا يسوع على الصليب .. و بالتالي كل الأناجيل اقتبست من المزمور ده، مثلاً:
  • (متى 27 : 46) ربنا يسوع قال مطلع المزمور ده و هو على الصليب (عشان ينبه اليهود إن نبوات داود حصلت بالضبط معه)
  • (متى 27 : 43) رؤساء الكهنة و الكتبة قالوا (اتكل على الرب فلينجه، لينقذه لأنه سُر به
• استخدامه في طقس الكنيسة:
  صلوات البصخة و خصوصاً الجمعة العظيمة

• كاتب المزمور:
  داود النبي
• مناسبة الكتابة:
  من أوائل المزامير التي كتبها داود (لمّا كان راعي غنم صغير) .. يتخيل نفسه مكان الغنم اللي هو يرعاها، و ربنا بيرعاه
• المواضيع الرئيسية في المزمور:
  • ربنا بيرعاني و يسير أمامي، عمري ما أحتاج أي حاجة .. يتولى كل احتياجاتي و يملاني بالسلام
  • بيصالحني على نفسي و يُهديني إلى طريق البر .. من أجل اسمه القدوس
  • حتى لو زي الخروف الصغير لقيت نفسي في وادي كله ظلام، مش هخاف لأني واثق إن عينك عليّ
  • معك يا رب عصا لتأديبي حتى لا أشرد .. ده أنت يا رب مسحتني بالمسحة المقدسة، و معك زيت زي المرهم لترطيب جروحي .. و خمر زي الميكروكروم ليداويني
  • أنت إلهي اللي بترعاني، و أنا في حضنك واثق إن حياتي كلها خير و رحمة
• اقتباسه في الكتاب المقدس: ربنا يسوع قال عن نفسه في يوحنا 10 إن هو الراعي الصالح
• استخدامه في طقس الكنيسة:
  صلاة الساعة الثالثة - المزمور #22

• كاتب المزمور:
  داود الملك
• مناسبة الكتابة:
  زي مزمور 15، و هو بيرجّع تابوت العهد لخيمة الاجتماع
• المواضيع الرئيسية في المزمور:
  • ربنا هو ملك المسكونة و مؤسسها
  • بالتالي من يستحق يدخل بيته و يقف أمامه؟ أكيد إنسان نقي و طاهر
  • و داود داخل أبواب أورشليم بيقول للبوابين: افتحوا الأبواب لأن ربنا داخل (من خلال تابوت العهد) .. ملك المجد
• استخدامه في طقس الكنيسة:
  • صلاة الساعة الثالثة - المزمور #23
  • تمثيلية القيامة

• كاتب المزمور:
  داود الملك
• مناسبة الكتابة:
  • في آخر أيامه .. يتأمل في صلاح الله و عمله معه طوال حياته
  • المزمور ده 22 آية .. كل آية تبدأ بحرف أبجدي من الحروف العبرية
• المواضيع الرئيسية في المزمور:
  • يا رب أنا اتّكالي عليك و انت أبداً لم تخذلني بل غمرتني بإحساناتك
  • علّمني يا رب طرقك المستقيمة و فهّمني عدلك .. كرحمتك يا رب و ليس كخطاياي
  • أنت يا رب صالح و مستقيم .. بتحاول تعرّف الكل طريقك اللي مليان رحمة و حق
  • سرّك يا رب لخائفيك و الذين يتّقونك .. لذلك أنتظرك دائماً فتخلّصني
  • يا رب أنا مسكين و وحيد .. إرحمني و أنقذني من أعدائي .. رجائي فيك
• استخدامه في طقس الكنيسة:
  صلاة باكر - المزمور ال24

• كاتب المزمور:
  داود النبي
• مناسبة الكتابة: صموئيل الأول 27
  • و هو هربان من شاول و مستخبي منه عند الفلسطينيين
  • داود عاش وسط الفلسطينيين لكن حافظ على تقواه و عاش منفصل عنهم
  • لحد ما فتن ناس عليه عند شاول
  • بدأ شاول يشوّه صورة داود قدام الشعب و قال إنه تحالف مع الأعداء .. و الناس بدأت تصدقه
  • لمّا وصل الخبر لداود صعبت عليه نفسه .. و تحت الضغط لجأ لربنا و صلى له
• المواضيع الرئيسية في المزمور:
  • يا رب احكم لي بالعدل .. انت عارف إني ماشي على وصيتك و لم أتخلى عنها، امتحنّي و نقِّني
  • يا رب أنا بحاول أفصل نفسي عن الناس الأشرار بتصرفاتهم و أخلاقهم
  • بحاول أكون نقي كأني داخل بيتك و باسبّح اسمك القدوس
  • يا رب رجّعني بيتك أسكن وسط شعبك و خائفيك .. ارحمني
• استخدامه في طقس الكنيسة:
  • صلاة الساعة الثالثة - المزمور ال25
  • (أغسل يدي بالنقاوة ، وأطوف بمذبحك يارب) بيقولها الكاهن وهو يغسل يده قبل تقديم الحمل

• كاتب المزمور:
  داود الملك
• مناسبة الكتابة:
  مش معروف بالظبط .. لكنه تعرض في حياته لمواقف كتيرة صعبة
• المواضيع الرئيسية في المزمور:
  • الرب نوري و خلاصي و حصني .. أخاف من مين؟ هو اللي بيدفع أعدائي و يحامي عني حتى في أصعب التجارب و الحروب
  • أنا بس يا رب نفسي أسكن في بيتك كل أيام حياتي .. أتأمل في هيكلك المقدس و أسبح اسمك القدوس
  • اسمع صلاتي يا رب، أنا أطلب وجهك من كل قلبي، لا تتركني يا إله خلاصي حتى لو تركني الناس القريبة مني
  • يا رب أعدائي تكلموا عليّ بالظلم .. لكن أنا منتظرك يا رب و ده اللي بيقوي قلبي
• استخدامه في طقس الكنيسة:
  • صلاة باكر - المزمور ال26
  • (لأنه قد قام علي شهود زور) في مزامير أسبوع الآلام عن اللي عمله رؤساء الكهنة مع السيد المسيح (متى 26)

• كاتب المزمور:
  داود الملك
• مناسبة الكتابة:
  و هو هربان من ابنه أبشالوم على جبل الزيتون (زي مزمور #5)
• المواضيع الرئيسية في المزمور:
  • يا رب أنا أصرخ إليك و أرفع يدي نحو هيكلك، استمع صلاتي لئلا أهلك مثل الأشرار
  • يا رب ماتسلّمنيش لأيدي الأشرار المنافقين المخاطبين أصحابهم بالسلام والشر في قلوبهم
  • يا رب حسب شر أعمالهم أنت تعاقبهم لأنهم لم يهتموا بك ولا بإرادتك
  • أنا واثق فيك يا رب، أباركك وأسبح اسمك القدوس لأنك مخلصي و مخلص شعبك كله
• استخدامه في طقس الكنيسة:
  (خلص شعبك، وبارك ميراثك، وارعّهم واحملهم إلى الأبد) مستخدمة في صلوات الكنيسة (زي الهوس الكيهكي)

• كاتب المزمور:
  داود الملك
• مناسبة الكتابة:
  • زي مزمور 15: لمّا داود رجّع تابوت العهد لخيمة الاجتماع بكل إكرام
  • كان فيه أمطار ورعود و رياح قوية هبّت اليوم ده من لبنان عملت حرائق بسيطة .. فشعر الشعب بحضور الله
• المواضيع الرئيسية في المزمور:
  • تعالوا نقدم لربنا كأولاد له كل مجد و بركة و سجود
  • شايفين الأمطار الكثيرة؟ كأن ربنا بيتكلم وبيقول بصوت عظيم أنا موجود وسطكم
  • كأنه كسّر أرز لبنان بالرياح القوية دي و أتى وسطنا .. ربنا يسحق المتكبرين
  • صوت ربنا واضح و قوي و مخوف .. و بالتالي لازم نمجده
  • ربنا هو الملك على الطبيعة والكون كله .. هو يباركنا و يعطينا السلام
• استخدامه في طقس الكنيسة:
  صلاة الساعة الثالثة - المزمور ال28

• كاتب المزمور:
  داود الملك
• مناسبة الكتابة: أخبار الأيام الأول 21
  • لمّا داود في آخر أيامه قرّر يعدّ الشعب (عكس وصية ربنا) .. ربنا قال لداود إنه هيعاقبه و قال له يختار العقاب
  • داود اختار الوباء (يسقط في رحمة ربنا)
  • حصل الوباء و داود بكى بشدة و قدّم ذبيحة في بيدر أرنان اليبوسي .. و ربنا رفع العقاب
  • بالتالي داود سبّح ربنا بهذا المزمور
• المواضيع الرئيسية في المزمور:
  • يا رب أشكرك لأنك مش بتخلّي أعدائي يشمتوا فيّ
  • يا رب أنت أنقذتني من الهلاك لمّا لجأت لك .. حوّلت الحزن و البكاء إلى فرح و ترنيم
  • يا رب بلاش تحجب وجهك عني حتى لا أهلك
  • أنت يا رب سمعت صلاتي و حوّلت حزني لفرح لي
• استخدامه في طقس الكنيسة:
  • صلاة الساعة الثالثة - المزمور #29
  • بنقوله و إحنا بنلبس التونبة في القداس (كأن اللبس الأبيض ده هو حضن المسيح)

• كاتب المزمور:
  داود النبي
• مناسبة الكتابة: صموئيل الأول 23 (1 ل 13)
  • داود كان هربان من شاول في الجبال .. كان قريب من مدينة في إسرائيل اسمها (قعيلة)
  • الفلسطينيون هجموا على (قعيلة) و داود عرف .. حسّ بالمسئولية (رغم إنه مش الملك) و سأل ربنا ينزل يحارب الفلسطينيين في المدينة هو و الرجال القليلين اللي معه .. و ربنا قال له ماشي
  • داود راح و طرد الفلسطينيين .. لكن شاول عرف و نزل عشان يجيبه
  • داود سأل ربنا: يا رب لمّا شاول ينزل، هل رجال المدينة يسلّمونني له؟ ربنا قال له: نعم
  • داود هرب لكنه شعر بحزن كبير جداً خلاه يكتب المزمور ده
• المواضيع الرئيسية في المزمور:
  • يا رب أنت ملجأي و اتكالي و حصني، أحسن من أي مدينة أو ناس .. خلّصني يا رب من فخاخ أعدائي
  • يا رب أنا مسلّم روحي لك و واثق في عنايتك .. دايماً بتخلّصني
  • ارحمني يا رب فإني في ضيق .. غدر من ناس لي فضل كبير عليهم .. الناس بقت تهرب مني خايفة يطولهم الخطر زيّي، وبعضهم بتآمر و عايز يسلّمني لشاول
  • لكن يا رب أنت محضّر جود و مجد عظيم لمحبيك .. تخلّص كل المتكلين عليك و تجازي كل الأشرار
• اقتباسه في الكتاب المقدس:
  ربنا يسوع على الصليب قال (في يديك أستودع روحي) - لوقا 23 : 46
• استخدامه في طقس الكنيسة:
  يُستّخدم في مزامير البصخة لأنه بيعبر عن اللي حصل للسيد المسيح يوم خميس العهد والجمعة العظيمة

• كاتب المزمور:
  داود الملك
• مناسبة الكتابة:
  مزمور توبة قاله داود بعد خطيته مع بثشبع .. و بعد المزمور 51 (ارحمني يا الله كعظيم رحمتك)
• المواضيع الرئيسية في المزمور:
  • يا بخته اللي ربنا يغفر له خطيته و يستر عليه و يمحو آثامه
  • أنا لمّا سكتت ولم أتُب بسرعة عن خطيتي، كانت حياتي صعبة و حسيت إني ناشف تماماً .. حسيت إن ربنا يده ثقلت عليّ عشان أفوق و أتوب
  • لكن اعترفت لربنا و تُبت، و ربنا غفر لي .. أنت يا رب دايماً موجود و بتسمع صلاة ولادك و تستر عليهم و تفرّحهم .. أن يا رب دايماً هاصلي لك و ألجأ إليك
  • كمان يا رب انت بتبعت لي مرشد روحي .. تعلّمني و تنصحني وترشدني و عينك عليّ .. عشان مابقاش زي الفرس اللي ماشي بلجام في سكة غصب عنه
  • يا رب، أنا فرحان بك

• كاتب المزمور:
  داود الملك
• مناسبة الكتابة: صموئيل الثاني 21 (15 ل 17)
  • في أواخر حياته، دخل داود حرب مع الفلسطينيين و انتصر
  • لكن بعد الحرب كان واحد من الفلسطينيين عايز يقتل داود .. و داود ماعرفش بالمؤامرة
  • لكن أبيشاي ابن صروية أحد قادة جيش داود عرف و أنقذه
  • لمّا داود عرف، كتب المزمور ده عشان يشكر ربنا
• المواضيع الرئيسية في المزمور:
  • سبّحوا الرب يا كل أولاده المستقيمين .. سبّحوه من قلوبكم بترانيم جديدة
  • ربنا هو السيد الإله الضابط الكل .. الأرض كلها مليانة من رحمته و حكمته و قدرته
  • ربنا في الآخر إرادته هي اللي هتمشي مهما تآمر الشعوب عليه و على أولاده
  • يا بختنا يا رب بك .. إله عظيم تنظر إلى المستقيمي القلوب .. عين ربنا عليهم و ينجيهم من أعدائهم مهما كان الأعداء أقوى
• استخدامه في طقس الكنيسة:
  الآيات اللي جاية تُستَخدم في مزامير البصخة

• كاتب المزمور:
  داود النبي
• مناسبة الكتابة: صموئيل الأول 21 (10 ل 15)
  • كارن داود هربان من شاول .. و مع تكرار المطاردات راح داود للفلسطينيين (جتّ) .. على اعتبار أنهم أعداء شاول
  • لكن ناس من الفلسطينيين فكّروا ملك جتّ أنه ده داود الذي قتل جليات .. والملك أرسل جنوده ليقبضوا على داود وهو عند البوابة
  • داود عشان ينجو تظاهر بالجنون
  • و الملك استهزأ وسابه يمشي
  • داود حسّ إن ربنا أنقذه من موت أكيد .. سابهم و كتب المزمور ده عشان يشكر ربنا
• المواضيع الرئيسية في المزمور:
  • يا رب أنا أباركك و أسبّحك .. طلبتك في ضيقتي فاستجبت لي و أنقذتني من كل مخاوفي
  • يا رب أنت تسمع كل طالبيك .. ترعاهم و تنجيهم و تنير عليهم فلا يعوزهم شيء
  • الإنسان اللي عايز يعيش حياة جميلة و فيها خير: يخاف ربنا و يحفظ وصاياه و يبعد عن الشر
  • ربنا بيخلص ولاده المتكلين عليه الصارخين إليه .. ربنا قريب منهم و ينجيهم في شدائدهم و يعاقب أعدائهم
• استخدامه في طقس الكنيسة:
  صلاة الساعة الثالثة - المزمور الـ 33

• كاتب المزمور:
  داود النبي
• مناسبة الكتابة:
  بعد المزمور اللي فات على طول
• المواضيع الرئيسية في المزمور:
  • يا رب دافع أنت عني و حارب أعدائي القائمين عليَّ اللي بيقاتلوني ظلماً بلا سبب
  • يا رب أنا نفسي تبتهج بك و بخلاصك لي .. أنت ملجأ المسكين ممن هو أقوى منه
  • الناس دي جابوا عليَّ شهود زور
  • ده انا يا رب ياما كنت باصلي لهم في شدائدهم .. و هم خانوني و فرحوا لشدائدي
  • يا رب اقضِ لي و انتقم من أعدائي .. عشان أسبحك بابتهاج خلاصك
• استخدامه في طقس الكنيسة:
  (شهود زور يقومون، وعما لم أعلم يسألونني) تُستَخدم مع مزامير البصخة لأنها نبوة عن اللي حصل مع السيد المسيح

• كاتب المزمور:
  داود النبي
• مناسبة الكتابة:
  مش معروفة (ممكن لمّا كان هربان من شاول)
• المواضيع الرئيسية في المزمور:
  • اللي بيوجع قلبي من ناحية الشرير، إنه لا يخاف الله .. يقنع نفسه بالخطية بدل ما يرفضها
  • يا رب أنت عادل و قوي و رحيم .. ديم يا رب رب نورك و رحمتك على ولادك المستقيمين
  • نجنا يا رب من الشرير
• استخدامه في طقس الكنيسة:
  الجزء الجاي ده رتبته الكنيسة في صلاة النوم و رفع بخور عشية (تفضل يا رب أن تحفظنا في هذه الليلة)

• كاتب المزمور:
  داود الملك
• مناسبة الكتابة:
  • في أواخر أيامه .. بعد ما الأيام و الخبرات علّمته الحكمة
  • مكتوب على طريقة سفر الأمثال
• المواضيع الرئيسية في المزمور:
  • إوعى تغير من الأشرار .. شكلهم زي الحشيش الأخضر اللي فيه خير، لكن سريعاً سيُقطَعون و يذبلون
  • اتّكل على الرب في كل طريقك و تلذّذ به .. هو يسعدك و يملأ حياتك بالخير و الحق
  • القليل اللي عند الصدّيق أحسن بكتير من غِنَى الأشرار .. لأن ربنا بيبارك القليل اللي عند أولاده، فمش بس يشبعوا بل كمان يقرضوا الناس و يكونوا مصدر خير
  • ربنا بيسند ولاده و مش بيسمح إنهم يسقطوا .. ربنا لا يتخلى عن أولاده ولا احتياجاتهم
  • فم الصدّيق بيقول الحكمة لأن شريعة ربنا وكلامه في قلبه .. لا تتعثّر خطواته
• استخدامه في طقس الكنيسة:
  في مزامير القداس ساعات تُقال آيات من المزمور ده زي (فم الصديق يلهج بالحكمة، ولسانه ينطق بالحق. شريعة إلهه في قلبه . لا تتقلقل خطواته)

• كاتب المزمور:
  داود الملك
• مناسبة الكتابة:
  • أحد مزامير التوبة بعد الخطية مع بثشبع (زي مزمور 6 و 32)
  • مطلع المزمور شبه المزمور السادس
• المواضيع الرئيسية في المزمور:
  • يا رب أنا عارف قد إيه خطيتي تغضبك و تغيظك .. لا تعاقبني بسَخطك يا رب، لأن أنا مش هستحمل
  • يا رب أنا حزين جداً و تعبت جداً بسبب خطيتي .. توبتي و صلاتي قدامك
  • حتى أحبائي وأصحابي بعدوا عني بعد ما رفعت نعمتك عليّ .. و أنا كأصمّ أبكم مش قادر أردّ لأن أنا أستاهل
  • لكن يا رب أنا جيت لك و بتوب .. اقبلني و متخليش الشياطين يشمتوا فيّ .. ساعدني يا رب
• استخدامه في طقس الكنيسة:
  الآية اللي تحت بنقولها في مدائح كيهك (أفتح فاي بالتسابيح)

• كاتب المزمور:
  داود الملك
• مناسبة الكتابة:
  بعد المزمور 38 في نفس الظروف
• المواضيع الرئيسية في المزمور:
  • يا رب مهما أدّبتني و عملت معايا، أنا ماقدرش أجاوب لأني أستاهل
  • يا رب أنا عارف إن ابني اللي جه من خطيتي، مات كتأديب منك لي .. أنا هسكت ومش هفتح فمي بسبب خطيتي
  • يا رب عرّفني قد إيه أيامي قليلة و زائلة .. ماينفعش أركز في الأرضيات بل لازم أركز في الأبدية
  • عرّفني إن أنا غريب ونزيل على الأرض .. هقضي يومين بس فيها و بعد كده الحساب
  • يا رب ارحمني و اسمع صلاتي و لا تثقّل يدك عليّ

• كاتب المزمور:
  داود الملك
• مناسبة الكتابة:
  مش معروف بالظبط، لكن أكيد بعد موقف من المواقف الصعبة في حياة داود اللي ربنا أنقذه فيها
• المواضيع الرئيسية في المزمور:
  • انتظرت الرب، فسمعني و خلّصني .. أسبّحه و أباركه و أخبر برحمته … طوبى للمتوكل عليه
  • أنا عارف يا رب أن مش الذبيحة أو التقدمة هي اللي هتبسطك، بل أني أفتح أذنيّ و أعمل بكلامك و وصاياك .. أنا يا رب هتبقى مسرّتي أني أعمل كلامك
  • بل كمان يا رب هابشر بأحكامك و عدلك في الجماعة كلها
  • يا رب ده أنا خطاياي أكتر من شعر رأسي .. لكن أنت تسرع لمعونتي
  • خلّي كل الشياطين اللي بيطلبوا نفسي يخزون .. و قلبي المسكين يفرح بك
• اقتباسه في الكتاب المقدس:
  اقتبس القديس بولس جزء من المزمور ده في عبرانيين 10 : 5 ل7 عشان يتكلم عن تجسد السيد المسيح و نعمة العهد الجديد
• استخدامه في طقس الكنيسة:
  أجزاء من المزمور ده تستخدم في قراءات القداسات زي (وجعل في فمي ترنيمة جديدة، تسبيحة لإلهنا)

• كاتب المزمور:
  داود الملك
• مناسبة الكتابة:
  • لمّا عرف داود بانقلاب أبشالوم ابنه عليه
  • كان داود ساعتها مريض و طريح الفراش لمّا ابنه خانه و بدأ يجمّع و يهيّج الناس عشان ياخد منه المُلك
• المواضيع الرئيسية في المزمور:
  • يا بخت الشخص اللي يرحم المساكين و يشفق عليهم .. ربنا ينجيه و يشفق عليه يوم ما الشر يحيط به
  • يا رب ارحمني و أشفِ نفسي .. أنا إنسان خاطئ لكن رحمت ناس كتير، فواثق في رحمتك
  • أعدائي ما صدّقوا إني عيّان .. ينافقون و يزوروني و هم قلبهم ضدي و يتآمرون عليّ من وراء ظهري
  • حتى الناس اللي كنت أثق فيهم و كانوا أصدقائي و بيننا عيش و ملح برضه خانوني و انضموا لأعدائي (زي أخيتوفل مستشاري)
  • أنا واثق فيك و في رحمتك و إنك معايا يا رب .. مبارك الرب إله إسرائيل من الأزل و إلى الأبد
• اقتباسه في الكتاب المقدس:
  ربنا يسوع استخدم آية من المزمور ده للتعبير عن خيانة يهوذا في يوحنا 13 : 18: الذي يأكل معي الخبز رَفَع عليَّ عقِبَه
• استخدامه في طقس الكنيسة:
  • صلاة الساعة الثالثة - المزمور ال40
  • في الساعة ال11 من يوم ثلاثاء البصخة .. قبل الإنجيل المشهور عن إخوة الرب (متى 25) اللي فيه ربنا بيميّز الرحماء (كنت مريضاً .. محبوساً .. عرياناً …)