ذيكو

الأناجيل

متى

يسوع هو المسيح الملك = الله الظاهر في الجسد

القديس متى كتب إنجيله عشان يوضّح إن يسوع هو المسيح (اللي ربنا وعد به إبراهيم) و هو الملك السماوي (اللي من نسل داود) و هو مشرّع عهد جديد (زي موسى في العهد القديم) بل كمان هو عمانوئيل (الله الظاهر في الجسد) اللي فيه تحقيق كل النبوات و جه عشان يخلّصنا من خلال صليبه وقيامته

  • عدد الإصحاحات: 28
  • ظروف الكتابة:
    • كاتب السفر هو القديس متى الرسول (لاوي بن حلفى العشّار - و معنى اسمه: عطية الله) أحد التلاميذ ال12
    • كتبه بعد حوالي 30 أو 40 سنة من صعود ربنا يسوع … هو تاني إنجيل تاريخياً (بعد إنجيل مرقس)
  • هدف السفر:
    • هو الوصلة بين العهد القديم والعهد الجديد
    • القديس متى كتب إنجيله لليهود عشان يبرهن لهم أن يسوع هو المسيح المُنتَظَر حسب نبوّات العهد القديم … عشان كده هو أكثر إنجيل فيه نبوات من العهد القديم
    • هو أكثر إنجيل فيه كلمة (ملكوت السماوات) لأنه بيقدّم ربنا يسوع الملك الجديد (من نسل داود)، لكن ملك سماوي مش أرضي

السفر متقسّم إلى 5 مواضيع رئيسية بين المقدمة و الختام

إصحاح 1 ل 3
الربط بين يسوع و العهد القديم

إصحاح 4 ل 7
إعلان ملكوت الله

إصحاح 8 ل 10
يسوع يأتي بالملكوت إلى حياة الناس

إصحاح 11 ل 13
ردود الأفعال تجاه يسوع

إصحاح 14 ل 20
توقعات متباينة عن المسيح

إصحاح 21 ل 25
الصدام مع قادة اليهود

إصحاح 26 ل 28
الفداء

# 1: الربط بين يسوع و العهد القديم

إصحاح 1 ل 3
الصورة من موقع BibleProject
  • (إصحاح 1) نسب السيد المسيح
    • يبدأ القديس متى إنجيله بنسب السيد المسيح من القديس يوسف النجار و بيرجّعه إلى شخصيتين رئيسيتين في تاريخ العهد القديم: داود الملك و أبونا إبراهيم
    • بعد كده قصة الميلاد لمّا ظهر الملاك للقديس يوسف و قال له إن العدرا حُبلى من الروح القدس بدون زواج تتميماً لنبوة إشعياء النبي
  • (إصحاح 2) زيارة المجوس و الهروب إلى مصر
    • (آية 1 ل 12) زيارة المجوس لربنا يسوع (زي ما نقرأ في إنجيل عيد الميلاد)
    • (آية 13 ل 18) الهروب إلى مصر بعد رؤيا القديس يوسف … و هيرودس الكبير قتل أطفال بيت لحم والمناطق المحيطة بها بعد هروب المجوس دون أن يبلغوه بمكان المولود ملك اليهود
    • (آية 19 ل 23) العودة للناصرة بعد موت هيرودس و مًلك ابنه أرخيلاوس على اليهودية

    • نقدر نعرف أكتر عن العائلة المقدسة في مصر

  • (إصحاح 3) المعمودية
    • (آية 1 ل 12) خدمة يوحنا المعمدان اللي بدأ يعمّد الناس معمودية التوبة و يهيء الطريق للمسيح
    • (آية 13 ل 17) معمودية ربنا يسوع من يوحنا التي نحتفل بها في عيد الغطاس

    • نقدر نشوف كارتون عيد الغطاس - معمودية ربنا يسوع

نبوات العهد القديم في إنجيل متى - إصحاح 1 ل 3
النبوة العهد القديم العهد الجديد
هوذا العذراء تحبل وتَلِد ابناً، ويدعون اسمه عمانوئيل إشعياء 7 : 14 متى 1 : 23
وأنت يا بيت لحم، أرض يهوذا لست الصغرى بين رؤساء يهوذا، لأن منك يخرج مدبر يرعى شعبي إسرائيل ميخا 5 : 2 متى 2 : 6
وقدموا له هدايا: ذهبا ولبانا ومرا إشعياء 60 : 6 متى 2 : 11
من مصر دعوت ابني هوشع 11 : 1 متى 2 : 15
صوت سمع في الرامة، نوح وبكاء وعويل كثير. راحيل تبكي على أولادها ولا تريد أن تتعزى، لأنهم ليسوا بموجودين إرميا 31 : 15 متى 2 : 18
إِنَّهُ سَيُدْعَى نَاصِرِيًّا زكريا 6 :12 (لأن الناصرة معناها الغصن) متى 2 : 23
صوت صارخ في البرية: أعدوا طريق الرب. اصنعوا سبله مستقيمة إشعياء 40 : 3 متى 3 : 3

فاصنعوا أثمارا تليق بالتوبة

متى 3 : 8
  • رسالة يوحنا المعمدان كانت واضحة: التوبة ... و التوبة تُقاس بالثمار
  • و الثمار دي وضّحها القديس بولس في رسالة غلاطية: وأما ثمر الروح فهو: محبة، فرح، سلام، طول أناة، لطف، صلاح، إيمان، وداعة، تعفف.
  • هو ده مقياس التوبة الحقيقي

نتعلّم إيه؟

نبوات كتير جداً في العهد القديم انطبقت على ربنا يسوع قبل حتى ما يبدأ خدمته

يا رب خليني أفهم إن الكتاب المقدس كله وحدة واحدة مترابطة بعهديه القديم و الجديد

# 2: إعلان ملكوت الله

إصحاح 4 ل 7
الصورة من موقع BibleProject
  • (إصحاح 4) بداية خدمة السيد المسيح
    • التجربة - ربنا يسوع راح البرية و صام 40 يوماً بعدها جرّبه الشيطان، و ربنا يسوع انتصر عليه من آيات الكتاب المقدس (إنجيل أحد التجربة)
    • بداية الخدمة - بعدها ربنا يسوع راح كفرناحوم و بدأ يعلّم و يشفي المرضى … و دعا تلاميذ زي بطرس و أندراوس و يوحنا و يعقوب

    نقدر نشوف كارتون التجربة

  • (إصحاح 5 ل 7) الموعظة على الجبل
    • إصحاح 5: إكمال الناموس
      • (آية 1 ل 16) التطويبات - زي ما نقرأ في إنجيل صلاة الساعة السادسة في الأجبية
      • (آية 17 ل 48) إكمال الناموس - إكمال العهد القديم (أو التقليد اليهودي) عن طريق شريعة الكمال في العهد الجديد
      • إكمال الناموس في الموعظة على الجبل
      الموضوع سمعتم أنه قيل أمّا أنا فأقول لكم
      الغضب لا تقتل من يغضب على أخيه باطلاً يكون مستوجب الحُكم
      الزنا لا تزنِ من نظر إلى إمرأة ليشتهيها فقد زنى بها في قلبه
      الطلاق من يطلّق امرأته فليُعطِها كتاب طلاق من طلّق امرأته إلا لعلّة الزنى يجعلها تزني
      القسم لا تحنث لا تحلفوا البتّة
      الانتقام عين بعين و سنّ بسنّ لا تقاوموا الشر
      محبة الأعداء تحب قريبك و تبغض عدوّك أحبّوا أعدائكم. باركوا لاعنيكم. أحسِنوا إلى مبغضيكم.
    • إصحاح 6: الكنز في الخفاء
      • (آية 1 ل 18) الصوم و الصلاة و الصدقة في الخفاء - و الفصل ده نقرأه في أحد رفاع الصوم الكبير
      • (آية 19 ل 34) الكنز في السماء - و الفصل ده نقرأه في الأحد الأول من الصوم الكبير (أحد الكنوز)

      • نقدر نقرا ملخص كتاب أحد الكنوز

    • إصحاح 7: تعاليم متنوعة
      • عدم الإدانة - زي ما ندين الناس ربنا يديننا
      • الطلب من الله - الآب السماوي الطيب اللي بيعطي عطايا جيدة لكل من يطلب
      • الثمر - الكلام سهل لكن أولاد ربنا يظهروا من أفعالهم زي ما الشجرة تبان من ثمرها

      أخيراً حفظنا و عملنا لوصايا ربنا بيخلينا زي اللي باني بيته على الصخر زي ما نشوف في الكارتون ده

نبوات العهد القديم في إنجيل متى - إصحاح 4 ل 7
النبوة العهد القديم العهد الجديد
ليس بالخبز وحده يحيا الإنسان، بل بكل كلمة تخرج من فم الله تثنية 8 : 3 متى 4 : 4
أنه يوصي ملائكته بك، فعلى أياديهم يحملونك لكي لا تصدم بحجر رجلك مزمور 91 : 11 متى 4 : 6
لا تجرب الرب إلهك تثنية 6 : 16 متى 4 : 7
للرب إلهك تسجد وإياه وحده تعبد تثنية 6 : 13 متى 4 : 10
أرض زبولون، وأرض نفتاليم، طريق البحر، عبر الأردن، جليل الأمم. الشعب الجالس في ظلمة أبصر نورا عظيما، والجالسون في كورة الموت وظلاله أشرق عليهم نور إشعياء 9 : 1 و 2 متى 4 : 15 و 16

فإنه إن غفرتم للناس زلاتهم، يغفر لكم أيضا أبوكم السماوي. وإن لم تغفروا للناس زلاتهم، لا يغفر لكم أبوكم أيضا زلاتكم.

متى 6 : 14 و 15
  • الوصية اللي ربنا عادها و فصّلها بعد أبانا الذي هي المغفرة، و الشرط واضح: سامح الناس و ساعتها ربنا يسامحك ... أو ماتسامحش و تبقى حكمت على نفسك إن ربنا لن يغفر لك

نتعلّم إيه؟

نقلة كبيرة جداً عملها ربنا يسوع في تعليمه هنا ... كمّل ناموس العهد القديم بعهد جديد من المحبة أكيد أدهش كل من يسمعه

يا رب مدخل العهد الجديد هو قلب جديد مليان محبة بفعل روحك القدوس .. إديني يا رب القلب و الإرادة و الفكر إني أعيش حسب وصاياك

# 3: يسوع يأتي بالملكوت إلى حياة الناس

إصحاح 8 ل 10
الصورة من موقع BibleProject
  • الجزء ده بيركّز على معجزات ربنا يسوع زي:
    • إصحاح 8: شفاء أبرص + شفاء غلام قائد المئة + شفاء حماة سمعان + تهدئة البحر العاصف + طرد الشياطين وشفاء من بهم أرواح شريرة
    • إصحاح 9: شفاء المفلوج المدلّى من السقف + شفاء نازفة الدم + إقامة ابنة يايرس + شفاء أعميين + شفاء أخرس

    نقدر نشوف كارتون المفلوج

  • إصحاح 10: إرسال الرسل ال12
    • و ربنا يسوع لمّا أرسلهم أعطاهم سلطان يعملوا معجزات و رسالة واضحة للناس (اقترب منكم ملكوت السماوات)
    • لكن معاها تحذيرات واضحة إن فيه رفض من ناس كتير و هتوصل لجَلد و اضطهاد (زي ما هيحصل له)
    • مع الاضطهاد فيه معونة و إرشاد و قوة من ربنا بالروح القدس
    • و في الآخر فيه أبدية سعيدة لكل من يصبر ويثبت
نبوات العهد القديم في إنجيل متى - إصحاح 8 ل 10
النبوة العهد القديم العهد الجديد
هو أخذ أسقامنا وحمل أمراضنا إشعياء 53 : 4 متى 8 : 17

إني أريد رحمة لا ذبيحة، لأني لم آت لأدعو أبرارا بل خطاة إلى التوبة

متى 9 : 13
  • فارق كبير جداً في النظرة للخطاة و درس مهم علّمه ربنا يسوع لنا و هو جالس في بيت متى العشار في وليمة مع أصدقاءه العشارين ذوي السمعة السيئة
  • ربنا عايز القلب المليان حنان و محبة للكل مش القلب اللي بيدين و يرفض زي الكتبة و الفريسيين اللي انتقدوه

نتعلّم إيه؟

ربنا يسوع كان واضح جداً و هو بيرسل تلاميذه ... كان واقعي و قال لهم رسالة واضحة مع سلطان واضح مع توقّع واضح للتحديات و إزاي يواجهوها و إيه المكافئة النهائية

يا رب خليني في خدمتي و كل بداية جديدة لي، أراجع رسالتي و طريقي و التحديات اللي فيه و أتوقّع إيه و أعمل إيه

# 4: ردود الأفعال تجاه يسوع

إصحاح 11 ل 13
الصورة من موقع BibleProject
  • إصحاح 11: السيد المسيح ويوحنا المعمدان
    • يوحنا المعمدان في السجن أرسل 2 من تلاميذه بيسألوا ربنا سؤال شكله محايد: هل أنت المسيح؟
    • طبعاً يوحنا كان عارف الإجابة من ساعة المعمودية … لكن كان عايز تلاميذه يعرفوا بنفسهم و يتبعوا ربنا يسوع
    • و ربنا يسوع طوّب يوحنا المعمدان و قال إنه أعظم مواليد النساء
  • إصحاح 12: السيد المسيح و الفريسيين
    • على عكس يوحنا، الفريسيين عاندوا ربنا يسوع و اتّهموا رب السبت إنه بيكسر السبت لأنه بيشفي ناس في السبت
    • بل تطاولوا على ربنا يسوع و قالوا إنه ببعلزبول رئيس الشياطين يُخرِج الشياطين!
    • على عكس كده، الشعب شاف معجزات ربنا يسوع وسمع تعاليمه و قالوا: هو ده المسيح
  • إصحاح 13: أمثال الملكوت
    - في الإصحاح ده ربنا يسوع علّم الجموع بأمثال عن ملكوت السماوات، و شرح بعض هذه الأمثال لتلاميذه
    • الزارع : زي ما نسمع في العظة دي
    • القمح والزوان : اللي ربنا بيّن فيه إنه يعطي الأشرار على الأرض فرصة للتوبة حتى يأتي يوم الدينونة … لو لم يتوبوا سيكون مصيرهم الذي اختاروه هو للعذاب الأبدي
    • حبة الخردل : زي ما نشوف في الكارتون ده
    • الخميرة : اللي بيبيّن قد إيه ملكوت السماوات و البشارة بربنا يسوع تنتشر في كل العالم زي الخميرة ما يخمّر الدقيق
    • الكنز المخفي في حقل : زي ما نشوف في الكارتون ده
    • اللؤلؤة الكثيرة الثمن : زي ما نقرأ في التأمل ده
    • الشبكة : زي ما نشوف في الكارتون ده
نبوات العهد القديم في إنجيل متى - إصحاح 11 ل 13
النبوة العهد القديم العهد الجديد
ها أنا أرسل أمام وجهك ملاكي الذي يهيئ طريقك قدامك ملاخي 3 : 1 متى 11 : 10
هوذا فتاي الذي اخترته، حبيبي الذي سرت به نفسي. أضع روحي عليه فيخبر الأمم بالحق. لا يخاصم ولا يصيح، ولا يسمع أحد في الشوارع صوته. قصبة مرضوضة لا يقصف، وفتيلة مدخنة لا يطفئ، حتى يخرج الحق إلى النصرة. وعلى اسمه يكون رجاء الأمم إشعياء 42 : 1 ل 4 متى 12 : 18 ل 21
تسمعون سمعا ولا تفهمون، ومبصرين تبصرون ولا تنظرون. لأن قلب هذا الشعب قد غلظ، وآذانهم قد ثقل سماعها. وغمضوا عيونهم، لئلا يبصروا بعيونهم، ويسمعوا بآذانهم، ويفهموا بقلوبهم، ويرجعوا فأشفيهم إشعياء 6 : 10 متى 13 : 14 و 15
سأفتح بأمثال فمي، وأنطق بمكتومات منذ تأسيس العالم مزمور 78 : 2 متى 13 : 35

الإنسان الصالح من الكنز الصالح في القلب يخرج الصالحات، والإنسان الشرير من الكنز الشرير يخرج الشرور

متى 12 : 35
  • تعليم واضح من ربنا يسوع إن الإنسان بيبان إيمانه و صلاحه من ثمر أعماله

نتعلّم إيه؟

نفس البذار (كلمة ربنا يسوع و تعاليمه) كان الثمر لها مختلف حسب الأرض (رفض من الفريسيين و استجابة من التلاميذ و الشعب)

يا رب إدّيني أكون أرض جيدة تستقبل تعليمك بفهم حتى تثبت في قلبي وقت الشدة و التجارب

# 5: توقعات متباينة عن المسيح

إصحاح 14 ل 20
الصورة من موقع BibleProject
  • إصحاح 14: اعتراف التلاميذ بلاهوت المسيح
    • يبدأ الإصحاح باستعادة قصة قطع رأس يوحنا المعمدان على يد هيرودس رئيس الربع الشمالي من إسرائيل بعد ما يوحنا قال له: لا يحلّ لك أن تتزوّج امرأة أخيك الحيّ
    • بعد كده معجزة إشباع الجموع زي ما نشوف في الكرتون ده
    • بعد كده في نفس اليوم معجزة المشي على الماء لمّا التلاميذ كانوا معذّبين من الأمواج طول الليل جه لهم يسوع ماشياً على الماء في الهزيع الرابع (قبل الفجر)

    و بعد المعجزتين دول التلاميذ إيمانهم بقى ثابت … سجدوا للسيّد المسيح و قالوا: بالحقيقة أنت ابن الله!

  • إصحاح 15: الوصية ولا التقليد؟
    • يبدأ الإصحاح بصدام بين ربنا يسوع و الكتبة و الفريسيين … هم سألوه: ليه تلاميذك يأكلون بأيدي غير مغسولة (عكس تقليد شيوخ اليهود)؟ ربنا في الآخر جاوب إن التقليد ده غير مهم لأن ما يخرج من الفم (الكلام) هو اللي ينجّس الإنسان و ليس ما يدخل (الأكل)
    • لكن كمان قال لهم إنهم يبطلون وصية الله بتقليدهم! مثال: ربنا قال أكرم أباك و أمك … بينما هم بيقولوا: مش لازم لو هاتقدّم قربان بدل ما تكرمهم
    • بعد كده بنشوف إيمان المرأة الكنعانية و شفاء ربنا يسوع لابنتها بعد ما أظهر إيمانها بامتحان صعب
    • بعد كده معجزة إشباع ال4 آلاف أسرة

    • في إصحاح 16 ربنا يسوع سأل تلاميذه من يقول الناس إني أنا؟ وأنتم من تقولون؟ بطرس جاوب: أنت هو المسيح ابن الله الحي .. و ربنا يسوع من هنا بدأ يكلّم تلاميذه عن آلامه وصليبه وقيامته عشان يصحّح توقّعاتهم و يقول لهم إنه مش ملك أرضي

  • إصحاح 17: التجلي - لمّا ربنا يسوع تجلّى على الجبل وظهر معه موسى و إيليا … و بعد التجلي برضه كلّم تلاميذه عن صليبه وقيامته

    نقدر نشوف كارتون التجلي

  • إصحاح 18 ل 20: المملكة المعكوسة - هنا ربنا يسوع بيقدّم تعاليم عكس اللي الناس متوقّعاها
    • العظمة: العظمة في الخدمة بتواضع زي ما ربنا علّم التلاميذ

      نقدر نسمع وعظة من هو الأعظم؟

    • الغفران: لازم نغفر لمن أساء إلينا و نعاتبه إن أخطأ إلينا زي ما ربنا بيعمل معانا … ده اللي شرحه يسوع في مثل (العبد الذي لا يغفر)
    • الزواج: هم بالنسبة لهم الطلاق شيء عادي و مافيهوش مشكلة، لكن ربنا يسوع فهّمهم إن الطلاق لعلّة الزنا فقط و إن الزواج سر عظيم فيه ربنا بيجمّع 2 و ماينفعش حد يفرّقهم … و فهّمهم إن الطلاق سمح به ربنا في العهد القديم لأن الناس كانت شريرة وقلبها قاسي و ممكن في حالة عدم الطلاق يعملوا جرائم أصعب

      الجزء ده هو اللي بنقراه في الإكليل

    • الغنى: في مثل الشاب الغني، ربنا بيّن إن الكنز الحقيقي في السماء (من خلال أعمال الرحمة) مش على الأرض (من خلال جمع الفلوس)
    • الأجر: الأجر السمائي واحد لكل من تاب و دخل في كَرم المسيح مهما تأخرت معرفته بربنا (مثل الفعلة في الكرم: اللي بدأوا في الساعة ال11 أخذوا نفس الأجر الكامل اللي أخذه اللي جاءوا باكراً)
نبوات العهد القديم في إنجيل متى - إصحاح 14 ل 20
النبوة العهد القديم العهد الجديد
يقترب إلي هذا الشعب بفمه، ويكرمني بشفتيه، وأما قلبه فمبتعد عني بعيدا. وباطلا يعبدونني وهم يعلمون تعاليم هي وصايا الناس إشعياء 19 : 13 متى 15 : 8 و 9
من أجل هذا يترك الرجل أباه وأمه ويلتصق بامرأته، ويكون الاثنان جسدا واحدا تكوين 2 : 24 متى 19 : 5

قال لهم: «وأنتم، من تقولون إني أنا؟»

متى 16 : 15
  • أهم سؤال في حياة كل واحد فينا: ربنا يسوع من بالنسبة لي؟ ده السؤال اللي هيحدّد اتجاه حياتي و مصيري

نتعلّم إيه؟

توقّعات كتير عن ربنا يسوع سواء من الفريسيين أو من الشعب أو من التلاميذ، و مافيش توقّع كان صح حتى من التلاميذ اللي كانوا عارفين إنه المسيح بس فاكرينه هايبقى ملك أرضي

يا رب خليني أفهم ملكوتك زي ما أنت شرحته و وضّحته ... طريق فيه ألم و صليب ينتهي بأمجاد عظيمة

# 6: الصدام مع قادة اليهود

إصحاح 21 ل 25
الصورة من موقع BibleProject

من أول هنا نبدأ أسبوع الآلام، و الأحداث اللي ذكرها معلّمنا متّى كالتالي

أحداث أسبوع الآلام المذكورة في إنجيل متى
اليوم الأحداث الشاهد
أحد السعف دخول السيد المسيح أورشليم متى 19
أثنين البصخة تطهير الهيكل
+ لعن شجرة التين		 متى 19
ثلاثاء البصخة سؤال الكتبة و الفريسيين عن سلطان يسوع
+ مثل الابنين
+ مثل الكرّامين الأردياء
+ مثل عُرس ابن الملك
+ دفع الجزية لقيصر
+ سؤال الصدوقيين عن القيامة من الأموات
+ سؤال الفريسيين عن الوصية العظمى
+ كلام ربنا يسوع عن المسيح ابن داود و ربّه
+ الويلات للكتبة والفريسيين
+ علامات خراب الهيكل ونهاية الأزمنة
+ مثل العذارى
+ مثل الوزنات
+ عمل الرحمة		 متى 19 ل 25

نقدر نتابع أحداث أسبوع الآلام في المعلومة دي

نبوات العهد القديم في إنجيل متى - إصحاح 21 ل 25
النبوة العهد القديم العهد الجديد
قولوا لابنة صهيون هوذا ملكك ياتيك وديعا راكبا على اتان و جحش ابن اتان زكريا 9 : 9 متى 21 : 5
بيتي بيت الصلاة يدعى و انتم جعلتموه مغارة لصوص إرميا 7 : 11 متى 21 : 13
من افواه الاطفال و الرضع هيات تسبيحا مزامير 8 : 2 متى 21 : 16
الحجر الذي رفضه البناؤون هو قد صار راس الزاوية من قبل الرب كان هذا و هو عجيب في اعيننا مزامير 118 : 22 و 23 متى 21 : 42
قال الرب لربي: اجلس عن يميني حتى أضع أعداءك موطئا لقدميك. مزامير 110 : 1 متى 22 : 44

فأجابت الحكيمات قائلات: لعله لا يكفي لنا ولكن، بل اذهبن إلى الباعة وابتعن لكن

متى 25 : 9
  • آخر تعاليم ربنا يسوع للناس هي الاستعداد و عمل الرحمة
  • الباعة هم إخوة الرب اللي ربنا أوصانا بهم لأن كل ما نفعله بهم نفعله به هو ... و كل ما لم نفعله بهم لم نفعله به

نتعلّم إيه؟

صدام قوي جداً بنتظر كل اللي يمشي في سكة ربنا لأن فيه كتير يرفض ربنا .. ولاد ربنا لازم يتمسكوا به من غير خوف

يا رب في وقت الصراع و الصدام مع العالم خليني أمسك فيك مهما حصل

# 7: الفداء

إصحاح 26 ل 28
الصورة من موقع BibleProject

من أول هنا نبدأ أربعاء البصخة و معلمنا متى ذكر كل الأحداث التي نقرأها في البصخة زي ما موجود في المعلومة دي ما عدا بعض الأحداث

أحداث أسبوع الآلام الغير مذكورة في إنجيل متى
اليوم الأحداث الشاهد
خميس العهد غسل الأرجل يوحنا 13
خميس العهد الصلاة الوداعية في بستان جثسيماني: فصول البارقليط (خطاب السيد المسيح الوداعي لتلاميذه) يوحنا 14 ل 17
الجمعة العظيمة بعض المحاكمات (زي المحاكمة قدام هيرودس) لوقا 23
الجمعة العظيمة أمانة اللص و اعترافه بالمسيح لوقا 23
الجمعة العظيمة كلمات السيد المسيح على الصليب (ما عدا إلهي إلهي لماذا تركتني) لوقا 23 و يوحنا 19
الجمعة العظيمة طعن جنب السيد المسيح ليخرج دم و ماء (بدل كسر ساقيه) لكي تتم النبوات يوحنا 19

ينتهي إنجيل معلمنا متى بقيامة ربنا و ظهوره للتلاميذ و إرساله لهم و وعده المريح لهم (ها أنا معكم كل الأيام) … و على الناحية التانية قساوة قلب رؤساء الكهنة اللي أعطوا رشوة للحراس عشان يقولوا إن التلاميذ سرقوا الجسد

نبوات العهد القديم في إنجيل متى - إصحاح 26 ل 28
النبوة العهد القديم العهد الجديد
وأخذوا الثلاثين من الفضة، ثمن المثمن الذي ثمنوه من بني إسرائيل، وأعطوها عن حقل الفخاري، كما أمرني الرب زكريا 11 : 13 متى 27 : 9 و 10
اقتسموا ثيابي بينهم، وعلى لباسي ألقوا قرعة مزامير 22 : 18 متى 27 : 35
إلهي، إلهي، لماذا تركتني؟ مزامير 22 : 1 متى 27 : 46

من تريدون أن أطلق لكم؟ باراباس أم يسوع الذي يدعى المسيح؟

متى 27 : 17
  • اختيار بيواجهنا في أوقات كتير جداً: مين يغلب عندك؟ ربنا يسوع ولا الشيطان؟
  • ربنا يدينا نختار صح (مش زي الشعب ده) ... و لو اخترنا غلط نتوب (زي اللص اليمين)

نتعلّم إيه؟

مواقف مختلفة و ناس كتير عند صليب ربنا يسوع (بيلاطس السلبي، رؤساء الكهنة الأشرار، بطرس التائب، يهوذا اليائس، اللص الأمين ...)

يا رب خليني أتعلّم من اللص اليمين الأمين اللي خطف الملكوت ... مايئسش أبداً و أنا شايف صليبك

  • تقدر تعمل account على الموقع من هنا و تحتفظ بالملخص على صفحة ال account بتاعك
  • تقدر تعمل share للصفحة دي مع أصحابك و كنيستك عشان نستفيد بالملخص ده مع بعض
  • تقدر تعمل download للملخص على الجهاز بتاعك

مرقس

يقدم لنا القديس (مرقس - مطرقة) و للرومان السيد المسيح القوي صانع المعجزات،
و يقدّم القديس (يوحنا - حنان الله) حنان السيد المسيح ومحبته للبشر …
بطريقة توضح إن يسوع هو المسيح ابن الله (من أول آية)

التفاصيل
لوقا

القديس لوقا بيقدّم لنا المسيح كإنسان كامل و كصديق للبشرية كلها بكل فئاتها

التفاصيل
يوحنا

إنجيل يوحنا يقدم لنا السيد المسيح بوضوح أنه الله الكلمة اللي أتى و صُلِب و قام عشان يعطي الحياة الأبدية لكل من يؤمن به. 7 مرات يسوع قال (أنا هو) فيهم صفاته الإلهية.

التفاصيل

كلّمنا

🤔 إيه رأيك في الملخص ده و طريقة الصفحة دي؟ هل سهّل عليك إنك تتابع السفر و تفهمه و تفتكر ملخّصه؟
🥰 إيه اللي عاجبك و حابب نركّز عليه أكتر؟
💡 إيه اللي مش عاجبك و حاسس إننا لازم نعمله أحسن؟ إزاي نطور و نحسن نفسنا؟
أي تعليق أو اقتراح هيفيدنا جداً