ملوك الثاني

• إصحاح 1: أخزيا يرفض الله
  • للأسف بن آخاب اللي ملك بعده (أخزيا) مَرِضَ فبدل ما يتوب، أرسل رسل لفلسطين يسأل آلهتهم: ربنا أرسل إيليا يقول للملك رَدّ واضح: هاتموت
  • للأسف الملك بدل ما يتوب، طلب من خمسين جندي بقائدهم يقبضوا على إيليا و يجيبوه، و هنا تبان هيبة رجل الله: أول مرتين قائد الجنود لم يحترم إيليا، فنزلت نار من السماء عليه هو و جنوده ... الرجل الثالث تضرّع لإيليا إنه ييجي معاه
  • إيليا راح إلى أخزيا و قال له نفس الكلام ... و لم يتُب أخزيا فمات فعلاً

  الإصحاح ده بيمهّد لنا إن ملوك إسرائيل من الناس اللي مهما شافت معجزات (أخزيا حضر معجزات إيليا مع آخاب) هترفض التوبة

• إصحاح 2: صعود إيليا في مركبة نارية و بداية معجزات أليشع
  • جاءت لحظة الوداع الصعبة على أليشع: كان عارف إن ده آخر يوم لمعلّمه ... لكنّه صمّم يتبع إيليا من الجلجال لبيت إيل لأريحا لنهر الأردن اللي شقّه إيليا بثوبه
  • إيليا قال لأليشع: تطلب إيه قبل ما أؤخَذ عنك؟ أليشع كان متواضع و فاهم عظمة المسؤولية اللي هاتكون عليه كخليفة إيليا، فطلب 2 من روحه (يعني هو ياخد روح إيليا، و إيليا أيضاً كأنه يفضل بروحه معه)
  • و جت مركبة نارية و معاها عاصفة صعد فيها إيليا حياً إلى السماء ... إيليا ساب ردائه لأليشع و أليشع عمل بيه أول معجزة (شق نهر الأردن)
  • و استمرّت معجزات أليشع: تنقية المياه في أريحا ... و معجزة لعن الساخرين باسم الرب

نقدر نسمع عن المرأة الشونمية

• إصحاح 8: مجاعة في السامرة و ملوك أشرار في يهوذا
  • في إسرائيل:
    بعد الإصحاح اللي فات، إحنا متوقّعين توبة عظيمة ... لكن ماحصلش، بل حدثت مجاعة لمدة 7 سنين
  • في أرام:
    • مرض بنهدد ملك أرام (في ملوك الأول 19، ربنا كان كلّف إيليا يمسح ملك جديد على أرام).
    • أليشع هو اللي عمل كده، لمّا بنهدد أرسل له حزائيل قال له أليشع إنه هيكون ملك على أرام (و شاف بروح النبوة قد إيه حزائيل ده هايكون ملك شرير و قاسي على إسرائيل)
    • و حزائيل للأسف كان خائن و بيخطّط للاستيلاء على الملك، فقتل بنهدد
  • في يهوذا:
    يهوشافاط بيموت و بييجي ابنه يهورام اللي كان شرير زي ملوك إسرائيل لأنه اتجوّز بنت آخاب (عثليا) ... و جه بعده ابنه أخزيا اللي برضه كان شرير

• إصحاح 9 و 10: ياهو يقضي على نسل آخاب
  • المهمة الثالثة اللي ربنا كلّف بيها إيليا (ملوك الأول 19) عملها أليشع لمّا بعت واحد من الأنبياء و مسح قائد عسكري اسمه ياهو بن نمشي ملكاً على إسرائيل بمهمة واضحة: الانتقام لدم عبيد الرب من إيزابل و بيت آخاب
  • و عمل ياهو كده: قتل يهورام بن آخاب الملك في حقل نابوت اليزرعيلي، و قتل كمان أخزيا ملك يهوذا و حفيد آخاب (ابن ابنته عثليا اللي كان راجع مع يهورام من الحرب) ... وقتل إيزابل
  • استمر ياهو في مقاومة الشر بكل قوة: قتل أولاد آخاب ال70 الباقين في السامرة و قضى على عائلة آخاب
  • و قضى كمان على كل أنبياء البعل و كل من يعبده
  • لكن للأسف ياهو قاوم الشر فقط و لم يتمسك بالخير، و بالتالي لا يُحسَب كملك بار لأن قلبه ماكانش مع ربنا

  ياهو كان عنيف جداً و شرير و ده أغضب ربنا لأن العدل مش محتاج كل العنف ده عشان يتحقق ... و بالتالي هوشع النبي اللي ظهر في الوقت ده تنبأ ضد ياهو:
  "لأنني بعد قليل أعاقب بيت ياهو على دم يزرعيل" (هوشع 1 : 4)

• إصحاح 11 و 12: يهوياداع الكاهن و يوآش الملك في يهوذا
  • وصل الشر في يهوذا لدرجة إن (عثليا) أم الملك أخزيا و ابنة آخاب لمّا مات ابنها، حاولت تقتل كل النسل الملكي (أولادها و أحفادها) عشان تملك هي! و عثليا ملكت فعلاً 6 سنين نشرت فيها عبادة البعل في يهوذا
  • لكن بمساعدة يهوياداع الكاهن الأمين، تم إنقاذ حياة يوآش و هو طفل رضيع و رعايته في الهيكل لحد ما كمّل 7 سنين ... بعد كده بمساعدة اللاويين ملّكوه و قتلوا كهنة البعل و بدأوا يرجعوا لربنا
  • يوآش كان ملك كويس و ملك 40 سنة ... تحت قيادة وإرشاد يهوياداع الكاهن
  • و كان عايز يرمّم الهيكل بس ماكانش فيه فلوس، فظهرت فكرة صندوق العطاء ... و الناس استجابت و تمّ ترميم الهيكل
  • لكن للأسف حصلت فتنة عليه و اتقتل
• إصحاح 13 و 14: الحرب بين إسرائيل و أرام

  من أول هنا مملكة الشمال بتكون أشبه بعصر القضاة: الشعب بعيد عن ربنا، فربنا يسمح إن الأمم اللي حواليهم تضايقهم (هنا تحديداً أرام) فيتوبوا شوية فينقذهم ربنا ... لكن يرجعوا إلى آثامهم تاني، و ربنا يعاقبهم تاني!
  برضه من أول الفترة دي (800 ق.م.) تبدأ نبوات الأنبياء الكبار و الصغار

  • بعد موت ياهو جه ابنه يهوأحاز اللي سار في طريق يربعام بن نباط … حزائيل ملك أرام حاربه و دمّر جيشه (زي ما أليشع تنبأ في إصحاح 8) فتضرّع يهوأحاز لربنا اللي رحمه و لم يفنِ الشعب تماماً
  • بعد كده جه يوآش بن يهوأحاز، وربنا صنع على يديه الخلاص من أرام (اللي كان مات ملكها حزائيل) و بدأ إسرائيل يستردّ المدن اللي أخدها منهم الأراميون
  • و في الوقت ده مات أليشع بعد مرض بسيط
  • بالنسبة لمملكة الجنوب، جه أمصيا بن يوآش اللي كان ملك كويس لكنه حارب إسرائيل بدون سبب و انهزم في الحرب وأخذ يوآش ملك إسرائيل كل الذهب والفضة من الخزنة و الهيكل ... بعد كده فَتَن عبيد أمصيا عليه و قتلوه
  • بينما بالنسبة لمملكة الشمال، فالوضع يزداد سوءاً: جه يربعام بن يوآش بعد موت أبيه، لكنه كان ملك وِحِش برضه ... لكن من رحمة ربنا إنه أعطاه النُصرة في حربه ضد أرام
• إصحاح 15 و 16: طريق إسرائيل إلى السبي
  • بالنسبة لمملكة الشمال:
    • الوضع يزداد سوءاً حتى على المستوى الداخلي، تبدأ الانقلابات والاغتيالات - زكريا بن يربعام (الجيل الرابع من ياهو)، قتله شلّوم بن يابيش ، و قتل شلّوم منحيم بن جادي في انقلاب عنيف.
    • في الوقت ده جه ملك أشور على إسرائيل لكنهم دفعوا له فدية كبيرة جداً فمشي ... جه فقحيا بعد موت أبيه منحيم، و قتله فقح بن رمليا و مَلَك بداله
    • في وقت الملك ده بدأ سبي أشور لإسرائيل على يد تغلث فلاسر ملك أشور اللي سبى الجزء الشمالي (الجليل) ... و جه بدل فقح هوشع بن أيلة اللي قتله
  • بالنسبة لمملكة الجنوب:
    • الموضوع كان أحسن بكتير في الأول: بعد أمصيا ملك عُزّيا (عزريا) ابنه فترة طويلة و كان ملك كويس و مستقيم
    • و بعده يوثام ابنه و كان كويس برضه خصوصاً في بدايته
    • و بعده آحاز ابنه اللي كان ملك شرير و جبان … الملك ده بنقرا عنه أكتر في سفر إشعياء النبي الذي تنبّأ في عصره
    • في الوقت ده تحالفت مملكة إسرائيل مع أرام (سوريا) عشان يهاجموا مملكة يهوذا ... آحاز كان خايف من الهجوم ده و حاول يتحالف مع مملكة أشور عشان تخلّصه من إسرائيل و أرام (رغم إن ربنا بعت إشعياء لآحاز يطمئنه و يقول له اتّكل عليّ أنا وأنت تخلُص، لكن آحاز رفض بل لجأ لمملكة أشور الدموية)
    • و ملك أشور خلّصه و هاجم أرام و إسرائيل لكن مش عشان صداقة مع آحاز الغبي، بل لأن في الوقت ده مملكة أشور بدأت تخطّط للسيطرة على العالم ... و ملك أشور جاب آحاز لدمشق بعد ما دمّرها و ملاها بالجثث عشان يستعرض قدامه قوّته، و بقى آحاز عبد لأشور، و عمل مذبح لآلهة أشور في هيكل ربنا بقى بيذبح عليه، بدل مذبح ربنا
• إصحاح 17: سبي و نهاية إسرائيل على يد أشور
  • مملكة أشور طمعت أكثر في عصر ملكها شلمناصر فصعدت على مملكة الشمال و أخضعها مع آخر ملوكها (هوشع بن أيلة) تحت الجزية ... و لمّا هوشع حاول يتمرّد على أشور، حاصرت أشور إسرائيل و دمّرتها و أخدت الناس اللي فيها لأشور
  • و بنشوف إن اللي سكنوا أرض إسرائيل ناس من بابل و من الشعوب المحيطة بإسرائيل ... الناس دي طبعاً في الأول ماتعرفش ربنا، و ربنا عشان يدّيهم فرصة ليعرفوه ويعبدوه، أرسل عليهم السباع
  • هم فهموا إن إله الأرض دي غضبان منهم فقرّروا يتّقوه لكن بطريقة خاطئة ... الناس دي عملت حاجة وحشة جداً: كانوا بيعبدوا ربنا مع آلهتهم القديمة (الأصنام) بنفس ممارساتهم القديمة
  • و بالتالي اختلطت عندهم التوراة بالديانات الوثنية ... و من هنا بعد كده بنفهم إن اليهود بيكرهوا السامريين عشان كده

• إصحاح 18 ل 20: النجاة من الحصار في عهد حزقيا

  نقدر نقرا بتفصيل أكثر في ملخص سفر إشعياء

  • بعد قضاء أشور على إسرائيل مابقاش فاضل في المنطقة كلها غير مملكة يهوذا اللي كانت بتمثّل كوبري بين أشور و مصر، و بالتالي عقبة (سهلة) في طريق أشور عشان تسيطر على العالم ... في الظروف الصعبة دي، جه أحسن ملك من ملوك يهوذا: حزقيا بن آحاز
  • و نقرأ عن الحصار الصعب جداً لمملكة أشور على أورشليم
  • كان رد فعل حزقيا هو الصوم و الصلاة الحارة لربنا بإيمان، و طلب صلاة وشفاعة إشعياء النبي ... و بمعجزة رائعة ربنا تدخّل و أهلك 185 ألف من جيش أشور، و رجع ملك أشور مهزوم و قتله ولديه في أشور
  • زي ما بنشوف كمان في إشعياء 38 و 39، حزقيا الملك جاءه مرض للموت، لكن ربنا سمع صلاته و أعطاه 15 سنة إضافية
  • حزقيا بعد كده وقع في غلطة كبيرة جداً لمّا انخدع من جواسيس بابل و ورّاهم كل مجده و خزائنه ... طبعاً ده فادهم جداً بعد كده لمّا خدوا مكان أشور و قرّروا يسبوا يهوذا
• إصحاح 21: منسّى أشرّ ملوك يهوذا
  • للأسف حزقيا مات صغير في السن، و ابنه منسّى مَلَك و هو صغير جداً (12 سنة) .. و طبعاً كان عليه دور كبير جداً يكون قائد عظيم زي أبوه لكنه بدل ما يلجأ لربنا و ينتظره و يترجّاه، سمع للشيطان و قتل إشعياء النبي الذي لم يتنبأ في عصره و قتل أبرار كتير جداً ولجأ لعبادة الأوثان (بكل النجاسة اللي فيها) حتى في الهيكل بتاع ربنا لدرجة إنه رمى ابنه في النار زي ما كان الوثنيون بيعملوا
  • و ربنا ماعندوش محاباة: زي ما الأمم صمّموا على الشر و عاقبهم، وإسرائيل صمّموا على الشرّ وعاقبهم ... كمان يهوذا لو صمّموا على الشرّ يعاقبهم
  • نعرف بعد كده (من أخبار الأيام الثاني 33) إن منسّى في آخر أيامه تاب بعد ما سُبي في أشور و عرف إن مافيش إله غير ربنا إله أبوه حزقيا ... وعاد لمُلكه بمعجزة بعد أن كتب في السجن واحدة من أجمل الصلوات في الأسفار القانونية الثانية، (نقراها يوم سبت النور)
  • بعد منسّى مَلَك آمون ابنه و برضه كان شرير زي منسّى
• إصحاح 22 و 23: فترة إصلاح أخيرة في زمن يوشيا

  نقدر نشوف كارتون يوشيا يجدّد العهد

  • بعد آمون جه ابنه يوشيا اللي كان بار و مستقيم زي حزقيا الملك و زي داود النبي ... لكن واضح إن يوشيا جه متأخر جداً و إن الشعب ابتعد عن ربنا تماماً في فترة منسّى و آمون، لدرجة إنهم مكانش عندهم كتاب الشريعة (التوراة والنبوات)!!
  • لقوها و هم بيرمّموا الهيكل في السنة ال18 لمُلكه ... و لمّا قرا الملك كلام الشريعة اترعب جداً من العقوبات اللي فيها على كل الخطاة، و تاب توبة قوية، و سأل نبية اسمها خلدة عن الكلام ده، و ربنا بعت الرد معاها: بسبب توبتك و تواضعك يا يوشيا مش هتشوف الشر ده، لكن العقاب هيحصل في حالة رجوع الشعب للخطية تاني
  • يوشيا عمل إصلاحات عظيمة:
    1. جمع الشعب كلّه و قرأ عليهم كتاب الشريعة وقطع معهم عهداً بالالتزام بالشريعة
    2. حاول بكل قوّته يقضي على عبادة الأوثان و كهنة الأوثان و النجاسات اللي في الهيكل و أورشليم و حتى السامرة و بيت إيل (زي ما تنبأ رجل الله في عهد يربعام أول ملك للمملكة الشمالية - ملوك الأول 13)
    3. حاول يرُدّ الشعب لربنا و عمل فِصح عظيم جداً بتوبة قوية جداً
  • بعد موت يوشيا في حرب مع فرعون، بدأت مصر تسيطر شوية على يهوذا ... ملك بعد يوشيا ابنه يهوآحاز اللي كان شرير
  • بعد كده فرعون ملّك الياقيم بن يوشيا التاني و غيّر اسمه إلى يهوياقيم ... و برضه كان شرير
• إصحاح 24 و 25: السبي على يد نبوخذنصر
  سبي أورشليم حصل على 3 مرات عن طريق نبوخذ نصّر ملك بابل
  1. في عهد الملك يهوياقيم: الجزية و النفوذ البابلي مع بقاء المُلك لملك يهوذا
  2. في عهد الملك يهوياكين ابنه: سبي الأقوياء و الجيّدين من الشعب و الخير اللي في المدينة، مع بقاء الضعفاء في المدينة وعدم هدمها
  3. في عهد الملك صدقيّا (اللي وضعه نبوخذنصر بعد ما سبى يهوياكين): تم دمار المدينة بسبب تمرُّد صدقيا: في السنة التاسعة لمُلك صدقيا، حاول يتمرّد على نوخذنصّر اللي حاصر أورشليم سنتين بجيوشه لحد ما المدينة حصل فيها مجاعة و حاول الملك والجيش يهربوا، لكن نبوخذ نصر تبعهم بجيشه و قتلوا أولاد صدقيّا و كبار قوّاده و سبوه و دمّروا المدينة تماماً وسورها و أخدوا كل ما في الهيكل و دمّروه ... لم يبقَ في الأرض غير شوية فلاحين و كرّامين هربوا هم كمان على مصر بعد ما قتلوا القائد الذي عيّنه ملك بابل عليهم
  و وسط كل المصائب دي، بينتهي السفر بخبر فيه رجاء، إن بعد السبي بحوالي 20 سنة، أطلق ملك بابل سراح يهوياكين (الملك السابق ليهوذا) و أكرمه